Sabong
Adu a sabong ti agayamuom Binigat a digosen ti linnaaw Ngem di marsaak daytoy a sabong Uray di bisibisan arbis ti kalgaw.
Makaay-ayo a pudno Pintasnat’ di mangikulbo Alay-ayanna amin a mamayo Ay-aywennat’ rikna a managpauyo.
Saan a siak ti linnaaw
Awan kaniak ti arbis iti kalgaw Ngem appupuenka, sika a sabong Ditoy lukong ti dakulapko
Iti kaano man, dikanto manglaylay.
--DELFIN P. DUMAYAS
“Barbareng, sir… babaen ti alisto a panangitedyo kadagiti kasapulanmi. Amangan no kayat nga ipadawat dagitay adda idiay Central Office dagiti saandan a maus-usar a lunglongan ken alikamenda agraman aruaten.”
“Mangnamnamaka,” impasigurado ti administrador. “Uray ta padam nga alisto nga agkutkuti ni Manager Malvar.”
Sinango ni Kath ni Jonas. “Thank you, pren. Nasayaatka unay.” Natikaw dagiti kasangsangoda, ngem para ken ni Jonas, umanayen dagita nga insawang ni Kath nga ul-ulsanna agingga iti sumaruno a panagkitada.
Inruar ni Jonas dagiti papeles iti bagna. “Lola, ibatikon dagitoy papeles ta dakayon ti mangidulin. Bareng no makabakasion ni Anti Grace iti mabiit.” “Sika, a, apok no isu ti kunam.” “Kath, uray ta adda met ni Elmer isu no kuan ti mangaramid kadagiti pisikal nga aramid,” kinuna met ti administrador idi maawat ni Nana Merced dagiti papeles. “Ken magustuak man ti nasayud a panagireportmo kadagiti magapuananyo. Dakkel ti panagtalekko kenka ket namnamaek nga agballigitayo iti daytoy a proyekto. Ngem agan-annadka met a kanayon. Saanka nga agmaymaysa nga agsursursor iti kampo dagiti rebelde ta saanmo pay nga am-ammo unay ida.”
“Umawag wenno agtekska latta no adda kasapulam,” innayon ni Manager Malvar. “Sisasaganakami a tumulong.”
“Agyamanak, sir,” kinuna ni Kath. “Ken pakilaglagipyonto bassit dagiti request. Kasapulantayon dagiti mangisuro iti panagmula iti nateng ken rootcrops. Pakibagamto lattan ken ni Elmer inton agsubli no nakasaganadan tapno maisaganami ti pagsanayanda.” “Namnamaem.”
Saanen a nagbayag sa nagpakada dagiti tallo ta di kayat ni Manager Malvar ti masipngetan iti kangitingitan ti dalan a kunada a daladal dagiti rebelde. Nupay addan tulag dagiti militar ken dagiti rebelde iti daytoy a deppaar a saanda pay laeng nga aglalaban, dina latta maikkat ti butengna.
“Inkamin,” impakada ni Jonas iti lolo ken lolana. Inarakupna ida. Inyudina ni Kath. Inawidna daytoy iti apagapaman sa inyarasaasna. “Agan-annadka a kanayon.”
Saan man a simmungbat ni Kath, napneken ni Jonas iti isem ken rimat dagiti agbalbalikas a mata ti balasang. Ken ti inkemmeg ni Nana Merced nga isemna. (Maituloyto)