Agboluntariotayo!

IDI napalabas a Disiembre, inimbitarannak ti Sinamar Youth Organization, maysa a gunglo dagiti agtutubo iti maysa a sitio ti Barangay Abucay, Piddig, Ilocos Norte, a kas naisangsangayan a sangailida iti maika-53 nga anibersarioda. Gapu ta boluntario ti panagkameng iti gunglo, maipanggep met ngarud iti volunteerism ti imbingayko kadakuada a kapanunotan.

Adtoy ti sumagmamano a banag a nasursurok iti las-ud ti nasuroken a 20 a tawen a panagbolboluntariok nga imbinglayko iti SYO.

Oras

Ti orastayo ti kangrunaan a maiboluntariotayo. Baknang man wenno awanan, agpapadatayo nga addan laeng iti 24 nga oras iti maysa nga aldaw. Ket no limmabas dayta nga oras, sangapada a saantayon a mapasubli dayta.

Idi addaak iti maikadua a tukad ti kolehio, kaduak ti maysa a nasinged a gayyemko a nagboluntario iti Pahinungod, maysa kadagiti organisasion dagiti estudiante iti University of the Philippines. Impatulodnak ti Pahinungod iti maysa nga orphanage iti likudan ti SM North.

Tunggal Sabado, mapmapanak iti orphanage idi tapno tumulong nga agaywan kadagiti nagkaadu nga aywanda nga ubbing. No kasta a sumangpetak, arigna kagudua pay laeng ti bagik ti nakastrek iti ridaw, agiinnunan dagiti ubbing nga umay umarakup kaniak. No mabalin la koma a bingaybingayek idi ti bagik tapno ti tunggal maysa kadakuada, adda bukodda nga arakupen.

Ipagarupko a dagiti nakitak a padas dagiti ubbing a nagnaed iti dayta nga orphanage ti maysa a dakkel a rason a naladawak a naganak.

Narigat a maawatan no apay a dagiti dadduma a nataengan (a pinilida ti nagbalin a nagannak) maituredda nga ikabil dagiti annakda iti maysa nga orphanage. Ania ngata a rigat iti biag ti pagpaspasaranda ta pinilida nga ipaaywan dagiti annakda iti gobierno babaen ti maysa nga orphanage?

Mabalin ngata a naimula daytoy iti subconscious-ko. Mabalin a kunkuna ti utekko a saakto la aganak, no kayatko man ti agbalin a nagannak, no kabaelakon a taraknen ti anakko.

Kas kuna ti maysa a pagsasao iti Ingles, a nabulod met manipud iti Biblia, “May your kindness return to you a thousand folds.”

(Adda tuloyna)