“A Hui Hou!”
SAGUDAYEN ti panagsukisok ti ALG Research, nasursurok ngem kagudua (51%) kadagiti agturpos iti kolehio ditoy Hawaii ti mapan agbirok iti panggedan iti kadaklan nga Amerika. Bassit kano ngamin ti mabalinda a pagaplayan ditoy Hawaii nga opisina wenno kompania a maitutop iti tinurposda a kurso. Malaksid iti dayta, naginad ti ingangato wenno pannakaital-o iti saad ta adu ti agsasalip iti kakaisuna a maawangan a posision.
Kinuna ni Clement Agbisit, nagturpos iti kurso nga economics ditoy Hawaii idi 1996, a no nagtrabaho koma ditoy, mabalin a dina nadanon ti saadna ita a kas hepe ti departamento, ken mabalin a dina mapadasan ti agnaed iti nalawa a pagtaengan ken addaan iti bukod a paglangoyan.
“No nagtalinaedak ditoy, amangan ta apagisu la a pag-downpayment iti balay ti nateggedak,” kinuna ni Agbisit.
Iti Hawaii, maysa a pagrukodan ti kinarang-ay ti kaadda iti bukod a paglangoyan (swimming pool). Nailet ngamin dagiti solar ken kaaduan kadagitoy ti bangkirig. Kadagiti lugar a nasimpa, kasla kampana ti kinangina dagitoy. Naisangrat ngamin a pagtalonan (agrikultural) dagiti nasimpa a paset ti Oahu. Idi panawen ti unas, mabaluan amin agraman dagiti bakrang ti bantay.
Maysa pay a pakauyawan ti Hawaii ket ti kinailet dagiti kalsada. Malaksid iti freeway/ highway, sumalog-sumangat dagiti kalsada a kumalipkip iti turod. Iti paset ti kabalbalayan, nadegdegan ti kinailet dagiti kalsada gapu kadagiti lugan a naiparada iti agsumbangir. Ditoy Hawaii, tallo wenno uppat ti lugan ti tunggal pamilia.
Nangina ti bayad kadagiti pagiparkingan iti lugan nangruna iti puseg ti siudad. Nangina pay ti pagsingir ti gobierno iti pagsangladan dagiti eroplano ken barko, banag a makaigapu a nangina ti plete iti eroplano ken ti bayad dagiti magatgatang a mailugan iti barko wenno dagiti saan a partuat ditoy Hawaii.
Maysa pay a pagkapsutan ti Hawaii ti edukasion. Nababa ti ranggo dagiti para publiko a pagadalan. Marigatan ti gobierno a makaala kadagiti mannursuro gapu iti kinababa ti sueldo. Dagiti mannursuro ti Hawaii ti kababaan iti sueldo iti Amerika. (Maipagarup a ketdi marisut daytoy a parikut ti Hawaii iti mabiit. Itay umuna a lawas ti Enero, adda iti Manila da Tom Kerry, direktor ti Department of Education ti Hawaii ken ni Gary Nakamura, recruitment administrator, tapno mangpilida iti 150 a mabalin a mangisuro ditoy Hawaii iti daytoy umay a Septiembre. Daytoy ti umuna a panagrekrut ti Hawaii iti mannursuro. Iti report ni Kerry Tom idi Enero 28, kinunana a nabunga ti ipapanda iti Manila. Impannakkel pay ni Tom nga iti interbiu, natakuatanna a kabaelan dagiti mannursuro iti Filipinas ti mangisuro iti uray ania a