No Apay a Nagbalin ti Pusa nga Adipen ti Ina iti Pagtaengan

IDI un-unana a panawen, adda maysa a pusa. Kunkuna daytoy iti bagina, “Ti leon ti katuturayan kadagiti amin nga ayup. Nasayaat ti adda gayyemna a naturay. Masapul a makigayyemak kenkuana.”

Isu a napan ni pusa iti yan ni leon. Ket iti adu nga aldaw, nasayaat ti panaggayyemda.

Ngem iti maysa nga aldaw, bayat ti pampannagnada, nakasabat dagiti aggayyem iti elepante. Nagriri da leon ken ti elepante. Napatay ti elepante ti leon.

“Naturturay gayam ti elepante ngem ti leon,” nakuna ti pusa iti bagina. “Masapul a makigayyemak ken ni elepante!” Isu a naggayyem da pusa ken ti elepante.

Ngem iti maysa nga aldaw, adda maysa a mangnganup a nangaltog iti elepante. Natay ti elepante.

“Adda pay gayam naturturay ngem ti elepante!” nakuna ti pusa iti bagina.

Isu a kinunana iti mangnganup, “Di la mabalin ti makikuyog kenka?”

“Kayatko ti makigayyem kenka ken ti agyan iti balayyo.” “Umayka ngaruden!” kinuna met ti mangnganup.

Idi sumangpetda iti balay ti mangnganup, innala a dagus ti asawa daytoy ti paltogna.

“Di man la nagreklamo! Di pay naguni! Ti gayam babai ti katurayan kadagiti amin a naturay!” nakuna ti pusa iti bagina.

Nagtugaw ti mangnganup iti sango ti lamisaan a panganan. Napan met ti asawana iti kosina. Sinurot ti pusa ti babai.

Daytoy ti gapuna nga agingga kadagitoy nga aldaw, masarakam ti pusa ti pagturayan ti babai—iti kosina—ket uray arigna mapaypayatanen ti babai, silalailo latta ti pusa a mangilagidlagid iti bagina kadagiti saka ti babai.—O