Catriona Gray: Embahador ti Arte iti Pagilian

NI Miss Universe 2018 Catriona Gray ti baro nga Arts Ambassador iti pannakarambak ti National Arts Month (NAM) babaen ti panangidaulo ti National Commission for Culture and the Arts (NCCA).

Maipalagip a maysa kadagiti naglatakan ni Catriona ti panangirapinna kadagiti nakaisigudan a ramit kadagiti aruatenna bayat ti salip iti Miss Universe.

Sakbay ti pannakayalatna iti korona ti Miss Universe idi 2018, nagadal iti Berklee College of Music iti Boston, Massachusetts a nakaalaanna iti Master Certificate in Music Theory.

Timmultulong met ni Catriona kadagiti nadumaduma a foundation a kas iti Smile Train para kadagiti ubbing nga addaan iti gusing (cleft lip), ken Young Focus Philippines a mangipapaay iti libre nga edukasion. Kasta met a tumultulong kadagiti grupo a mangsupsuportar kadagiti biktima ti AIDS/HIV.

Iti sabali a bangir, napili met a kas baro a Music Ambassador ni Julie Anne San Jose. Kaduana a kas ambassador ni KZ Tandingan.

Kabayatanna, babaen ti tema nga “Ani ng Sining,” itampok ti NAM dagiti nadumaduma nga aktibidad wenno tignay dagiti artist a Filipino iti nadumaduma a paset ti pagilian. Panggep dagitoy nga itampok ti kinabaknang ti arte iti pagilian babaen dagiti pito a tay-ak ti arte—arkitektura, sine, sala, literatura, musika, drama, ken arte a bisual.

Manamnama a namsek iti nadumaduma a pasken daytoy a selebrasion nga inlungalong ti NCCA babaen ti panangidaulo da Chairman Arsenio L. Lizaso ken Executive Director Al Ryan S. Alejandre.—O

Kadua ti baro a Chairman ti National Commission for Culture and the Arts (NCCA) a ni Arsenio “Nick” Lizaso iti ladawan dagiti ambassadors ti NCCA a da (agpakanawan) kumakanta KZ Tandingan (Music Ambassador), kumakanta Julie Anne San Jose (kadutdutokna a Music Ambassador), ken beauty queen Catriona Gray (kadutdutokna nga Arts Ambassador). (Rinetrato ni Paul Sugano)

CATRIONA GRAY. (Rinetrato ni Paul Sugano ti NCCA Public Affairs and Information Section)