Isagsaganaanen da Enrique ken Liza ti Masakbayanda a Kas Agassawa?
NI Enrique Gil ti umuna a nobio ni Liza Soberano. Iti las-ud ti sumagmamano a tawen a panagayan-ayatda, awan pay met ti sabali a nainanaig iti tunggal maysa kadakuada.
Nupay awan pay iti panunotda ti kallaysa, isagsaganaanen ni Enrique ti masakbayanda ken Liza ta no mabalin, ti balasang ti kayatna a makatuloyan.
Pudno met a dakkel ti nagbalbaliwan ni Enrique manipud nagayan-ayatda ken Liza. Nagnakemen. Ken no kasarsaritam, bin-ig a negosio ti sarsaritaen daytoy.
Apagisu la ket ngarud iti agdama nga estadoda ti teleseryeda a “Make It With You” ta agpadada met nga agsagsagana para iti masakbayanda.
Malaksid iti agduma a pagganaranda, adda panggep da Enrique ken Liza nga agsugpon iti maysa a negosio.
* * *
Itay nabiit, napan iti Brazil ni 2015 Miss Universe Pia Wurtzbach para iti maysa a magasin.
Salsaludsoden dagiti fans no kaduana ni Jeremy Jauncey a maipalpalapayag a baro a nobiona. Sabagay, saan a dakes ta ‘agbagayda’ met.
Maipalagip nga iti arinunos ti napan a tawen, nagsina da Pia ken Marlon Stockinger a nobiona iti tallo a tawen. Agsina-agsinnublianan met ti nagbalin a relasionda, agingga a ginibusandan a namimpinsan.
Ita a baro a tawen, daytoy ngarud baro a nobio met ti maipadpadamag a baro ken ni Pia.
Saan met a sinsinan ni Jeremy Jauncey ta no sukisokem ti katataona, malaksid a nabaknang a negosiante, modelo pay.
Kabayatanna, makumikom latta met ni Pia kadagiti pakaseknanna iti showbiz a kas iti umadani a pelikulada ken Vhong Navarro.—O