Gladys Mae Menor, Gawad Amerika Awardee
Pakalaglagipan a ladawan da Gladys Menor ken Atty. Persida Acosta, hepe ti Public Attorney’s Office (PAO) ti Filipinas, iti pannakaipaay kadakuada ti Gawad Amerika. a kapas, ti panagabel, kasta met ti panagtiritir iti makayasan a bulong ti magey tapno agbalin a tali, ken dadduma pay a bambanag a mainaig iti biag ken aramid iti away.
Piman, kunkuna ni Gladys kadagiti sangailina, kasla ganggannaetda iti bukodda a probinsia. Adda pay gayam saan a makaammo iti allagat ngem ammoda ti lansones!
Iti sabali a bangir, mapan met ni Gladys kadagiti papagayamna a taga-San Nicolas tapno imatanganna ti pannakagamay ti pitak sakbay a masukog a banga wenno tayab, agraman ti pannakagebba dagitoy. Wenno mapan kadagiti kakasinsinna idiay Sarrat ket buyaenna ti panaglagada iti binakol.
Ket idi dumanon iti Hawaii, iti Kalihi, natakuatan ni Gladys a nadumaduma a lugar ti naggapuan dagiti Ilokano iti aglawlawda. Manen, idi napan nagadal iti Hawaii Business College, pinalpaliiw ken inam-amirisna dagiti kannawidan ken kultura dagiti nakapulpulapolna, agraman dagiti Hapon, Koreano, Hawaiian, Portugueso, kdp.
“Nangayed ken nabaknang ti kulturatayo nga Ilokano,” kinunkuna ni Gladys. “Ngem anian ta nagesdan ti pannakaiwarasna iti sapasap.”
Naglabas dagiti tawen a sinalsalimetmetan ni Gladys dagiti pammaliiwna maipanggep iti kultura ken kannawidan ti dinakkelanna a pagilian. Ngem idi adda gundawayna, idi 2007, nangala iti dua nga oras a programana iti radio, iti aldaw ti Domingo, ket dita nga imburayna ti “kinangayed ti kannawidan ken kultura, kasta met ti pakasaritaan ken literatura Ilokana.”
Tapno naan-anay ti maagapadna iti programana iti radio, dimmawat iti pammalubos ti Bannawag tapno ibasana dagiti dadduma nga artikulo a naipablaak iti nasao a magasin a sursuraten da Dr. Jim P. Domingo, Dr. Abercio V. Rotor, ken dadduma pay a sinurat nga adda pannakainaigna iti kultura.
Maibasa pay iti programa ni Gladys dagiti maipabpablaak a kadaanan a sarita a pakakitaan iti nagkakauna a kabibiag dagiti Ilokano ken pakaagapadan dagiti balikas a manmanon a maar-aramat kadagitoy a panawen. Malaksid iti panagisalaysay ni Gladys, maikkan met iti gundaway dagiti agdengdengngeg a mangipakaammo kadagiti kannawidan ken kultura iti bukodda a lugar.
Nalatak unay daytoy programa a “Kannawidan ken Kultura…” ditoy Hawaii. Iti agdama, babaen ti Facebook, makadanon ken mangngeg daytoy a programa kadagiti lugar a saan a magteng ti radio.
Gapu amin kadagitoy, nainominar ni Gladys Menor ken ti programana iti radio a maikkan iti pammigbig a Gawad Amerika iti tawen 2019 babaen ti Gawad Amerika Foundation (GAF).
Iti panagsarita ni Menor idi nayawat kenkuana ti tropeo, kinunana a “ti bukod a pagsasao ti kasasamayan a pangyallatiw iti kultura.” Ilokano ti maar-aramat a pagsasao iti programana. Innayonna ti panagyamanna iti Bannawag, kadagiti agsursurat iti dayta a magasin, ken kadagiti agdengdengngeg ken makiparpartisipar iti programana. “Adda kadagiti umili ti pannakatagiben ti kultura iti bukodda a lugar. Ditay koma baybay-an a mapukaw ta ti kultura ti pakarukodan ken pakabigbigan ti maysa a puli,” inggibusna.
Naipasdek ti GAF idi 2001 babaen ken ni Charles Simbulan. Kangrunaan a panggep ti GAF ti mangbigbig kadagiti Filipino ken ti naisangsangayan a gapuananda ditoy Amerika, ken tapno adda paratignay dagiti Filipino a manggun-od kadagiti aramid a mangitag-ay ken mangted dayaw iti puli.
Malaksid kadagiti agnaed iti Amerika, napadayawan met dagiti Filipino a nakaaramid iti naisangsangayan a serbisio iti Filipinas.
Naangay ti 18th Gawad Amerika Awards Night idi Nobiembre 23, 2019 iti Celebrity Centre International Pavilion, Hollywood a nakapadayawan pay da Atty. Persida Acosta (Lifetime Achievement Award), Korina Sanchez (Excellence in Broadcasting, Lifetime Achievement Award), Kris Bernal (Most Outstanding Filipina Actress in Television), Emmie Ortega Anderson ti Hawaii, kdp.—O