Kaano nga Ipakitam Dagiti Uken iti Beterinario?
bibigna.
Dua dagiti babbai nga immulog iti kotse. Agpadada a nakatisert ken nakapantalon iti maong. Kinibin ni Nana Eling ti medio naluklukmeg a sumilsilap ti kuentasna ken kumepkep ti pukisna ket nalawag a makita ti pangis nga aritosna a gumilapgilap met. Iti panagkunak, nangngeg ti amin ti naragsak a panangkablaaw ni Nana Eling iti daytoy ken ti panangyawisna iti idadanonna iti balayda.
Nagpapaudi ti maikadua a balasang a naub-ubing ken kasla mababain iti di pulos panangkablaaw ni Nana Eling. Simmabat met ni Tata Simo a siiisem a nangkablaaw kadagiti sangaili. Inyawisna met ti iseserrekda ti balayda. Simmurot dagiti annak ken appoko ni Nana Eling a sumrek sa koma iti balay ngem intaliaw ni Nana Eling a kinusilapan ida ket nagal-alud-odda a napan iti asideg ti tawa.
Sakbay a simrekda iti balay, nagsardeng ti kibkibinen ni Nana Eling. “Umaykan, ‘dam,” intaliawna iti kaduana. Kasla natangken ti timekna.
“Umunakayon, ditoyak pay laeng,” insungbat ti maikadua a balasang ket tinurongna ti bangko a kawayan a yanmi. Inyawisko ti panagtugawna iti abayko.
Nagbanglon, nakunak a siak laeng ti nakangngeg. Saan a nasabeng, saan a makasair iti agong ti nasay-upko a banglo. Makapabang-ar ti ayamuomna. Inyam-ammok ti bagik. Imbagana nga awagak laeng iti Manang Zen. Nadlawko a kasla alusiisen. Sabasabalianna ti panagtugawna. Nagbirok dagiti matak iti uray plastik laeng a tugaw ngem awan nakitak. Adda idiay uneg ti balay da Nana Eling dagiti impabulod ni tatang a tugawmi. Gapu ta agalas dies pay laeng ket mabayag pay siguro ti puni, inyawisko ti ipapanmi pay laeng idiay balaymi. Kasla naragsakan. Timmakder a dagus. Nasdaaw ta nagasideg gayam ti balaymi.
Diak napauneg a dagus iti balaymi. Nagbayag a nangmatmatmat kadagiti sabong ti orchids.
“Nagpipintas!” kinunana.
Immisemak laeng. Ket no insangpet ni tatang dagita a naggapu idiayDavao ken Kidapawan, impalangguad ti unegko.
Simrek met laeng idi agangay. Dinamagna no mabalinna ti mapan iti CR. Kinuyogko nga impatuldo ti CR-mi. Naimbag la ketdin ta saan a simro ti sadutko ta di ket indalusonko latta koma manen ti nabasa a labakara ken pantik iti suli itay nakadigosak. Ngem nakagagetak itay ket linabaak dagiti nabasa nga aruatek ken dinalusak a naimbag ti CR. Nangiserrekak pay iti masetera ti narabuy nga snake plant iti uneg. Impuestok iti maysa a suli ti CR. Nagparikna ngata nga adda naisangsangayan a sangailik ita nga aldaw?
Pinagtugawko ni Manang Zen iti salas sa napanak iti kosina. Nangiruarak iti mango float. Nangitedda ni inang iti inaramidna idi kalman ta intedna ti ad-adu kada Nana Eling a nayon kano ti ipasangoda iti naisangsangayan a sangailida. Adu la amin, intanabutobko ngem binulladannak ni inang.
Idi yunegko ti merienda, indawat ni Manang Zen nga idiay kosina nga agtugawkami. Dina kano kayat nga adda makakita kenkuana. Aglabaslabas ngamin dagiti tattao iti asideg ti tawami. Isu nga inawisko iti kosinami. Binuyak ti naanat a pannanganna. Lady-like latta ti gunggunayna. Kimmandela dagiti ramayna. Awan aritos ken kuentasna. Maymaysa ti singsing iti ramayna— graduation ring sa. Awan kiuteks dagiti abbaba a kukona. Awanan make-up. Ngem anian a linis ti dumerderosas a pingpingna. Nalinis ken napudaw met laeng dagiti takiagna. Narimat dagiti nangisit a matana a kunam no umis-isem.
Narungpi dagiti bibigna iti natural a labagada. Napunggos ti atiddog ken nangisit a buokna a nangpawada iti awan pulos kuretret a mugingna. Makaguyugoy ti nagtalinaay a rupana. Nagpintas ketdin, nakunak manen iti unegko.
Adda nagsig-am. Nakigtotak. Ni Manong Jay. Kasangsangpetna manipud iti bangkag. Ammok a makipunsion met. Inyam-ammok ken ni Manang Zen.
Idi nakasukat ni Manong Jay, intugawna iti sangomi ken Manang Zen. Ita man pay, nakunak iti unegko. Saan ngamin nga umas-asideg ‘toy kasinsinko iti balasang. Kabutengna ti balasang, kunkuna man ni Ma’am Karla a titser iti piano idiay high school. Imbaga a mismo ni Ma’am Karla kaniak a crush-na ni Manong Jay. Isu ti agkaraumay ditoy balaymi ta ranaenna ti kaadda ni Manong Jay. Ngem no masaripatpatan ni Manong Jay nga adda, pumanaw a dagus ket