Kompleto a Pagannurotan ti AMMAFLA
Maipalagip nga agawaten ti Secretariat ti AMMA Foundation Literary Awards (AMMAFLA) kadagiti entry a para iti Salip iti Sarita ti Maika-22 nga AMMAFLA. Aggibus ti salip iti Marso 15, 2020.
Nairanta ti pasalip ti AMMAFLA kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada.”
Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a mangabak iti daytoy nga edision ti AMMAFLA, kas kinuna dagiti mangimaton iti AMMAFLA a da Amado ken Gloria Yoro, Francisco ken Aurora Ponce, ken Mel ken Sylvia Gonzales (agpapada nga agindegen iti Hawaii).
Inruar ti AMMAFLA ti librona a Dagiti Premiado a Sarita (1997-2014) iti kombension ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, idi 2015. Naipalaon iti nasao nga antolohia dagiti nangabak a sarita iti AMMAFLA sipud narugian ti salip idi 1997 agingga iti 2014.
Dagiti pagannurotan ti maika-22 nga edision ti salip.
1. Aggibus ti salip iti Marso 15, 2020.
2. Agpaay laeng ti salip kadagiti agdadamo a mannurat iti Ilokano. Iti daytoy a salip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Nobiembre 16-30, 2019 a bilang ti nasao a magasin.
3. Siwawayawaya ti autor a mangpili iti topiko ti isalipna a sarita.
4. Agatiddog ti isalip a sarita iti 10-15 a panid iti Letter size (8.5” x 11”), Times New Roman, Font Size 12, Medium, iti doble espasio (2.0), addaan iti Normal a margin, ken iti MS Word format.
5. Maysa laeng a sarita ti mabalin nga isalip ti tunggal autor.
6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna. Saan met a maawat ti sarita a naisalip idin iti AMMAFLA wenno iti sabsabali pay a salip iti panagsurat iti sarita ken ti sarita a naidatag pay a kas entry iti sabali pay a salip iti panawen a pannakaangay daytoy a salip ti AMMAFLA nga agpaut manipud iti pannakalukat daytoy a salip agingga iti pannakapadayaw dagiti mannurat a nangabak iti daytoy a salip.
7. Paulo ti sarita laeng ti ilanad; saan nga agusar iti pudno wenno parbo a nagan a pakaam-ammuan a kas autor. Ipatulod ti pakisalip babaen ti email. Mangipatulod met iti pakasaritaan ti autor iti sabali a file. Ilanad iti nasao a file dagitoy: paulo ti pakisalip, nagan, kaudian a ladawan, ababa a pakasaritaan ti biag, adres ti agdama a pagnaedan, ken numero ti selpon.
8. Ipatulod ti pakisalip agraman ti pakasaritaan ti autor iti daytoy nga email address: Iti Subject ti email, ilanad daytoy: ENTRY ITI AMMAFLA 2020. Saan a mairaman iti salip ti entry a maawat kalpasan ti Marso 15, 2020.
9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalin met a mangparnuayda iti sabali wenno nayon a gunggona, no kasapulan.
10. Mapakaammuanto dagiti mangabak no kaano ken sadino ti pakapadayawanda. No met matakuatan a sinalungasing ti mangabak ti ania man kadagiti Pagannurotan Blng. 2 ken Blng. 6, maibabawi ti premiona ken mapawilanton a makisalip iti ania man a pasalip ti AMMAFLA.
ammafla2019@gmail.com.
Ngunit isang araw sinta lumimot ka/Iniwan mo ang puso kong nag-iiisa/Sakali man ako’y sadyang limot mo na/Hahanapin, tatawagin pa rin kita…
Naggarakgak la ket ngarud ni Manang Tina. “Huston! Baka agtinnag a bayakabak ti paraisna!” kinunana. “Daytan sa daydi pinadasmo a kompasan idi agar-aremka pay a nakakuyasyasam!”
“Mabiit laeng!” insungbat ni Lakay Lito ket nagsardeng ti “Hinahanap Kita.” Madamdama pay, addaytan ti kasla letleten a boses ti announcer a mangipadpadamag a nalayusen ti akinlaud a pingir ti probinsia.
Apagleppasda a namigat idi adda sumardeng a motorsiklo iti batog ti ruanganda. Nabigbig a dagus ni Angkel Dok ni Jigo uray no nakakapote daytoy.
Maraisem ni Jigo a nangkidday ken ni Angkel Dok idi lumaem daytoy. Nagtalangkiaw ket ammo lattan ni Angkel Dok a sapsapulen dagiti mata daytoy dagiti kabbalayna.
“Adda dita kosina ni lolam. Kas mangngegmo, adda dita bodega ni lolom a Lito,” kinuna ni Angkel Dok.
Dimmenden ni Jigo ken ni Angkel Dok. “Adda makasapul iti dungngom, lolo!” inkidday ni Jigo.
Naawatan ni Angkel Dok ti kayat a sawen ni Jigo. “Manot’ tawenna?” sinaludsodna. “Twenty-two. Seksi!”
“Ammona met la ti agapuy ken agdengdeng?” Nagrungiit ni Jigo. “Diak ammo, ‘lo, ta naglaka met nga aramiden dayta. Ngem no langa ti pagsasaritaan, siguradok nga uray idiay Makati ken Cubao, adu ti matiritir ti tengngedna a masabatna!”
“Tagaano? Mayat met la ti pakasasawan ti pamiliana?” Nataliaw ni Angkel Dok ti kalendario iti diding. Innem a bulanen manipud idi simmangpet ngem awan pay ti positibo a pagturongan ti gapu ti nagawidanna. Namin-anon a sinukatan ni Jigo dagiti video iti selpon daytoy, ngem awan pay napilina. Agtultulid ti aldaw, bayaw, no kuan, ikalbit met ni Lakay Lito no kasdiay a dina kursonada ti awisen ti kayongna nga aglako iti pasayan tapno ipasirpatda.
Lalo a dimmenden ni Jigo ken ni Angkel Dok. “Saanen a nasken no sadino ti lugarna, ‘lo. Aglaklako iti ukay dita ili,” dandani di mangngeg ti timekna. “Saanmo met nga asawaen!” Manutsutil ti isemna.
“Ha? Ania ngarud ti kua? Asawaek ti sapsapulek!” Nagtalangkiaw ni Angkel Dok. Nagtalna ti riknana idi mangngegna ti karainas ti kabsatna iti kosina idinto a paspasurotan ni Lakay Lito iti lallay ti tokar ti ponona. “Masapul met, a, nga adda ammo iti background ti pamiliana.”
“Exactly, ‘lo, napanunotko dayta isu nga inamammok, kas panagsagana iti panangasawam.”
Agkatkatawa nga agngilngilangil ni Angkel Dok. “Ania koma ti bibiangna iti panangasawak? Lokoka nga ubing, no ania la ti mapampanunotmo!”
Ngem kasla awan nangngeg ni Jigo. Timmannawag iti ridaw ti kosina sa inisemanna
ni Angkel Dok. “No gumatangka iti lugan, uray bisikleta wenno motorsiklo laeng, masapul nga i-road test. Aglalo la ngaruden ti lugan a di maus-usar, ken nabayagen a nakaparada laeng. Masapul a matesting nga umuna baka agpalia iti ngalay ti dalan.”
Naawatan ni Angkel Dok ti turongen ti palawag ni Jigo. Nabainan ngem naikarigatanna ti nagkatawa. “Ninam nga ubing! No siak ti paspasagidam nagbiddutka. Manila Boy ‘toy lolom, ubing!” kinunana ngem kasla namagaan ti ngadasna.
“Ammok, a, ’lo. Isu ngarud a nayaw-awanmo ti mangasawa ta nagum-umaka idiay Manila. Ngem long, long time ago daydi naudi, di ba? Isu a masapulmo ni Sheeba!” Kinaut ni Jigo ti selponna iti akinlikud a bolsa ti shorts-na. “Kitaem. ‘lo!”
Linuktan ni Jigo ti video ti selponna. Ket in-inut a sinuknor ti gartem ni Angkel Dok iti nakitana iti video. Nakailad ngamin ni Sheeba iti lumabaga a tualia iti igid ti baybay a kasla sangapirgis laeng ti umasul a bikinina, nakakidem ken makabatombalani dagiti naingpis ken apagbingi a bibigna.
Nadlaw ni Jigo a dimmagsen ti panaganges ni Angkel Dok. “Kitaem ti close up-na, ‘lo,” insutil ni Jigo.
Saanen a napupuotan ni Angkel Dok ti pannakalikba ti akimbaba a bibigna idi makitana ti close up ni Sheeba— manipud dapan agingga kadagiti makagargari a bibigna. Ket agpangungganen ti gartem ni Angkel Dok. Mano a dekada ti panagkumegna iti siudad— nagtepteppel tapno makaurnong gapu iti al-alia ti kinapulpulosna a sinukit ti kinuna daydi kapitlona a Lakay Duardo: Ania ti maal-alana iti kankanta? Uray aldaw-rabii nga agtagtaguob saan a rumang-ay ti panagbiagna.
“Ania ti makunam, ‘lo? Adda kaniak ti numero ti selpon ni Sheeba,” kinuna ni Jigo. Rinikpanna ti selponna. “Sideline-na kano ta bassit ti sueldona a kas saleslady. No makaurnong para iti tuition-na, agbasa kano manen.”
Pinerreng ni Angkel Dok ti apokona. Uray ditoy, addada kastan nga ubbing? Nalagipna dagiti dadduma a dianitorda nga agpipinnangas no agkikitada kadagiti katrabahuanda a padada a naayat nga aglang-ay iti malem ti Sabado. Graduating ang nakuha ko, tsong. Kulang daw ang pang-yearbook niya! Batambata ang nakuha ko. Hayskul lang.
Baka ibagbagada laeng nga estudianteda tapno nangato ti presioda, kinuna ti maysa a superbisorda. Baka dayta a talaga ti pagsapulanda. Sumurotka inton maminsan tapno mapaneknekam, kuna met ti sabali.
“Ania, ‘lo? Ag-road test-ka? Awan kas iti sigurado!” inkalbit ni Jigo. “Innem a bulanen manipud simmangpetka, awan pay napasamak!”
Kiniddayan ketdi ni Angkel Dok ni Jigo. “Awan sabalin a prospekmo? Ti taga-Buguey?”
Nagmusiig ni Jigo. “Inikkatkon iti listaak, ‘lo!” kinunana. “Kunana ketdin a no makinobio wenno makiasawa met la iti lakay, ‘tay milionario ti kayatna!”
Naputed ti panagsarsarita da Angkel Dok ken Jigo idi adda umawag iti ruangan. Timmakder ni Jigo ket tinannawaganna daytoy.
“Aglako iti pasayan, ‘ lo!” inrungiit ni Jigo. “Maysa kadagiti prospek ni ‘Long Lito!”
“Tang Lito, ‘dadtoyen ti ordermo a netib a pasayan!” inyawag ti babai. Nakakapote daytoy ngem maanninawan dagiti purked a gurongna iti kapotena.
Nagsardeng ti radio pono ket arintarayen ni Lakay Lito a rimmuar iti bodega. Nagtarus iti terasa ket pinayapayanna ti aglako iti pasayan. “’Maykad’toy ket maslepkami dita,” kinuna ni Lakay Lito. Kinirmanna ni Angkel Dok. “Balo, bayaw, ngem napintas pay laeng. Imbagak idi naminsan nga idanonna ti lakona ditoy balay ta gatangen amin ti kayongko a nalakayan a baro!”
“‘Nia, ‘lo, kontakek ni Sheeba?” imballaet ni Jigo. “Road test tapno siguradoka!”
Sinalemsem ti barukong ni Angkel Dok. Ita, ammonan no ania daytay dina maibuksilan a riknana itay mingminganna ni Sheeba a nakabikini a nakailad iti igid ti baybay. Sabagay, pudno ti ibagbaga ni Jigo— tapno maammuanna no nakakondision pay laeng. Ket tinung-edannan ti apokona.
Ket no kasano ti kinabagas ti isem ni Jigo a nagpakada, kasta unay met ti misugsog ti aglako iti pasayan nga inawis ni Lakay Lito. Ni Manang Tina ngamin ti nangsango. Iti kauuyaw ni Manang Tina iti lakona, kesyo adda laokna a lagdaw, adda pay babassit a bunogna, intedna lattan iti di pay umanay a puonanna a tawarna tapno makapanawen. Kasano ngamin ket naipisok la ngaruden ni Manang Tina iti kaserola, uy-uyawenna pay laeng.