Ilokano ‘Toy Kampeon iti The Voice Kids Season 4
Nagbalin a paratignayna iti panagkankantana ti kalikagumna nga agawid koman ni nanangna manipud iti Hong Kong a pagtrabahuanna.
ITI tawenna nga uppat, agduyosen iti panagkanta ni Vanjoss Navida Bayaban ti Brgy. Macalong, Asingan, Pangasinan. Naparaburan ngamin iti napintas a boses. Ni Bayani Bayaban nga amana a nalaing met a kumakanta ti nangtartarabay iti pagduyosan ti baritona. Segun ken ni Bayani, agpada met a nalaing nga agkanta dagiti dadakkelna.
Nakisalsalip ni Vanjoss kadagiti singing contests ket praktisen a nalaing ti amana sakbay nga agpalistada iti pasalip.
Idi 2018, nakikontes iti The Voice of Pangasinan a naangay iti Siudad ti Alaminos. Salip iti panagkanta iti entero a Pangasinan daytoy. Ni Vanjoss ti grand champion. Iti isu met laeng a tawen, nakisalip manen iti Pozorrubio Got Talent iti Pozorrubio, Pangasinan ket isu manen ti nagkampeon.
Ket iti sumuno a tawen (2019), pinadas ni Vanjoss ti nakikontes iti Takayan Na Dayew a paset ti pannakarambak ti tinawen a Pista’y Dayat iti Lingayen ket inyalatna ti maikadua a puesto wenno first runner-up.
Linagip ni Bayani, maysa a drayber nga addaan iti talier, a kadagitoy a salip iti panagkanta a nakikontesan ni Vanjoss, duada laeng nga agama a mapan iti ili wenno siudad a pakaangayan ti singing contest. Tallo a tawenen nga OFW idiay Hong Kong ni Evelyn nga ina ni Vanjoss. Innayon ni Bayani a parbangonen no agawidda idiay Asingan ken masansan nga apagisu laeng a pagpleteda ti kuartana.
Idi Hulio iti 2019 met laeng a panangrugi ti The Voice Kids Season 4 iti ABS-CBN Kapamilya network, naki-audition ni Vanjoss. Daytoy ti damo a pannakisalipna iti national singing competition. Nasurok a 7,000 ti nagpalista a naggapu iti nagduduma a deppaar ti pagilian. Nagpaut ti salip iti uppat a bulan. Tunggal rabii ti Sabado ken Domingo iti kada lawas ti pannakaarisit dagiti nakikontes. Kalpasan ti umuna a rikus nga audition, naisaruno ti blind audition. Kalpasanna, inuray dagiti nakisalip ti awag manipud iti network no napagasatanda para iti sumaruno a lebel ti salip. Iti blind audition a nasurok laengen a 140 ti nabati a makisalip, kinanta ni Vanjoss ti “My Love Will See You Through” ket nagresulta a three-chair turner (kayatna a sawen, perpekto ti panangkantana ken aprobado kadagiti tallo a coach a da Sarah Geronimo, Lea Salonga ken Bamboo Manalac a bin-ig a nakatallikud bayat ti panagkanta ni Vanjoss. Apaman a naggibus ti kantana, pinusipos dagiti tallo a coach ti swivel chair-da a simmango ken Vanjoss). Idi pagpilienda ni Vanjoss no asino ti kayatna nga agbalin a coach-na kada Bamboo, Lea Salonga, ken Sarah Geronimo, pinilina ni Sarah.
Iti battle round a maikatlo a rikus, 18 laengen ti nabati kadagiti nakisalip sa 6 iti sing-off round agingga iti semifinal
round a taltallodan a nabati.
Bayat ti salip, kuna kano ni Sarah kenkuana nga agkararag ken kanayon nga ipalagipna a liklikanna ti birit wenno ti naibuelo ken napigsa a panagkanta, nasken ketdi nga agtaud iti puso ken addaan iti umno nga emosion a maibagay iti panagkanta.
Impangngeg ni Vanjoss ti kinapintas ti bosesna idi kantaenna ti “Titanium” ken sinagidna ti puso dagiti nagbuya iti telebision ken live coverage iti Resorts World Manila a nakaangayan ti maudi a dua a rabii ti salip, idi kantaenda ken Sarah Geronimo ti “Habang May Buhay.”
Idi kantaenna ti “You Raise Me Up” iti power ballad round iti maudi a rabii ti salip wenno final showdown idi Nobiembre 3, 2019, nakaul-ulimek ken napnuan panagrukbab a dimngeg dagiti nagbuya. Inipus ti naruay a palakpak ken dir-i kalpasanna.
Talloda a finalist. Da Carmelle Collado ti Camarines Sur, ken Cyd Pangca ti Bukidnon dagiti kakaduana.
Makadominggo sakbay ti maika-13 a kasangay ni Vanjoss idi Nobiembre 6, 2019 wenno sumagmamano nga aldaw sakbay ti maudi a dua a rabii ti salip (Nobiembre 2 ken 3), sinorpresa ni Sarah Geronimo ken dagiti kakaduana a taga ABS-CBN ni Vanjoss. Dimteng dagitoy iti pagtaengan dagiti ag-Bayaban iti Macalong. Inkuyog pay ni Sarah ni Delfin Geronimo nga amana. Nabuslon ken agkakaimas a taraon dagiti imetda a pagsasanguan para iti kasangay ni Vanjoss.
Nakasangpet met idin ti ina ni Vanjoss, ni dati nga Evelyn Navida, manipud iti Hong Kong a pagtrabahuanna tapno mabuyana ti maudi a dua a rabii ti salip. Idi damo a mangabak ni Vanjoss iti singing contest, inawaganna ti inana ken imbagana nga agawiden ngem insungbat daytoy a saan nga umdas ti inabakna a premio a para iti pamiliada. Idi yalatna ti dakdakkel a premio iti simmaruno a pannakisalip ken nagkampeonanna manen, inawaganna ti inana tapno allukoyenna daytoy nga agsublin iti Filipinas ngem kinuna ti inana a nasken nga ad-adu pay a kuarta ti masapulda para iti naraniag a masakbayan ti pamiliada.
Iti naganus nga isip ni Vanjoss, no maigasatanna ti agkampeon iti The Voice Kids 4, saannan a palubosan ti inana nga agsubli idiay Hong Kong tapno agkakaduadan a sangapamilia.
Iti final showdown idi rabii ti Nobiembre 3, reprep dagiti nagbuya iti Resorts World Manila.
Agpada a nalaing dagiti dua a kinabalubal ni Vanjoss. Kinanta ni Carmelle Collado ti “Bridge Over Troubled Water.” Iti napalabas a rabii, kinantana ti “Love On Top” ken ti “Let It Go” a nagduetuanda ken Bamboo a coachna. Ni met Cyd Pangca, kinantana ti “This Is The Moment” idinto a kinantana iti napalabas a rabii ti “Come Alive” ken ti “True Colors” a kinantada ken Lea Salonga a coach-na.
Dandani saan nga umanges dagiti agbuybuya idi iwaragawag ni Toni Gonzaga, maysa kadagiti host ti final showdown, a maipakaammon ti resulta babaen ti maysa nga executive ti ABSCBN Kapamilya Network.
Makatengngel-anges dagiti simmaruno a darikmat. Babaen ti napaglaok a text ken online votes a nakaibasaran ti mangabak, nakaala ni Vanjoss iti 62.11 a porsiento, 24.72 a porsiento ti botos ni Carmelle Collado idinto a 13.15 a porsiento ken ni Cyd Pangca.
Kinuna ni Vanjoss idi agsarita: “Una sa lahat, nagpapasalamat po ako sa Panginoong Diyos na nagbigay sa akin ng talento ko. Pangalawa po ang parents ko na laging sinusupurtahan ako. At pangatlo po ang supporters ko na laging andiyan.”
Kas grand champion iti The Voice Kids Season 4, inyalat ni Vanjoss ti P2 million cash, recording contract iti MCA Music ken house and lot manipud iti Camella Homes.
Idi damagenda ken ni Vanjoss no ania ti pamay-anna iti premiona a kuarta, kinunana nga itedna kada papa ken mamana ngem kinuna ni Bayani nga amana idi kainnuman ti autor iti pagtaenganda a “maibanko ta adda met bukod a bank account ni Vanjoss. No malagipto ni inana ti agnegosio, mangalanto iti pagpuonanna.”
“Talaga a dika agsublin idiay Hong Kong?” intaliawmi ken Evelyn nga adda iti asideg.
“Saanen, sir,” insungbatna nga