Nagrimat Dagitoy nga Estudiante iti Uswag Darepdep 2019 ti KFW
KAS paset ti panangrambak ti Komisyon sa Wikang Filipino (KWF) iti Buwan ng Wika idi Agosto 2019, inwayatna ti Timpalak Uswag Darepdep iti Ilokano a para kadagiti estudiante a mannurat iti Ilocos Norte kalpasan ti inangayna met a literary workshop iti daniw, salaysay ken sarita iti Ilokano a para kadagitoy. Nagtipon a balikas a Cebuano ken Ilokano ti “uswag darepdep” a ti “uswag,” kayatna a sawen, “panagdur-as.” Ngarud, kayat a sawen ti “uswag darepdep” ti pannakapadur-as ken pannakatungpal ti darepdep dagiti agtutubo a mannurat a pannakaasa a nasayaat ti plumada nga agtungpal iti pannakaipablaak met dagiti gapuananda. Mainaig iti daytoy, ibinglay ti Bannawag kadakayo dagiti nangabak a gapuanan ti tallo nga estudiante a mannurat manipud iti Ilocos Norte a nakipartisipar iti Timpalak Uswag Darepdep. Nagpaay a hurado da Prof. Junley L. Lazaga ti University of the Philippines Baguio (daniw); Palanca awardee Dr. Luis Gatmaitan (sarita); ken da Adelma L. Salvador ken Judith Tango-Galing (salaysay).
Daniw
NADADAELEN ti kaserola dagiti nasingpet nga agassawa a Nana Nena ken Tata Danilo. Awan paglutuandan iti sidada. Ngem awan met igatangda iti baro. Nupay kasta, kinuna ni Tata Danilo a bareng makairemediodanto met laeng iti igatangda.
Iti dayta a bigat, bayat ti kaadda ni Tata Danilo iti taltalon, adda nakitana a sumilsilap a banag iti tambak. Inasitganna. Maysa a selpon! Pinidutna ket nagdardarasen a nagawid. “Baket! Baket! Adda napidutko a selpon!” kinunana.
“Ay, saan a selpon ti kasapulanta no di ket kaserola!” kinuna met ni Nana Nena. “Isublim dayta a selpon iti akinkukua!”
“La ketdi, a, baket, ta diak met kukua!” inkatawa ni Tata Danilo. “Ngem asino ngata ti akinkukua?”
“No aguni, sungbatam, a, lakay!” kinuna met ni Nana Nena. Isu met a naguni ti selpon. Dagus a sinungbatan ni Tata Danilo. Ni gayam Manong Abel nga akinkukua iti dakkel a pagtagilakuan idiay ili. Kalugaran met laeng da Tata Danilo.
“Diak ammo no nakatinnagak, tata!” kinuna ni Manong Abel. “Mabalin nga itay mapanko sarungkaran dagitay pupokko a tilapia.”
“Ay, umayko la ipanen dita puestom, barok,” kinuna ni Tata Danilo. “Ammok a kasapulam daytoy.”
“Kasta ti nasayaat,” kinuna met ni Nana Nena.
Isu a nagrubuat ni Tata Danilo nga agpaili. Iti dalanna, nakagiddanna ni Nana Maria nga aglaklako iti abel. Mapanna kano ipan iti puesto ni Manong Abel idiay ili.
“Apo, nagpipintasen nga abel!” nakuna ni Tata Danilo iti panunotna idi makitana dagiti abel a lako ni Nana Maria. Magustuanna man ti abel a tualia. Isagutna koman laeng ken ni Nana Nena nga asawana.
Nakadanon met laeng ni Tata Danilo iti puesto ni Mang Abel. Adu ti lako ni Manong Abel. Ibagam ti gatangem, adda latta iti puestona. Adda tabo, batia, kaserola, abel, kawar ti aso. Adda pay lansa.
Napalo a ragsak ni Manong Abel idi isubli ni Tata Danilo ti selponna.
“Tata,” kinuna ni Manong Abel, “kas pagyamanko kenka, alaem daytoy simple a regalok kenka.”
Maysa a kaserola ti yaw-awat ni Manong Abel kenkuana! Nupay kasapulanda ti kaserola, kinuna ni Tata Danilo, “Ay, haanen, barok! Saanak nga agsapsapul iti subad ti inaramidko!”
Ngem impapilit ni Manong Abel ti kunana a sagutna. Impisokna iti karton sa pinarautanna.
Isu nga inyawid met laeng ni Tata Danilo ti kaserola. Maragsakan met ketdi ta addan kaserolada ken baketna.
Isu nga arigna adda pay laeng iti arubayan ti balayda, impukpukkawnan ken ni Nana Nena, “Baket! Baket, addan kaserolata!”
Anian a ragsak ni Nana Nena iti dimteng a gasatda. Ket idi maluktan ti karton, dagus nga inyaonna ti kaserola. Sa linuktanna.
Ngem adda gayam linaon ti kaserola. Abel a tualia!—O