Iti Nagkurosan
DITO sa aking dalampasigan… Naaalala kita, Kahit na tayo’y malayo…
Bakit kaya ang daling Bawiin ang isang sumpa Na di ka na niya iibigin pa…
Iti panunotna, agkankanta ni Lilly; nakatangad a nakanganga. Nagturong iti banio a ti samiweng ti kanta, sumursurot kenkuana a kasla anniniwan.
Ket kasla kimmidag ti sakit ken ni Lilly a dina ammo ti naggapuanna. Sangataawan a di mabatok ti iliwna iti maysa a tao a saanen a nangsubli iti nangayed a kinaulimekda. Ket ti napigsa nga ubo ti danum iti gripo iti banioda iti dayta a bigat ti lumlumtaw a samiweng, ket ni Lilly ti saan a mangngeg a kumakanta.
Idi rummuar ni Lilly iti banio, saanna a nailemmeng dagiti bumusbusel a matana.
“Agsangsangitka? Apay, ania ti kinuam?” adda panangigaga a kinuna ti inana.
“Napanaas gayam iti mata ti shampoo nga impaw-it ni Anti Carmen. Napaluaak pay iti panaasna.”
Addan sa koma pay ibaga ti ina ni Lilly ngem timmallikuden ti balasang a mapan iti siledna. Mariknana ketdi, insurot ti inana ti panagkita daytoy kenkuana. Ammona a saanna a mailinged ti agdama a rikriknaenna. Ngem pinadasna laeng nga allilawen daytoy.
“Agsukatak laeng, ma. Sori, absent-minded laeng datao ita ta makumikomak nga agpampanunot iti aramidek a short film. Ammom met a panawen manen ti Sinulog.” Paset ti Sinulog Festival ti salisal iti Short Film. “Masapul a sumubbotak ita… kanayon a maabakak.”
Napasennaay iti nakaun-uneg ti inana. “Kasta? Dayta panagsuratsurat laeng ti pakariribukam? Ti ammok no ania itayen.”
Nagkatawa iti napigsa ni Lilly. “Yeah, I know you love me that much, ‘ma, but this is purely business.”
Ta dayta laeng agrason uray saan met a pudno ti mabalin nga aramiden ni Lily. Nupay kasta, ammona a saan a nagballigi. Saan a nakappapati ti imbagana a rason. Ammom a saannaka a patien. Iti kaano man, saanmo a mailemmeng ti puso a nasugatan! Ngem at least, pinadasmo. Get up, chin up, dress up, Lil! kinunana iti bagina ket napan iti sango ti sarming, intinnagna iti datar ti balabalna a tualia sa binuyana ti pakabuklanna. And I know I was this naked that moment I asked him what we were in terms of our relationship and he just walked away. That was tons of confidence I saved for years just to say it but… Get up. Chin up. Dress up, Lil! Insuotna ti daisy duke mid-rib-na a puraw sa inasmanganna iti goma a sapatos. I am hitting the grounds again, baby, and I will shake
it off.
Naragsak manen ti isemna, ngem nadadagsen dagiti paddakna a nagturong iti kalsada.
Mamitlo a lumugan ni Lilly sa makadanon iti Abellana Sports Complex iti Jones Avenue manipud iti pagtaenganda iti Hernan Cortes St., Banilad, Siudad ti Mandaue. Nakairuamannan daytoy a biahe tunggal Domingo ta day-off-na iti pagtrabahuanna a call center. Para rabii. Sabado ken Domingo ti day-off-na. Ngem agmalmalem a maturog iti Sabado ta kagapgapuna iti trabaho ket masapul nga agabrut iti puyat. Isu a Domingo laeng a talaga ti panagbalin ti biagna a normal.
Alas singkon iti bigat. Simmardengen dagiti ngarawngaw a ngarawngaw a pusa kadagiti bubongan. Naigalut ken naipupok metten dagiti bulos nga aso a kasla nakakita iti di-katatawan iti napalabas a rabii, ngem di pay laeng agpabatubat ti ringgor dagiti taksi a rummuar-sumrek iti Queensland Motel a linabsan ni Lilly a nagturong iti paradaan dagiti traysikel iti nagsulian.
No maminsan, adda alumiimna a magna ditoy ta amangan no mapagbiddutanda a naggapu iti hotel gapu iti aruatenna. Kasla istambay ti langana ngem mapan ag-jogging ti pudno a rantana.
Nasaripatpatan ni Lilly ni Johndel a langana ti intelehente iti panagdekuatrona iti sango ti tianggida iti labes laeng ti Queensland. Baro nga addaan iti mild autism ni Johndel. Kasarsaritana ti bagina. Kellaat a nagsardeng iti pannakakitana ken ni Lilly a lumabas. Saan a tinaliaw ni Lilly ti baro nupay saan a mabuteng iti daytoy; maasian laeng. Ngem kasla marikrikna latta ni Lilly ti panangmatmatmat ni Johndel kadagiti luppona. Diak mababalaw; kastoy nga agaruatak itan, nakunana iti bagina. Saan a komportable iti garaw daydiay a kaarrubada, ngem binay-anna, intuloyna ketdi ti nagna.
Addan traysikel a nadanon ni Lilly iti nagsulian. “Back rideak laeng, kuya,” kinunana iti drayber. Saanna nga imparikna a saan a komportable iti uneg. Adda ngaminen dua a lallaki a nakatugaw.
Gapu ta awan biahe 21B iti Wireless a pagdissaaganna iti traysikel, kapilitan nga aglugan iti dyip a magna iti Mabolo ket iti Mabolo ti paglugananna iti dyip a biahe 21B a magna iti Jones Avenue a papananna.
Idi lumugan ni Lilly iti dyip nga agturong iti Mabolo, nadlawna a bin-ig a lallaki dagiti pasahero. Napigket ti ikikita dagitoy kenkuana, kasla nakakitada iti naimas a pamigat. Nagbabawi la ket ngarud ni Lilly no apay a nagpayanud iti riknana ket nalipatanna ti nagaruat iti arpaw ti mid rib. Uray tisert laeng koma.
Limmugan met laeng ngem adda simken iti panunotna. No binay-anna ni Johndel a kaarrubada, saan ita. Naibusen ti pasiensiana. Ket ti saem a marikriknana, nasukatan iti pungtot. Pungtot nga awan ti pungtona para kadagiti lallaki. Pinangnamnamanak iti awan. Awan ti karbengam a mangikastoy kaniak, Dude! Saanak a dakes a babai!
Tinurongna ti pungto a mabalinna a pagtugawan. Saan man laeng a dimmenden dagiti… Ket pinayatna amin dagiti saka a nakabalandra ken madalapusna.
“Agay! Agay! Agay!”
Kasla choreographed choral ti agarup naggigiddan a panag“Agay!” dagiti napayat ti sakana. Saan a mailawlawag ti rupada. Nakarikna iti ragsak ni Lilly. Kayatna ti lumagto iti ragsakna. Tinaliawna dagiti padana a pasahero apaman a nakatugaw. “Halla, sorry…” Dua a balikas laeng ti imbalikasna. Inruarna ti kolor-rosas a lipstick-na sa pinulagidanna dagiti bibigna. Inulitna ti nag-sorry, a binuyoganna iti langa a kasla agpakpakaasi. Kasla pusa a saan a nakabuong iti pinggan. Iniseman laengen dagiti