2 a Soneto
1 manen agsiaabak, ‘toy karkarmak kas man kanayon a mayepyep, ay! agkurang sa’t pannakamurmuray, kapadana ‘toy muging ken riknak. pagkurkuranganak ngata, sumrek daytoy iti laem panunotko,
‘ti angin a rumbeng masapulko, ket panagsiaabko isut’ tulbek?
masalsaludsodko: ket no ngata ‘toy dua a tawak ta nakatangep iti kaadalman ti rabii adda ngata ‘tay siaab a kuna? no matmaturogak mayepyepyep ngata ‘toy karkarmak ken ‘toy bagi?
2 ania ketdi ngatan ‘toy biag no ‘tay lagip pulos a di umasideg, awan pulos mangngeg a danapeg, awan man mangwagwag, mangmurmuray. aniat’ taliawen ni pulano no awan met ‘ti likud daytay koma pagrukodan garaw ken ‘diay rikna, awan magammatan a maisangdo.
awan ammona nga addaan pait tapno iti sanguananna inna malisian a daras pagpagnaan, awan pay ‘tay dakulap ni sam-it. ala, ditoy, a, ta ‘diay karkarma awan direksionna’t pagpagnaan.
--HONOR BLANCO CABIE