Ti Tarakenmo ken Sika
NASKEN nga agtalinaed dagiti uken iti di nakurkurang ngem innem a lawas iti sidong ti ina ken dagiti kakabsatda sakbay a maipusing wenno mayallatiwda iti baro a pagtaengan.
Maibalbalakad a maaramid daytoy tapno masigurado a maipaayan dagiti uken iti umisu a nutrision manipud iti inada.
Malaksid iti daytoy, nasken pay a maikkan dagiti uken iti nabaybayag a panawen a makilangen kadagiti dadduma a kakabsatda.
Dakdakamaten dagiti eksperto a nalaklaka a kalangen ti uken dagiti tattao ken dagiti padada nga aso no mabaybayag iti panagtalinaedda iti sidong ti ina ken dagiti kakabsatda.
Ti ina nga aso ti kangrunaan a mangipaay iti nutrision a kasapulan ti uken kadagiti nasapa a paset ti panagbiagna.
No bassit wenno agkakapsut dagiti uken, no aduda nga agkakabsat wenno adda parikut ti ina nga agpasuso, nasken a masupusopan ti nutrision a kasapulan dagiti uken.
Uray no mabalinen nga idasaran dagiti uken iti nadaruy wenno nabasa a taraon, masapulda pay laeng ti gatas nga aggapu iti inada.
No dadduma, ited pay ti ina nga aso ti taraonna kadagiti annakna. No kastoy ti aramiden ti ina, nasken pay a nayonan ti idasar a taraonna tapno saan kumuttong gapu iti kaadu ti agsuso iti daytoy.
Adda dagiti komersial a gatas nga irekrekomendar dagiti beterinario a mabalin nga idasar kadagiti babassit pay nga aso.
Saan pay a natalged a pagbasaran ti edad dagiti uken tapno maipusingda. Agpayso nga innem a lawas ti kadawyan a masursurot tapno maipusing dagiti uken, ngem adu pay dagiti nasken a pagbasaran a kas iti mapaliiw a pannakiay-ayamda kadagiti kakabsatda, panagsursuroda a kumagatkagat iti nagduduma a bambanag wenno iti naturay a galad dagiti dadakkel wenno napigpigsa nga uken.
Madlaw pay a mabalinen nga ipusing dagiti uken no kanayon nga umadayoda iti inada ken maik-ikkanda iti wayawaya nga agdakiwas.
Saan unay a makakita dagiti uken iti umuna a tallo a lawas manipud iti pannakaipasngayda. Nakapsut pay ketdi ti panagangot ken panagdengngegda.
No madlaw nga agsussuso pay laeng dagiti uken no madanonda ti maikapito a lawas kalpasan ti pannakayanakda, yuray lattan agingga iti maikawalo a lawas sakbay a maipusingda.
No kastoy iti aramiden, maikkan pay iti gundaway a mangsanay kadagiti uken a mangan iti solido a taraon.—O