Baliwanta ti Agam-ammo
Baliwanta ti agam-ammo
Kas iti maulit-ulit a panagdinnakulap Dagiti bulong ken ti palayupoy Tunggal malpaag ti dagaang Wenno agaliyabyab ti pudot Ti bumegbeggang a bato A mangbuybuya iti agmalem.
Baliwanta ti agam-ammo
Kas iti maulit-ulit a panaginnabrasa Dagiti ulep ken dagiti bambantay Tunggal mawaw ti naparkagan a daga Iti bangkag ken kadagiti kinelleng A nakaparintumengan
Dagiti pagetpet ken sirawsiraw Nga agun-unnoy iti bayakabak.
Baliwanta ti agam-ammo
Kas iti maulit-ulit a panangdildilpat Dagiti palong iti dapnisan Tunggal agatab ti segga
Ti atab a di maum-uma
Tapno ipannurokna ti ayat Kadagiti bukail iti puraw a kadaratan.
Baliwanta ti agam-ammo
Kas iti mauli-ulit a panagpamisti
Dagiti abuyo, dagiti alimuken, dagiti bannatiran... Tunggal maluom dagiti bunga ti masalim
Ken agsabong dagiti salbang
A makiinnartap a mangyadiwara
Iti inakbay ti ayamuom.
Baliwanta ti agam-ammo Pangrugianta dagiti nararagsak a lagip…
--RONNIE E. AGUINALDO