Ti Puga (5)

Uray ania ti mapaspasamak, kayat ti baro a Direktor ti CIA a malikidar ni Agent Stewart.

Ti Napalabas: Kalpasan ti pananglapped da John Villa, Daniel, ken Jerky iti kudeta a mangtippuog koma iti turay ti Presidente ti Filipinas, impaayan ti CIA da Daniel ken Jerky iti seguridad babaen ti Witness Protection Program. Naital-o met ni Mr. Bosworth a handler ni John a kas baro a Direktor ti CIA, ket ti umuna a bilinna: papatayenda ni John. Iti dayta a rabii iti Filipinas, a kaaldawan ti panagsapata ni Mr. Bosworth a kas Direktor, naggigiddan nga adda nangraut kada John, Daniel, ken Jerky. Napatayda a dagus ni Jerky. Agpeggad met ti pamilia ni Daniel ket inawaganna ni John. Ngem madama a makirangranget ni John. Idi mapatayna dagiti nangserrek iti balayda, sinaranayna ni Daniel. Ngem naladawen ta natayen ti asawa ken annak ni Daniel. Napanda iti balay ni Jerky ket sadiay, pinabettak ni PO2 Castillo ti balay. Nakaasat da John. Iti Amerika, imbilin ni Direktor Bosworth ti pannakapapatay ni Agent Stewart tapno di saan a makapagtestigo iti Senado. Impanamnama met ni ASAC Donoteli iti ahente a saan a maan-ano. Ngem kellaat nga adda nangpaltog kadakuada.

(Maika-5 a Paset)

UNDISCLOSED SATELLITE CIA LOCATION. Sumagmamano a lallaki a nakaaruat iti nangisit a terno ti adda iti uneg ti maysa a bunker. Dua nga atitiddog a lamisaan a naparabawan iti sangapulo a monitor ti sangsanguen ti sangapulo a lallaki a nakasuot iti headset. Monmonitorenda ti aerial view ti Capitol Building, ti dakkel a hotel iti saan unay nga adayo, ken dagiti kalsada iti asideg a napunno iti lugan. Iti likudan dagitoy, lima a sabali pay a lallaki ti nakatakder a mangbuybuya iti dakkel a monitor a naitapkal iti diding. Makitkitada ti agdama a mapaspasamak iti aglawlaw ti Capitol Building. Uray ti dua a helikopter nga agtaytayab iti uneg ti No Fly Zone perimeter ti White House ken dagiti adu a Federal Building iti aglawlaw, makitkitada.

Iti met uneg ti maysa a one-way mirror nga opisina, dua a lallakay ti nakatakder a mangbuybuya iti mapaspasamak iti operation center, da Direktor Bosworth ken Deputy Director Hutchison. Agpadada a nakaul-ulimek ken madandanagan a mangur-uray kadagiti sumaruno a mapasamak.

Naidanon itayen ti mensahe a “Shots fired.” Kaipapanan dayta a pinaltogandan ti target. Maysa nga sniper ti naimula iti maysa a natayag a pasdek a mangtantannawag iti hotel a nakailemmengan ni Agent Stewart ket isu ti nangpaltog iti ahente. No napuntaan wenno saan ti ahente, isu ti pakagagaranda nga ur-urayen.

Nagsanud ti laklakay, nagpusipos sa nagturong iti lamisaan a nakaiparabawan ti kapena nga agas-asuk pay laeng. Pinidutna ti tasa. Sinimsimanna. Nagrupanget ta napudot pay laeng, ken napait. Awan ti krema wenno asukar ti kapena.

“What’s taking them so long? Don’t we have inside mole within the FBI and the US Marshall?” sinaludsod ti Direktor.

“We do, sir... but, unfortunately, he is not with the ASAC,” insungbat ti Deputy.

Immanges iti nauneg ti Direktor. Immigup manen iti kapena. Nagkusipet dagiti matana. “You know what we are doing right, Mr. Hutchison?”

“Cleaning up, sir...”

“Precisely... ta no dikay’ koma nagkibaltang iti aramidyo idiay Filipinas, awan koma daytoy a parikuttayo.”

“Saanka koma met a nagbalin a Direktor, sir...” Kimmusilap ti lakay, sa makasuron a nagkuna: “Dakayo ti nagluglog!”

“Ngem nakipagkalubka, sir. Adda basoltayo amin. Isu nga isardengtayo koman ti agpipinnabasol tapno maipamaysatayo a dalusan dagiti warangtayo?”

Nagdayamudom ti Direktor. “Isu a nasken a pagulimekemon ni Craig Stewart... at all cost! Do we understand, Deputy?”

Immanges iti nauneg ni Deputy Hutchison. “I’m trying to do my very best, sir.”

NAGKARIBUSO dagiti pannakabagi ti FBI apaman a nakitada ti pannakaibaliktad da ASAC Donoteli ken Agent Stewart iti datar. Nagkarasakas dagiti buong ti dakkel a sarming a tawa ti hotel a sinerkan ken ti bala. Maysa kadagiti ahente ti nagpanggep a mapan sumirip iti lussok a sarming ngem igaygay-atna pay laeng ti umasideg, maysa manen a buli ti simrek iti isu met laeng a lussok. Nagtarus daytoy iti ulo ti maysa nga ahente. Nagpusitsit ti dara manipud iti simrekan ti bala ket naiwarasiwis iti datar.

Nagkakaribuson dagiti adda iti uneg. Maysamaysa agsapul iti paglingedanda. Ammoda nga sniper ti mangpalpaltog kadakuada. Maysa kadagiti security ti nagtaray a nangamiris iti naudatal a kaduada. “We need medics,” kinunana.

“Charlie to Eye in the sky,” inradio a dagus ti maysa kadagiti badigard ni ASAC Donoteli. “Shots fired. Agent down... Repeat, shots fired, agent down. Do you copy, Eye in the Sky?”

“Loud and clear, Charlie,” insungbat ti Eye in the Sky wenno ti sniper a nakaposision iti ridaw ti helicopter nga agtaytayab iti ngato.

Maysa met kadagiti badigard ti dagus a nagsarimbaboy nga immasideg kada ASAC Donoteli ken Agent Stewart. Apagisu met a rimmuk-at ken nagballikid ti ASAC a nakarabaw ni Agent Stewart.

“Are you okay, sir?” sinaludsod ti lalaki.

“I am,” insungbat ni ASAC Donoteli. Kinitana ni Agent Stewart a masmasdaaw pay laeng a nakadata iti datar. “Are you okay?”

Impalawlaw ni Agent Stewart dagiti matana sa insungbatna: “I am...” Inggay-atna ti tumakder ngem inatipa ni ASAC Donoteli.

“Good, but, stay down,” imbilin ni ASAC Donoteli. Liningayna ti head security-na. “Status?”

“Atapen dagiti kakaduatayo idiay baba nga iti kasinnango a natayag a pasdek ti yan ti sniper, sir. Addan naibaon a taotayo a mangsawar.”

“Good. How about our troops at the lobby and at the front of the hotel?”

“They have cordoned the area, sir. As of now, this hotel is off limits to the public.”

“So, everything clear?”

“That’s 10-4, sir. We have to get out of this room, sir. We are a sitting duck target.”

“Right on,” insungbat ni ASAC Donoteli. Liningayna ni Agent Stewart. “Is this the first attempt in your life, agent?” “Other than in the field, yes.”

“Ita, mayatka pay laeng nga agtestigo?” Bangbangir ti isem ni Agent Stewart. “Agtestigoak man wenno saan, isikatdakto latta. Siak laeng ti makaammo iti bungsotda.”

Nagtungtung-ed ni ASAC Donoteli. “Saluduanka.

Dagiti kas kenka a natured ken dedikado ti masapul ti gobierno.” Sinaggaysa a kinita ni ASAC Donoteli dagiti taona. “Nakasaganakayon?”

“We are, sir!” dandani naggigiddan dagiti lima a simmungbat. “Let’s go!”

Inatibay ni ASAC Donoteli ni Agent Stewart. Imbilinna ti panagarudokda tapno di makita ida ti sniper, nupay patienna nga awan itan daytoy.

Dagus a binayabay ida ti uppat a pannakabagi ti linteg apaman a mailukat ti ridaw. Walon ti nanglawlaw kada Agent Stewart ken ASAC Donoteli bayat ti panagturongda iti elevator. Tunggal igid ti pasilio ti hotel, innem a naka-tactical gear a kameng ti US Marshall ti nakapuesto.

Dua pay a pannakabagi ti linteg ti nagparang idi aglukat ti elevator. Nagradio a dagus ti pannakapangulo ti security detail ti ASAC kadagiti taoda iti lobby. Nakaul-ulimekda kabayatan ti panagpababa ti elevator. Uray ni Agent Stewart, nakaul-ulimek ngem mariribukan. Awan paltogna. Saanna a masalakniban ti bagina. Kaykayatna met la koma no pinaiggamanda iti paltog. Ngem nagkitakit ti ASAC itay isingasingna. Napalawlawan met ketdi iti guardia. Adu ti mangsalaknib kenkuana. Ngem ad-adda nga agtalek iti kabaelanna a mangsalaknib iti biagna.

Pagam-ammuan, nagsardeng ti elevator. Addada iti maikatlo a kadsaaran a kas ibunannag ti silaw iti diding ti elevator.

Nagkinkinnitada. Agpapadada a masmasdaaw. Maysa ti nangipis-it iti boton ti elevator. Ngem saan a naggunay. “Charlie to detail...” inradio a dagus ti pangulo dagiti security detail ni ASAC Donotelli. “Nagsardeng ti elevator. We are stuck at the third floor... Status...

“All clear, Charlie. The lobby is clear...” insungbat ti detail iti lobby.

“Charlie to Detail, 3rd Floor, status...”

“All clear, Charlie... all... “

Pagammuan la ta nagpukaw ti boses.

Nagkinnita ni ASAC Donoteli ken ti pangulo ti security detailna. Inasuten ni ASAC Donoteli ti paltogna.

“Detail, 3rd Floor, come in...” inyawag manen ti pangulo dagiti badigard. Ngem awan ti sumungbat. “Charlie to details... proceed to 3rd floor... possible trouble... do you copy, details?” Nagsasaruno a simmungbat dagiti detail.

Idi kuan, nangngegda ti panagkaradakad ti landok a naisigkat iti nagsabatan ti dua a ridaw ti elevator. Adda mangpilpilit a manglukat!

Nagkinnita da Agent Stewart ken ASAC Donoteli. Timmangad ni Agent Stewart iti ngato ti elevator, iti escape hatch.

“Charlie to detail, 3rd Floor... report status, can you hear me... report status...” ngem awan latta ti sumungbat iti radio.

“Detail, 4th floor, Charlie... we are approaching third floor... running towards the elevator...”

“Alistuanyo!” indagdag ti pangulo dagiti badigard ti ASAC. “Sir, we have to go,” insengngat met ni Agent Stewart sa timmangad.

“We have guards on every floor all the way down to the lobby... We are safe here,” impanamnama ni ASAC Donoteli.

Nagwingiwing ni Agent Stewart. “You know that your security corridor has been compromised, sir. Kabesadok dagiti kakastoy a bpasamak. Try not to deceive youself... You know it’s not your people that’s banging the elevator... they are enemies!” Saan a nakauni ni ASAC Donoteli.

“Sir... I’m afraid, Agent Stewart maybe right... We are trapped and nowhere to go other than the top of this elevator. You have to go...” inkanunong ti pangulo ti security detail ni ASAC Donoteli.

Nagtugaw ni Agent Stewart. “Step on my shoulder, sir, and reach the escape hatch...”

Nangemkem ti ASAC. Agpampanunot. Nagtuloy ti pannakapilit a mailukat ti ridaw ti elevator.

“Sir, you have to go...”

Saan a nagun-uni ni ASAC Donoteli. Insagpatna ti kanawan a sakana iti abaga ni Agent Stewart sa timmakder a nanggaw-at ken nangiduron iti kalub ti escape hatch. Kimmalay-at iti tuktok ti elevator.

Nanalbaag manen ti ridaw ti elevator sa sinaruno ti pannakangngegda kadagiti kanalbuong iti ruar.

“Go, Agent Stewart!” kinuna ti pangulo ti security detail ni ASAC Donoteli.

“No, you guys go. I’ll take care of those people whoever they are.”

“We are here to protect you, sir. So, go...!”

“Agent Stewart, agkutikan!” indagdag ni ASAC Donoteli nga addan iti tuktok ti elevator. Inyawatna ti imana.

Saan a nagkuti ni Agent Stewart.

“Please, agent,” impakaasi ti pangulo ti security detail. Kinita ni Agent Stewart dagiti kakaduana a nabati iti elevator. Nakataltalna dagitoy a nakasango iti ridaw. Nakapaturong dagiti paltogda iti mismo a ridaw. Nakasaganada a mangpaltog iti asino man nga agpilit a sumrek.

Timmangad iti escape hatch. Nakatanggaya pay laeng ti ima ni ASAC Donoteli.

Limmagto. Naiggamanna ti ima ti ASAC. Ingguyod daytoy nga impangato. Maysa pay nga ahente ti insagpatda sa immunan ni ASAC Donoteli a nagkullayot iti landok a tali ti elevator. Simmaruno ni Agent Stewart, sa dagiti kakaduada nga ahente. Mangmangngegda latta ti busi dagiti paltog iti ruar.

Nagpallayog ni ASAC Donoteli apaman a nakagteng iti maikapat a kadsaaran. Kasta met ti inaramid ni Agent Stewart. Nagdissoda iti bassit a landing iti ridaw ti alevator. Pinadas ni ASAC Donoteli a lukatan ti ridaw. Narigatan. Tinulongan ni Agent Stewart. Ngem marigatanda latta ket nagtalinaed a nakabitin dagiti kakaduada nga ahente iti tali a landok ti elevator. Nagsinnenias dagiti dua tapno aggiddanda nga agpigsa, ngem pagammuan lattan ta adda gimluong iti uneg ti elevator.

NAKAPANAWEN ni Director Bosworth. Nainget ti bilin daytoy: ipakaammona dagiti amin a mapaspasamak, ken, naulit-ulit, no saanda a malapdan ti panagparang ni Agent Stewart iti sango ti Senate Intelligence Committee, nasaysayaat laengen nga aglemmeng. Impangta ti Direktor a no saanda a malapdan ni Agent Stewart a mangibutaktak kadagiti napasamak iti Filipinas, isunto a mismo ti mamagparang nga isu, ni Deputy Hutchison, ti akimplano iti operasion iti Filipinas. Nga awan ti pakaibiangan ti Direktor ti CIA ken dagiti dua a Sekretario iti Department of State ken Department of Defense.

Nagngayemngem. Maamirisna itan a biddut ti panagsublina iti ahensia. Uray la a rimtuok dagiti gemgemna iti panangmesmesna a nakalagip ken ni John Villa.

Isu ti akimbasol amin dagitoy! Isu koma ti nasken a maipakni. Isu koma ti nasken nga agikaro.

Ngem ni Agent Stewart ti ad-adda a pagpeggadanda ita. Nasken nga isu ti yunana a sanguen. Ngem iti taray dagiti pasamak, naamirisna a kasapulanna ti mapangnamnamanna a tao.

Pinidutna ti radio. “Alpha to Foxtrot, status check?”

“We are in pursuit of our target, sir,” insungbat ni Foxtrot. “We’ll get him, sir... I promise...”

“We have more immediate threat that has to be neutralized or eliminated. Sika laeng ti ammok a makabael a mangpasardeng.”

“Sir... I’m here in the Philippines...”

“Then pack and return to the USA ASAP...” Nauneg nga anges ti nangngegna iti radio. “So, what’s going to happen to our target here?”

“Put it on hold. We’ll take care of that as soon as we are done here...”

Napaanges manen iti nauneg ni Foxtrot.

“Did you hear me, Foxtrot?”

“Yes sir... “

“Use other identity to travel back...” “That’s 10-4, sir.”

“And report to a clandestine location as soon as you arrive here...”

“Yes, sir. I just have one request.”

“Name it.”

“Activate Angelique...”

“Who?” Napamulagat ni Deputy Hutchison. “Who the hell is Angelique?”

“The Aleppo girl, sir. Our agent who killed our informer in Aleppo for suspicion of cooperating with the Russian KGB. She is the only one I need, no one else...”

Nagsennaay ti Deputy ta malagipna itan ti napasamak. Maysa kadagiti kasikapan a babbai nga espia iti ahensia ti dinakamat ni Agent Fleming wenno Foxtrot. Naibaon iti Aleppo idi bombombaen ti Russia ken Syria dagiti rebelde nga ipadpadamagda nga ar-armasan ti Amerika. Isu ti nangidaulo kadagiti ahente a nailibas a naiserrek

iti Aleppo. Nagimbestigar, ket idi mapaneknekanna a ti informer-da ti mismo nga agiruruar kadagiti napateg ken para laeng koma kadakuada nga impormasion, saanen a nagusisa. Basta pinapataynan ti informer-da. In-recall-da.

“Are you crazy? She is a bitch and she is on suspension, you know that.” “Ammok, sir. Ngem nalaing. Nasiksikap pay siguro ngem iti nobenta porsiento dagiti taotayo. Ken ammoyo met nga iti imatangtayo, nainkalintegan ti inaramidna. Napaneknekan a double agent ti informer-tayo...”

“Ngem sinalungasingna ti standard protocol. Nagdesision a di nakiuman kadagiti opisialna.”

“Ngem no inaramidna dayta, napukawna koma met ti gundawayna a mangipakni iti maysa a pangta iti seguridad... Kitaenyo, kalpasan ti inaramidna, naisardeng ti pannakabomba ti kampo dagiti rebelde.” “Kabusbusorko dagiti tattao a natangken ti panagul-ulona.”

“Ngem masapulko isuna, sir. Ken am-ammona ni Agent Stewart. Ammona dagiti garaw daytoy. No kayatyo a maipaknitayo ni Agent Stewart...” “Narigat dayta pampanunotem.”

“Sir, maysaka kadagiti manmano nga opisial ti ahensia nga addaan bileg a mangibabawi iti pannasuspendena... para iti seguridad ti pagilian...” Immanges manen iti nauneg ti Deputy. “Apay ngamin nga isuna pay?” “Gapu ta nalaing.”

“Kasta? Wenno adda nalimed a panggepmo...”

“Sir?”

“Never mind. Don’t answer that. But I need you right away. Is that clear?” “Sir!”

NADAYYEG ti aglawlaw iti napigsa a kanalbuong iti elevator. Nagpallayog ti landok a tali a nagkapetan dagiti dadduma nga ahente ket dandani natnag dagiti dadduma. Ti met kalub ti elevator, pimlatok a sinaruno ti sumsumgiab nga apuy.

“Shit,” nayesngaw ni ASAC Donoteli. Ket inagawaanda ken Agent Stewart nga intuloy ti manglukat iti rikep ti ridaw ti elevator.

Idi mapagbingngida ti rikep ti elevator, inyawat a dagus ni Agent Stewart ti imana iti akinngato kadagiti security detail idinto nga intuloy ni ASAC Donoteli nga inwakwak ti ridaw. Addaytan ti apuy a manglamut kadakuada! Ginammatan ni ASAC Donoteli ti takiag ni Agent Stewart ket iti amin a pigsana, ginuyodna daytoy. Medio intarayna pay ta kasla kappi dagiti dadduma a security detail a nagiinniggem ket nagsasarunoda a naiguyod a simrek. Pinug-awan pay ti apuy ti akimbaba kadagiti security detail. Agan-anangsab ni Agent Stewart a nakapakleb.

Naamiris ni ASAC Donoteli a maysa kadagiti security detail ti linamut ti apuy ken sabali pay ti napasag iti uneg ti elevator. Nangemkem.

Tinulonganna ni Agent Stewart a tumakder. Ngem dida pay nakaplastar, napasungadandan ti uppat a naka-tactical gear nga umas-asideg kadakuada. Ket palpaltoganda idan!

Bimmales dagiti security detail. Naglinged dagiti dumardarup.

“Let’s go!” kinuna ni ASAC Donoteli ken ni Agent Stewart. Sa imbilinna kadagiti taona, “Keep firing, guys!”

“Give me a weapon, sir!” inkiddaw ni Agent Stewart. Nagkusipet dagiti mata ti ASAC Donoteli a nangperreng ken ni Agent Stewart. Ngem idi kuan, inasutna ti bassit a paltog a nakabalay iti sakana. Inyawatna ken ni Agent Stewart.

Minatmatan ni Agent Stewart ti bassit a paltog, sa tinaldiapanna dagiti naka-M-4 a mangpalpaltog kadakuada.

“Nasaysayaaten ngem ti awan,” kinuna ni ASAC Donoteli. “Intan!” Timmarayda. Kinamat ida ti bala. Sumanengseng iti asidegda. Nagbati dagiti uppat a kakaduada. Sinango dagitoy dagiti uppat met laeng a kabusorda a kumamkamat.

“Asino a talaga dagita mayat a mangpapatay kaniak, sir?” sinaludsod ni

Agent Stewart bayat ti panagtartarayda.

“Diak ammo. Ngem asinoda man dagiti kabusormo, siguradoak a nabilegda a tattao. Naturedda. Agasem, saanda a mabuteng iti nagtipon a puersa ti US Marshall ken FBI? Ngem asinoda man, diak tarigagayan nga ammuen. Ti laeng kayatko, salaknibanka tapno a sibibiagka a sumango iti Senado.”

“Ngem kasla saan sa a mapasamak dayta!” Inrapin ni ASAC Donoteli a tinaliaw ni Agent Stewart. Madlawna ti panagduma ti kinatao nga ipakpakita ti panagsasao ken ti garaw ni Agent Stewart. Kasla maaw-awanan iti namnama nga agsao, ngem ti garawna, atiwna pay ti naskedan a soldado.

Nupay kasta, kinunana: “Idatagka iti Senado a sibibiag. Ket awan ti makalapped kaniak.”

Pagam-ammuan ta napasardeng dagiti dua. Adda tallo a masabatda. Ammoda a saanda a kadua dagitoy ta nakapaturongen kadakuada dagiti paltog dagitoy. Agpadada a nagdardaras a simrek iti ridaw a namarkaan iti EXIT.

Apaglukatda ti ridaw, kasla nagtudon iti buli iti landok a ridaw. Simmubbot a pimmaltog ni ASAC Donoteli nupay Glock .45 laeng ti paltogna.

“Umunakan!” inriaw ni ASAC Donoteli ken ni Agent Stewart.

Nakaparpardas ni Agent Stewart nga immulog. Pasaray lumagto payen. Nabiit sa nakagteng iti pagparkingan iti ground floor. Awan ti makitana a tao. Nakaul-ulimek ket nalawag a mangngegna dagiti kanalbuong ken paratupot ti paltog iti ruar a kunam no paggugubatan.

Nagsardeng iti umuna a lugan a nasalaponna, maysa a van a nangisit. Pinadasna a lukatan ngem naka-lock. Impak-olna ti putan ti rebolber iti sarming ti lugan. Naburak ti sarming. Imkis ti alarma ti van. Ngem asino iti mangikaso iti sirena idinto nga agririnnimbaw ti uni dagiti nabibileg a paltog? Napardas ketdi a nangilukat iti ridaw ti lugan.

Limmugan. Kinarawana dagiti waya iti sirok ti manibela. Ginuttana ti dua kadagitoy. Pinagpingkina. Nagandar ti van. Ngem sakbay a mapatarayna, nariknana lattan ti nalamiis a landok a naidennes iti pispisna. “Shit,” nayesngaw ti ahente. Awan maaramidanna no di inkidemna ti nagngariet.

Kellaat, naibuang ti maysa a kanalbuong. Ngem sibibiag!

Nagmulagat. Liningayna ti kanigidna ket nakitana ti lalaki a naidasay. Agdardara ti ulona. Umas-asideg met ni ASAC Donoteli iti yanna. Ammona lattan nga isu ti nangpaltog iti nangpaturong kenkuana iti paltog.

Limmugan a dagus ni ASAC Donoteli apaman a nakadanon iti yan ni Agent Stewart. “Let’s go!” kinunana.

Nasiputan ni Agent Stewart dagiti naka-tactical gear nga agturong iti yanda. Pinagsanudna ti van. Nakirinnimbaw ti daranudor ti luganda iti paratupot dagiti paltog ken kanaltiing iti bakrang ken likud ti van a salbagen ti buli. Napuntaan ti sarming iti likud ket sumanagawisiwen dagiti bala iti lulonanda.

Nagkambio sa inwekwekna ti siliniador. Naganit-it dagiti goma ken nangparnuay iti napuskol a puraw nga asuk ti tambutso. Palpaltoganda latta ida.

Nabiit a nakaruarda iti pagparkingan. Nakapaspaspasda a timmipon kadagiti lugan iti natrapiken a kalsada. Awan ti makitana a nakasurot kadakuada ngem inyantana ti imana iti bosina tapno wayaan dagiti adda iti masanguananna ket saan a marigatan iti panangsaligna kadagitoy. Bosinaan dagiti dadduma a motorista ida ngem saanna nga inkaskaso. Ti napateg, awan ti makasurot kadakuada.

Liningayna ti rearview mirror. Awan ti makitana mangsursurot kadakuada.

Nagtalna bassit ti riknana. Ngem pagam-ammuan ta nakangngeg iti wangwang. Tinangadna ti rearview mirror. Dagiti pannakabagi ti linteg!

“Sir, sardenganta kadi ida?” sinaludsod ni Agent Stewart ken ni ASAC Donoteli.

Saan a simmungbat ti ASAC.

“Sir... do we stop?” inulit ni Agent Stewart. Tinapikna ti abaga ni ASAC Donoteli. Ngem pagammuan la ta nagkusbo ti ASAC iti dashboard. Agay-ayus ti dara iti abagana.

(Maituloyto)