Nuangkarera King
ti gaganasanna nga agsida. Ania pay, nagsinsinanmin ken nanang a sinilindro ti saggaysakami a luppo ken inalunosko pay ti dalem a paborito ni tatang. Nagimasen, laki!
“Kastoy, kap, ti istratedyitayo,” panangilawlawag ni tatang a nangsangon ken ni Kapitan Ambo. “Ikondisionmi a nalaing ni Sawak. Matiped ti kanenna, ruot nga aggapu idiay Karayatan ti meriendana sakbay ti karera ken isunto met laeng ti alunosenna inton mangabak. Mailugan ken masapa a maibiahe idiay Bangalao tapno makainana ken saan nga agkapsut. Masidawsidawto la a masubuan iti naganus a ruot a balontayo tapno saan nga agsuyot.” Nagtung-ed ti kapitan, tanda iti yaanamongna.
“Ken kangrunaanna, awan pay laeng ti babbai a makikuykuyog kenkuana.”
Naisurot ti kapitan iti natinggaw a garakgak ni tatang. Nalagipko la ket ngarud ti kabayan a nuang ni Angkel Leo. Agmayan sa ket dandani diak maiturong ni Sawak no labsanmi no innak ipan idiay Dir-an.
“Wen, a, manong. Immala met ngarud kenka a bossingna,” insungbat ni Kapitan Ambo nga agkatkatawa ngem kellaat nga inapputna ti ngiwatna. Idi tumaliawak, nakitak a kumitkita gayam ni nanang kadakami.
“Nangngegna ngata, kap?” Mapilpilpil ti isem ni tatang. “Numona ta aduda.”
Ipakat manen ni tatang ti pasawna, inngernger ti unegko. No ngamin kasta nga agpatpatangkami a dua no tiempo ti talon idiay Gullasing, ibagbagana a maikasangapulo kano ni nanang a nanobiana, isu a nagasat ni nanang ta isu ti intungpalna iti altar. Ngem no damagek ken ni nanang tapno pasingkedak, napalalo met a gayad ti libbina. Is-isu kano ti inarem ni tatang. Nabayag kano pay ketdi ta no kasta a mapan agpasiar, mabaawanton ti maipasango a kapena sa adda masawangna. Sa kano met la aguni ngamin no aguyek.
NALUKAGAK iti napigsa a katkatawa iti sirok iti balay. Simmiripak iti regkang ti datar a tabla a pagid-iddaak. Nariparko ni Mang Calloy, ‘tay koridor ti baka ken nuang a tagaili. Isu ti akinkukua iti pangilugananmi ken ni Sawak. Ita ngamin ti kaaldawan ti lumba.
Linudlodko dagiti matak. Immulogak. “Agkapekan ta inkayton. Dagasem ni angkelmo a Leon ta kaduam nga agbantay ken ni Sawak,” imbilin ni tatang.
“Mangalaka iti diaketmo ket nasalemsem,” kinuna met ni nanang a nagturong iti yan da tatang a mangikarkarga ken ni Sawak iti trailer ti lugan ni Mang Calloy.
Nakaad-adu ti tao a nadanonmi iti pagpiestaan. Adu pay ti turista ket patiek nga addan dagitoy idi kalman a pannakaangay ti parada ti Namunit Festival. Wenno nabayagdan ta pinasiarda dagiti nasurok a limapulo a kueba ditoy Sta. Teresita ken dagiti nalamiis-iti-mata a nakaberberde nga agkikibin a turod ken agsisinnallabay a bambantay, ti makaparagutok-barukong a kanta dagiti billit nga agnaed iti Banggalao Lake, ken dagiti nakaad-adu nga akaba-ti-bulongda a bakong a manggaygayang iti nalinak a tangatang— daytay mula a nangsakup iti nasurok a dua gasut nga ektaria a dan-aw, ken maar-aramid a tela. Makapnek ti kinapintas ti lugarmi.
Imbatik ni Angkel Leon a mangbantay ken ni Sawak nga agngatngatingat iti sirok ti salamagi. Mapanak gumatang ti pamigatmi. Medio nawatiwat ti pagnaen ta adda iti bakras ti turod dagiti panganan. Inraprapinko met ti nagbuybuya kadagiti malabsak.
( Maituloy iti panid 31 )