Ammuem Pay Dagitoy
Manamnama ti panangsarabo itoy a tawen ti sektor ti agrikultura iti nabayag nga inur-urayna a panagduras, kas ibunga ti modernisasion ken industrialisasion, eksport, konsolidasion dagiti talon, ken agtultuloy a pannakaiduras ti impraestruktura.
Ti panakadutok ni Sek. William
Dar a mangidaulo iti Department of Agriculture idi Agosto ti nangisangpet iti baro a namnama iti sektor a nabayag a nabaybay-an. Nagsuek ti mapaspastrek iti agrikultura manipud iti 24 a porsiento ti gross domestic product (GDP) idi 1980s a nagbalin laeng a 9 a porsiento idi 2015.
Arapaap ni Dar a makipatarton ti sektor ti agrikultura kadagiti kabangibang a pagilian.
Nupay kasta, iti laksid iti kinaoptimistiko ti sekretario, inakona a nasken nga adu pay dagiti rumbeng a maibanag iti nabatbati a dua a tawen ti Administration Duterte.
“Tinawidtayo ti sektor iti panawen nga agtungtunglab,” kinuna ni Dar. Innayonna a pinakaro daytoy ti panagbaliw ti klima ken ti epekto ti globalisasion iti agrifishery sector ken kadagiti agribusiness industries iti pagilian.
“Gapu itoy, masapul nga agalibtaktayo,” kinuna ti sekretario.
Inamin pay ni Dar a dakkel a karit ti panangisigurado iti kaadda ti umdas a taraon a para iti agtultuloy a dumakdakkel a populasion ti pagilian gapu ta bumasbassit met dagiti pagapitan a daga ken iti kinakiddit ti danum a kasapulan iti panangpaadu koma iti apit malaksid a lumaklakay metten dagiti mannalon wenno bumasbassiten ti bilang dagiti mannalon.
Nangpakaro pay iti parikut ti kinalaka ti presio ti irik gapu iti trade liberalization ken iti implementasion ti Rice Tarrification Law a nangibunga iti pannakaigabur ti imported a bagas iti pagilian malaksid pay iti pangta ti African swine fever (ASF) virus.
Kas solusion ti DA, rinuk-atanna dagiti bagas nga immunan a nakadulin kadagiti bodegana ket nailako iti publiko ken impanginana met dagiti gatangenna nga irik kadagiti mannalon malaksid a nakitulag ti departamento kadagiti gobierno lokal a tumulongda nga aggatang iti irik manipud kadagiti mannalon iti nanginngina a presio. Binukel met ti gobierno ti Rice Competitiveness Enhancement Fund (RCEF).
Manamnama a makaurnong iti aganay a P10-bilion iti tinawen, ti RCEF ti mangipaay kadagiti mannalon iti oportunidadda a mangpasayaat iti wagas ti panagtalonda tapno ad-adda pay nga agbalinda a produktibo. Iti agdama, addan 12 a rehion a nangiwayatan ti DA iti konsultasion ken nagiwarasanna iti makinaria, bin-i, ken dadduma pay a ramit nga agpateg iti P2.8-milion. Aganay metten a 50 a probinsia ti naipaayan iti 465,000 a sako nga inbred rice seeds a kas paset ti RCEF Seed Program ken maitultuloy ti pannakaiwaras ti bin-i iti nabatbati a 7 a probinsia.
Madama met ti panangiwayat ti Agricultural Training Institute iti panagsanay a para kadagiti espesialista, trainers, mannalon, ken farmers coops ken asosiasion. Malaksid itoy, adda 8,945 a mannalon nga iskolar ti nanggundaway nga agbasa kadagiti akreditado a pagadalan.
Iti biang ti Land Bank of the Philippines ken ti Development Bank of the Philippines , naruk-atanen ti aganay a P301.4-milion a pautang iti 164 a mannalon ken tallo a kooperatiba.
Iti programa iti mekanisasion, nakasaganan ti Philippine Center for Postharvest Development and Mechanization a mangipaay iti 2,938 a yunit ti makinaria iti aganay nga 620 FCAs a nagaplikar para iti RCEF Mechanization component.
Mangrugi ti pannakaiwaras ti makinaria itoy a tawen ken manamnama a malpas agingga iti umuna a quarter ti 2020. Malaksid itoy, isagsagana ti gobierno ti Philippine Rice Industry Roadmap, ken tapno matulongan dagiti babassit a mannalon, nakitulag ti DA iti Land Bank of the Philippines tapno maruk-atan ti P3-bilion a pondo ti Rice Farmer Financial Assistance a para iti aganay a 600,000 a mannalon. Nairanta ti unconditional cash transfer kadagiti mannalon nga addaan iti kagudua agingga iti duaektaria a taltalonen a daga.