Bibig ti Ulimek
No wayawayaannakto Tagibiekto lattan ti sanaang Dudogen ken pirpirsayennak Diakto pulos mangakkub Diakto agparintumeng iti sakaanam Diakto makipalimos ti kaasim Ad-adda laeng nga ay-ayennak.
Ngem ammuemto koma
Inton mariknam ti marikriknak Inton makitam ti lawag
Siak ti naggapuam
Awanen ti sabali a dalan A pakapidutam iti lagip Ti maregregko nga ayat Urnongem ida no ilalaem pay Ta uray agpauyo ‘toy riknak Diakto agpakada kenka Diakto panawan ti taeng ‘toy pusok Nalabidto latta ti bibig ti ulimek Natukkol man ti tulang ‘toy dilak Agsaonto latta iti maipapan kenka.
--VINCENT CAB. BERROY
Pinaginayadna ti luganda. Simrekda iti pagparkingan. Ti nangisit nga SUV a nakaparada iti tengnga ti pagparkingan ti immuna a nasagap ti imatangna. Ammona lattan a dagiti death squad ti linaon ti SUV.
Nagparking iti abay ti SUV. Imbabana ti sarming ti luganna. Naibaba met ti sarming ti SUV.
“Good morning, sir,” inkablaaw ti maysa a lalaki iti passenger seat. “Agent Radford...”
“Good morning, Agent Radford. What’s the reading outside and inside? And is the target still inside?”
“Quite, sir... Few occupants of the hotel. Adda aggunggunay iti kuarto... based on our thermal scope... So, he is definitely inside, sir.”
“Mano ti taom?”
“Innemkami, sir.”
“Perfect... Are you guys ready?”
“Yes, sir...”
“Eight people to kill one target, isn’t that overkill, Fleming?” Napaisem ni Angelica.
“You don’t know this man, Angelica. He’s an smart ass.” “We will lose the element of surprise.”
“That’s enough... get ready,” masuron ni Agent Fleming. Inyusongna ti maskarana sa inasutna ti paltogna iti siketna. Inuksotna ti magasin daytoy, kinitana no adda balana sa insublina met laeng. Dimsaag. Simmaruno ni Agent Angelica a nakamaskara metten.
Nagsasaruno dagiti innem a naka-tactical gear ken nakamaskara met laeng a lallaki a rimmuar iti SUV. Nakaiggemda amin iti M-4 ket nakaparpardas dagitoy a simrek iti lobby ti hotel. Nagiikkis dagiti sumagmamano a tao nga adda iti lobby. Imballaag ni Agent Fleming ti panagulimekda tapno awan ti dakes a mapasamak kadakuada.
Maysa kadagiti kameng ti death squad ti nagturong iti uneg ti counter ti reception area. Diniskonektar daytoy ti linia dagiti telepono sa imballaagna ti saanda a panagaramat iti selpon. Nagturong a dagus ni Agent Fleming iti desk. Inasitganna ti babai a nakapideg iti diding.
“Asino in-charge ditoy?” sinaludsod ni Agent Fleming. “Siak, sir,” insungbat ti babai. Inngatona pay ti imana. “Kayatko a maammuan no asino ti adda iti Room 320.” Nagdardaras ti babai a nagturong iti sango ti kompiuter. Ginarawna ti mouse. “Rico Conrad, sir...”
Nagmuregreg ni Agent Fleming. “Did you see him? Who checked him in?”
“Siak, sir...”
“Kasano ti langana?”
“Tall... dark... long hair with long beard and with mustach...” “That’s him, boys...” Tinaliaw ni Agent Fleming dagiti taona. “Go!” imbilinna sa tinaliawna ti babai. “Ten minutes no phone calls, all of you,” imbilinna. “Do you understand?” Nagtungtung-ed ti babai. “Yes, sir... Yes, sir...”
Nagturong ni Agent Fleming iti elevator. Simmina ni Agent Angelica. Nagturong iti agdan a kaduana ti tallo a naka-tactical gear. Nakapaspaspasda nga immuli. Sagdudua a katukad ti panagpangalda ket napardas a nakadanonda iti maikatlo a kadsaaran. Idi sumrekda iti hallway, addan a nakasagana dagiti kakaduada iti sango ti ridaw ti Room 320. Nakapuesto iti sango ti dakkel ken nabisked a lalaki a nakaiggem iti battering ram. Timmiponda kadagiti kakaduada. Ni Agent Angelica ti naudi. Nakaturong dagiti matana iti sango ket dina napakadaan ti pannakailukat ti maysa kadagiti ridaw ti hotel. Nadungpar ti nakatallikud a lalaki a rimmuar. Awan ti nakauni kadakuada. Apagapaman a nagkinnitada.
“S-sorry...” naisawang ti lalaki.
Ti Napalabas: Napan da Kath ken Elmer idiay Guerrero Dos. Pinasiar ni Kath ti pagnaedan dagiti rebelde idinto a pinasiar da Elmer ken Harold ti bantay. Kinasarita ni Kath dagiti rebelde ket adda nangibaga a kidnapenda laengen ni Kath sa pasakada. Nakarikna ni Kath iti danag ngem impanamnama ni Harold nga awan dakes a mapasamak kadakuada. Agdandanag met ni Nana Merced nga agur-uray iti panagawidda; naragsakan idi mapasungadanna ida. Nasao ti baket ken ni Kath ti iliwna ken ni Jonas ket kunana a no mabalin isu laengen ti pangipeksaanna.
(Maika-31 a Paset) PAGAPAMAN a minulenglengan ni Kath ni Nana Merced. Kailiw kadi laeng ti baket ti anakna ken ti apokona wenno adda kayatna nga iparipirip? Simmeksek la ket ngarud manen iti panunotna ni Jonas. Ngem awan met dakesna no agpayso nga ibilang ti baket a kas apoko.
“Pakaragsakak ken pakaidayawak, nana,” kinunana ket inarakupna ni Nana Merced.
“Mabalin a lola laengen ti pangawagmo kaniak… ta kasta ti awag ni Jonas kaniak?”
Isu dayta ‘tay kunakon, nakuna ni Kath iti panunotna.
“Di pay ketdi masdaawton ni Jonas ken uray pay dagiti dadduma a makangngeg, nana, no awaganka iti kasta?”
“Siak no kuan ti mangilawlawag, anakko. Ken baketak metten, apagisu laeng a lola ti awagmo kaniak.” Immisem laengen ni Kath.
Immulogdan. Tinulongan ni Kath ni Nana Merced a nagluto iti pamigatda. Ituloynanto inton madamdama ti ar-aramidenna uray ta bukodna ti orasna ita nga aldaw. Mabalinna pay ti agpasiar iti aglawlaw pambaranna a makisarsarita kadagiti kakaarrubada. Kasla community immersion.
“Duata laengen a mapan agiwayway kadagiti kaldingyo, lola, ket no maitikleb ni tata,” insingasingna.
A