Adda Latta Naasi a Tattao

NASANGPETAK ni Marvin nga agtugtugaw iti sango ti kombento ti simbaan a pagserserbiak. Nasdaawak iti langana. Saan a naisem a kas iti dati. Sigud nga iskolar ti Diosesis ti Laoag ni Marvin. Agbirbirok idi ni Apo Obispo iti tulonganna nga estudiante. Tumulong laeng daytoy nga agdalus iti uneg ken ruar ti palasio ken iti kosina bayat ti panagadalna.

Napalalo ti ragsak ni Marvin idi mapili a maysa kadagiti pagbasaen ti diosesis. Ngem nadlaw ti obispo a dina kabaelan a paggiddanen ti panagtrabaho ken panagbasana isu a pinalusposanna kalpasan ti makatawen. Nagawid iti balayda iti dayta a summer nupay nagtalinaed a paraluto dagiti retirado a papadi ni nanangna.

Iti pannakisarsaritak ken ni Marvin, naammuak a kasapulanna unay ti pagmatrikulana. Asidegen ti enrolment para iti maikadua a tawenna iti Marine Engineering iti maysa a kolehio iti Siudad ti Laoag. Saanen a rumbeng a damagek no apay a di tumulong iti panagbasana ti amana ta segun iti panagsalsaludsodko idi irekomendarko nga agbalin nga iskolar ti diosesis, naammuak a nabayagen a pimmanaw ti amana iti sidongda. Adda maysa a kabsat ni Marvin ngem agbaybayad pay laeng iti inutangna a pinagbasana met iti kolehio.

Leppay ti abaga ni Marvin iti daydi a kanito—a nangiduron kaniak a makisarita iti maysa a gayyemko nga adda iti Isla ti Hawaii, ni Manang Frances Cajimat. Tubo iti Brgy. Zamboanga, Laoag City ni Manang Frances. Naam-ammok idi naisar-ongak iti lugarda idiay Ewa Beach iti naminsan a kaaddak iti Honolulu, Hawaii. Nagkitakami kalpasan ti misa iti parokia ni Santa Maria, Ina ti Agnanayon a Tulong (Our Lady of Perpetual Help) iti Ewa Beach, Hawaii. Ni Fr. Edmundo N. Barut, Jr., kura paroko ti nasao a simbaan, ti nangyam-ammo kaniak ken ni Manang Frances.

Maysa kadagiti opisial ti simbaan ti OLPH ni Manang Frances.

Nabiit pay a nagam-ammokami ken Manang Frances ngem inturturedko nga imbaga a no kayatna, tulonganna ni Marvin iti panagbasana, ket siak a mismo ti mangtengngel iti kuarta a pagbasa ni Marvin. Diak mailawlawag ti riknak iti daydi a gundaway. Nakabengbengbeng ti rupak bayat ti panangilawlawagko, babaen ti Messenger, iti kasasaad ni Marvin, nangruna ket ammok a naladawen a rabii idiay Hawaii.

Nakaangesak iti nalukay idi adda maawatko a sungbat dagiti chats-ko ken ni Manang Frances. Kunana a dina am-ammo ti irekrekomendarko a pagbasaenna ngem gapu ta agtalek kaniak, tulonganna ti ibagbagak nga estudiante. Kayatko ti lumagto iti ragsakko iti daydi a kanito.

Babaen ti tulong ni Manang Frances, nakapagenrol ni Marvin. Nagbakasion itay nabiit ni Manang Frances. Naragsak ti panagkitada ken Marvin iti umuna a gundaway. Inkari ni Manang Frances nga ituloyna a tulongan ni Marvin. Nagkari met ni Marvin nga agadal a nasayaat tapno di masayang dagiti sakripisio, bannog ken kuarta nga it-ited ti benefactor-na a ni Manang Frances

Iti panagsubli ni Manang Frances ken ti pamiliana iti Isla ti Hawaii, impabalonko kadakuada ti namnama a makaturpos iti umisu a panawen ni Marvin.—O

“Sika met ti kakaritan a lalaki ti naam-ammok ngem awan met ti inalatna!” Ad-addan ti ngirsi ti babai.

“In-insultuen ken ibabainnak!” “Nakarkaronton ti pannakaibabainmo inton malpas ti labanta.”

“Talaga a nalastogka...” Agsagana koma ni Dunkirk ngem naladawen. Nagdisson ti napigsa a danog ti babai iti rupana ket kasla napinas ti agong ken bibigna. Nagwaragiwig a nangapros iti ngiwatna. Namalamalan iti dara ti dakulapna. Nakalablabaga a dara!

“Tusoka pay gayam! Diak pay nakapagsagana, dimmanogkan!”

“Kamengka iti CIA, saan? Nalipatam kadin nga iti lubongtayo, saan a rumbeng nga ikkan ti kabusormo iti gundaway. Hit at the earliest opportunity and go for the kill...”

Makapungtot unayen ni Dunkirk. Imbes nga agsao, timmayaben ti kanigidna. Ngem napardas a naglisi ti babai. Imbuyog pay daytoy ti nangdanog iti pingpingna. Ad-addan ti pannakainsultona aglalo ket agbuybuyan dagiti kakaduada ken sumagmamanon ti agkakatawa. Agburbureken ti darana. Bimmales. Pinagsasarunona a dinanog ti babai ket nabati nga agsarsarapa ken nagsansanud ti babai. Agingga a napalikuko daytoy ket napadata. Rinabawanna a dagus sa dinanogna ti rupa daytoy.

Inkarigatan ti babai ti nangsalaknib iti rupana ngem adda dagiti dina masarapa a danog ni Dunkirk. Agdardaran dagiti bibigna. Madudogen ti rupana, ngem sarsarapaenna latta dagiti danog ni Dunkirk. Agririawen dagiti agbuybuya. Dina ammo no maragsakanda wenno saan. Kaaduanna a lallaki dagitoy. Katkatawaanda ngatan?

Nagkulaidag. Ngem saanna a maakkal ti bagina iti lalaki a nangkawiwit kenkuana. Narigat pay a makakunail gapu iti dagsen ni Dunkirk. Ammona a saanna a kabaelan a parmeken ti amin a lallaki. Maysa ngatan daytoy.

Ngem agingga nga adda pay laeng angesna, adda latta pamuspusan. Adda latta namnama. Immanges iti nauneg, nagalus-os sa inngatona dagiti sakana ket inkarigatanna a kinawiwitan ti tengnged ni Dunkirk. Balligi! Inawidna nga inetetan daytoy. Nagsardeng a dimmanog ni Dunkirk. Ikarkarigatanen daytoy nga akkalen dagiti saka ti babai iti tengngedna. Ngem umir-irut ti pannakaetetna. Marigatanen a nga umanges ni Dunkirk. Lumabbagan ti rupana. Napukawna payen ti kiredna ket innala ti babai dayta a gundaway a nangibaltog ti lalaki.

Nakaparpardas ti babai a nangsakay ken ni Dunkirk. Pinagsasaganadna a dinanog ti rupa daytoy. Dandani payen saan a masalakniban ti lalaki ti bagina iti pannakatikawna. Napukaw ti pungtotna, ngem maysa pay a nakapigpigsa a danog ti imbatina iti rupa ti lalaki. Naganikki daytoy. Awanen ti gaway ti lalaki a makiranget.

Timmakder ti babai nga immadayo. Dinan tinalliaw ni Dunkirk a nakadata pay laeng iti datar.

Nagpapalakpak dagiti nagbuya.

“Bravo, Angelique! Bravo!” inriawda.

Ngem awan man laeng ti reaksion ti babai iti panangraem dagiti tattao kenkuana. Impunasna ketdi ti dakulapna iti agdardara pay laeng a bibigna. Napangariet a nakarikna ti sanaang.

Ngem nasasaem ti saan a nainkalintegan a panangsuspenso ti ahensia kenkuana. Nagtanabutob.

Nakagteng iti locker-na. Linuktanna daytoy. Apagisu a nagkiriring ti selponna. Ginaw-atna ketdi ti tualia ken ti bassit a bag a naglaon iti lotion, sabon, shampoo, toothbrush ken toothpaste. Nagsardeng ti kiriring ti selpon. Inrikepna ti locker ket tumallikud koman ngem nagkiriring manen ti selpon. Awan ti ganasna a makisarita iti uray asino ita. Immadayo, ngem sumursurot kenkuana ti kiriring. Nasemsem. Nagsubli iti locker-na. Linuktanna. Ginaw-atna ti selponna. Dina payen kinita ti numero ti umaw-awag.

“Siguraduem a napintas ti ipadamagmo. Naumaakon iti makapurga a dakes a damag,” imper-akna iti selpon. “Angel?” agpangpangngadua ti timek ti immawag. Naklaat ti babai. Nagtibbayo. Ken saan a nakauni ta amammona ti agikut iti dayta a timek. Isu laeng ti mangaw-awag kenkuana iti Angel imbes nga Angelique.

“Hello... Angel...” inulit ti immawag.

Immanges iti nauneg ni Angelique. Pinasimbengna ti timekna. “Yes, what do you want?”

Simmublat met nga immanges iti nauneg ti lalaki iti bangir a linia. “I need you to report to Deputy Director Hutchison.”

Nagudak ti suronna. “Dinak pagpungtoten,” imballaagna. “Ammom a nasuspensoak.”

“I know that. But, they are reinstating you back.”

Naklaat ni Angelique. “Don’t give me that shit. I’m not in the mood for bullshit. Goodbye.”

“Please, hear me out, Angel... They want me to go on a classified mission and I convinced the Deputy that you be my partner.”

“For what? Why? You hated me...”

“I never hated you. You know I can never do that.” “Come on, Fleming... Saantan nga aginkukuna. Ammok a kaguranak gapu ta saanka nga ikaskaso... Gapu ta awan ti riknak kenka...”

“Maysaak a propesional, Angel. Mapagsinak ti personal a riknak ken ti propesionko. Maakok no saannak a kayat. Ngem sika laeng ti ammok a makatulong kaniak a mangipatungpal iti daytoy a mision..”

Ulimek.

“Ngem isublidak iti serbisio?”

“Wen.”

“Kaano ti panangrugita?”

“Apaman a makasubliak dita Amerika.”

“Yanmo kadi?”

“Classified.”

Nagrasaw ti babai. “Kayatmo nga agbalinak a partnermo ngem dimo man laeng mabalin nga ibaga ti yanmo?”

“Ammom nga SOP dayta, Angel. Everything we do is on a need to know basis..”

Immanges iti nauneg ti babai. “Okay, I got it.”

“Pick me up at the airport at 0800 hours tomorrow.”

“10-4,” insungbat ni Angelique. “Can I ask you something?” “Go ahead..”

“Why do you care so much about me?

Saan a nainkalintegan ti amin a panangtratarko kenka...”

“Which do you prefer: an honest answer or a bullshit one?” insungbat ti lalaki.

“Either way. I’m a trained spy, I can interpret...”

“Trabaho laeng daytoy. Ket maymaysa ti kayatko a mapasamak no maikkanak iti assignment, ti pannakaitungpalna. Ket sika laeng ti ammok a makatulong kaniak. Dayta ti gapuna a pinilika.”

Saan a nakauni ni Angelique. Awanen ti maisungbatna no di, “What’s the mission?”