Nasken nga Agdanggay ti Teknolohia ken Edukasion
SAANEN a mabalusingsing ti kinapudno a napateg a paset dagiti elektroniko a gamigam iti panagadal dagiti ubbing, iti man ruar wenno iti uneg ti pagadalan. Dagitoy nga elektroniko a gamigam ti mangparparegta itan iti panagsursuro dagiti ubbing malaksid kadagiti maadalda kadagiti basbasaenda a libro.
Adu pay dagiti pagsiriban a mangital-o iti bukodda a kabaelan ti matakuatanda iti panagaramatda kadagiti elektroniko a gamigam. Kasapulanda dagitoy iti pannakaparang-ay ti bukodda a bagi bayat ti panagadu ti tawenda.
Iti pannakayammo dagiti elektroniko a gamigam kadagiti pagadalan, nabalbaliwan ti ladawan ti wagas ti panangyallatiw dagiti manursuro kadagiti leksion kadagiti adalanda.
Saan pay a narigat a sursuruen ti panagaramat kadagiti elektroniko a gamigam. Mabalin nga aramiden ken sanayen ti panagaramat kadagitoy nga alikamen iti uneg ti pagtaengan ken uray pay iti sadino man a kombeniente a lugar.
Nalaka pay a yakar-akar ken nanam-ay nga aramaten dagiti elektroniko a gamigam. Daytoy ti rason nga ipategtayo koma ti pannakaaramat dagitoy nga aparato.
Iti panagdur-as ti teknolohia, nasken a maidanggay ti panagdur-as ti edukasion. Nasken a maidanggay dagiti aramid iti uneg ti pagadalan kadagiti mapaspasamak iti ruar wenno iti aglawlaw ti institusion, pagtaengan ken komunidad.
Masapul ngarud a mayabel kadagiti aramid ti pagadalan ti pannakaaramat ti teknolohia tapno mainaig daytoy kadagiti kinapudno ti biag.
Mapalpaliiw pay ketdi iti agdama a dagiti agtutubo ti ad-adda nga agararamat kadagiti elektroniko a gamigam. Masansan pay ketdi nga adda latta dagitoy nga alikamen iti asidegda.
Nagbalin payen a kasla abalbalayda ti panangkutkutingting wenno panangaramatda kadagiti selpon ken dadduma pay a maipada nga alikamen.
Maigapu daytoy iti adu a pakaaramatan dagitoy a makaipaay kadagiti nagduduma a wagas ti panagsursuro babaen ti audio, video, ken ti kaadda ti digital a kamera ken dadduma pay nga apps a mabalinda nga aramaten iti panagsursuroda.
Iti pannakaaramat dagiti kabaruan a gamigam, limmaka pay ketdin ti panagisuro dagiti mamaestra.
Ala, nasken a takuatentayo dagiti pagsayaatan nga ipaay dagiti elektroniko a gamigam. Uray no kaskasano, adu dagiti positibo a bambanag a magun-od kadagitoy.
Babaen dagitoy, nataltalged ti pannakaisagana dagiti ubbing iti naranraniag ken napnuan kaipapanan a masakbayan.—O