Ti Gasatmo
CAPRICORN (Disiembre 21- Enero 19). Mapasubli ti nagtammeng a panagtalek iti bagi babaen ti panangaramid laeng kadagiti pagirayan ti rikna. Mailisi kadagiti tattao a riro laeng ti kitkitaenda. Maipaay met ti tiempo kadagiti patpatgen iti daytoy a biag. Makairusat ti maysa a pagganaran a nupay saan a nabulanos ti yegna a grasia, manamnama met nga agpaut. Nagasat a numero: 3, 5, 8.
AQUARIUS (Enero 20- Pebrero 19). Maiturong met laeng iti umno daytoy a bulan babaen ti madagdagus a pannakaatur dagiti riro. Adda dagiti duduogan a pammati a no idian, sumrek dagiti baro a pamanunotan a mangitunda met iti grasia. Maipaayankaka iti respeto iti yanmo a tay-ak babaen dagiti yetnagmo a desision nga awan ti pabpaboranna. Nagasat a numero: 2, 4, 7.
PISCES (Pebrero 20- Marso 20). Adda dagiti bambanag a maisayangkat saan a babaen ti puersa wenno pinnilitan no di ket babaen ti panagkaykaysa ken panagtitinnulong. Umisu ita kenka ti pagsasao a ti managsapsapa a billit, matiliwna ti taraonna nga igges. No laokam pay daytoy iti kinaridam, manamnama a makailakasaka kadagiti parabur a mausarmo iti mabayag. Nasuerte ita kenka dagiti natitingra a maris. Nagasat a numero: 3, 5, 8.
ARIES (Marso 21- Abril 20). Adda dagiti lugar a pakariknaam iti talinaay ken pannakapnek. Manamnama a mabirokam iti daytoy a bulan. Ditoy met a rumangayka iti pinansial a tay-ak ken iti kinatao. Kabayatanna, maitultuloymo ti tumulong iti sabali. Iti biang ti ayat ken pamilia, agtalinaed a namaris ti relasion gapu iti pannakairamen ti panagtalek, panagsakripisio ken panagkinnaawatan. Nagasat a numero: 1, 6, 9.
TAURUS (Abril 21- Mayo 20). Mamatika a kabaelam nga aramiden ti maysa a proyekto isu a tung-edamon. Masuotka kadagiti pangngeddeng a yetnagmo. Agpatarabayka laeng iti puso ken panunotmo. Asitgan ti tao a mangipakita kadagiti bambanag a kayatmo a makita. Nagasat a numero: 3, 4, 8.
GEMINI (Mayo 21- Hunio 20). Agannad ta adda dagiti diaya ita a kasla naimbag ngem iti kinapudnona, kasla kanunong a mangkunnot iti adda a sustansiam. Adda dagiti gannuat a nasaysayaat nga ibbatanen tapno makainutka; dagus a mapasublim nangruna no irusat ti pagganaran nga ad-adda nga ipangrunam ti pagimbagan ti sabali. Nagasat a numero: 2, 5, 9.
CANCER (Hunio 21- Hulio 20). Ad-adda a mangatiwka kadagiti gannuat a saan a mainaig ti panagpinnusta. Mayadayoka ita iti dakes nga aramid babaen ti panangusar a naimbag kadagiti talento. Adda met maganar iti talento nangruna no makita ti tao a respetarem dayta bukodmo a bagi ken paglaingan. Nagasat a numero: 3, 4, 7.
LEO (Hulio 21- Agosto 20). Kinapraktikal ti solusion iti parikut. Agkamang ketdi iti rikna ken panunot maipapan iti pangngeddeng a pakainaigan ti pagganaran wenno trabaho. Iti kinakisang ti pinansia, tiempo ken kinaparato ti puonan tapno maipaayan iti linglingay ti pamilia. Nagasat a numero: 2, 5, 8.
VIRGO (Agosto 21- Septiembre 22). No usaren a nasayaat ti panunot, makaramanka met iti kinasaliwanwan a saan a masapul nga agbarayuboyka. Masapul a natibkerka a mangtakder iti pammatim iti laksid a maysa kadagiti nagtamdam ti mangkuestionar iti daytoy. Parabur ti pannakakumikom iti trabaho. Nagasat a numero: 1, 6, 9.
LIBRA (Septiembre 23- Oktubre 22). Dumteng laeng ti grasia no maatiwmo ti kinaliday a nangsallukob kenka. Saan met a magibusan dayta a kinaliday no naynay a nakaserra ti pusom para iti baro nga ayat. Kinaromantiko laeng ti “poreber” ta ti pudno, adda latta baro a nakasagana a mangawat kenka. Nagasat a numero: 3, 4, 7.
SCORPIO (Oktubre 23- Nobiembre 22). Lumawag laeng ti maysa a banag a nalidem wenno narikut kenka no luktam ti panunotmo ken bay-am nga agsepen ti kinataom dagiti baro a bambanag iti aglawlaw. Masursurom ketdi a salakniban ti bukodmo a bagi. Nagasat a numero: 2, 6, 8.
SAGITTARIUS (Nobiembre 23- Disiembre 20). Nupay adda balbalorna, ad-adda a makatulong kenka ti balakad dagiti eksperto. Ad-adda a magastuanka no makigasanggasatka nga umasidegka iti agkamtud iti ammo kadagiti bambanag. Nagasat a numero: 1, 4, 9.