Adda Latta Naasi a Tattao
NANGANAKKAMI idi iti kasar ken baketko iti Siudad ti Urdaneta (Pangasinan). Kaduami a public schools district supervisor ti ina ti nobia. Imbes nga ag-commute-kami, ti owner-type a dyipko ti inusarmi. Malem ti kasar ket amangan no awanton dyip iti terminal nga agpa-Tayug no malpas ti kasar. Kadawyan ngamin a kadagidi a tawen nga alas singko ti malem ti last trip. No aglayonkami iti resepsion iti pagtaengan ti nobia kalpasan ti seremonia ti kasar, sigurado a rabiinton no agawidkami.
Husto ti pattapattami. Pasado alas nueben ti rabii idi agpakadakami kadagiti nagpasken. Adayo gayam ti balayda; adda iti nasulinek a barangay sa ket di pay nasemento wenno naaspalto idi ti dadduma a paset ti kalsada a dinaliasatmi.
Addakamin iti nawatiwat a libbawang wenno awanan matatao a kalsada iti nagbaetan ti Urdaneta ken Asingan idi kellaat a simmardeng ti lugan a manmanehuenmi. Naawanan gayam iti gasolina!
“Dimonto met tsinek-ap sakbay a nagpa-Urdanetata,” addaytan ti pammabasol kaniak ni baket.
Ammok lattan ti kayatna a sawen. Addakami iti napeggad a lugar a masansan a pakapaspasamakan iti hold-ap, panagtambang ken panagpuor kadagiti lugan.
Saanak lattan a nagtimtimek. Dadael ti fuel gauge ti lugan. Adda ketdi masansan nga itugtugotko a plastik a galon a pagikargaan iti gasolina a magatang. Ngem no innak gumatang (pagpagnaek ti agsubli iti sentro ti Asingan), mabati ni baket. Napanunotko a bareng adda mapasungadanmi a lugan a mabalin a makatulong kadakami. “Apo, tulongannakami koma,” naibisikmi a siuulimek.
Ngem nakiddit ti aglabas a lugan nga aggapu iti Urdaneta ken Asingan numona ta nasipnget iti yanmi. Nalawa a kataltalonan iti agsumbangir a sikigan ti kalsada. Awan ti matagtagitao. Awan ti kabalbalayan a makitam iti daya ken abagatan, uray iti laud ken amianan.
Mangrugin nga agnerbios ni baket. Kasanon no adda iti kasipngetan dagiti baribar ti kararuana.
“Saannata a baybay-an ni Apo Dios, baket,” kinunami.
Maysa nga oras ngatan nga agur-uraykami iti lugan a pagpatulonganmi idi adda silaw a nariparmi iti laud a naggapuanmi. Naragsakankami. Sakbay a pinarami, addan iti batogmi ti motorsiklo a nagluganan ti maysa a lalaki a nakadiaket iti maong.
“Ania kadi ti problema, angkel?” nabukel ti timek ti lalaki nga agtawen laeng ngata iti tallopulo wenno nasursurok segun iti naanninawak a rupana a sinilnagan ti silaw ti motorsiklo.
“Naibusankami iti gasolina, barok,” kinunak. “Numona ta agawidkami pay iti San Nicolas.”
“Adda paggalonanyo, angkel?” kinunana. “No adda, mabalin nga igatangankayo dita Asingan ta as-asideg ngem iti Urdaneta.”
Innalak ti plastik a galon nga adda iti likud ti luganmi. Inyawatko daytoy sa indutdotak iti lima gasut. “Uray mapno kadin, barok,” kinunak.
“Lakam ket nga agtalek iti padam a tao,” inraed ni baket idi pagbanurborenen ti lalaki ti motorsiklo nga agturong iti Asingan. “Kasano no saanen nga agsubli? Sayang ‘diay lima gasutmo.”
Ngem nagsubli ti nakamotorsiklo a lalaki. Awitnan ti uppat a litro a gasolina a naikarga iti plastik a galon, agraman ti supli ti lima gasut.
Ti imasna, dimi pay ket nalagipen a sinaludsod ti naganna sakbay a pinanawannakami. Ngem sapay koma ta mabasana daytoy. Ta iti kaano man, diminto malipatan nga iti maysa a rabii a kaaddami iti langlangalang, adda isuna nga imbaon ti Apo a nangsaranay kadakami.—O (Adda kadi padasyo, wenno padas ti maysa nga am-ammoyo, a nakaipakitaan ti kinamanangngaasi ti maysa a tao? Ibinglay iti daytoy a benneg, “Adda Latta Naasi a Tattao.” Ipatulod ti sinurat iti
bannawagmagazine.mb@gmail.com. Mabayadan dagiti maipablaak a sinurat. –Editor)