Ti Puga (9)
Nadlaw ni John ti kaadda ti lugan a nagsardeng iti sango ti balayda. Napataliaw sa daras met laeng nga imbaw-ingna ti rupana.
Ti Napalabas: Imbilin ni Mr. Bosworth ti panangpapatayda ken ni John. Naggigiddan nga adda nangraut kada John, Daniel, ken Jerky. Napatayda a dagus ni Jerky. Nagpatulong ni Daniel ken ni John ngem natayen ti asawa ken annak ni Daniel idi dumteng ni John. Napanda iti balay ni Jerky ket sadiay, pinabettak ni PO2 Castillo ti balay. Nakalasat da John. Imbilin pay ni Direktor Bosworth ti pannakapapatay ni Agent Stewart tapno di makapagtestigo iti Senado. Impanamnama met ni ASAC Donoteli iti ahente a di maan-ano daytoy. Ngem kellaat nga adda nangpaltog kadakuada. Nakalibas ni Agent Stewart ngem napaltogan ni ASAC Donoteli ket intarayna iti ospital. Gapu ta nakalibas ni Agent Stewart, dinutokan ti Direktor da Agent Fleming ken Agent Angelica a mangpapatay kenkuana. Inawagan ti ahente ni John ket dimmawat iti tulong. Kalpasan ti panagsaritada, nabuya ni Agent Stewart iti TV ti pannakaiwaragawag iti publiko ti panangpapatayna iti padana nga ahente. Binaliwanna ti langana tapno mailemmenganna dagiti mangsapsapul kenkuana. Ngem ammon ti liquidation squad ti hotel a nagtarusanna ket agturongdan iti yanna.
(Maika-9 a Paset)
KASLA nakalawlawag ti panagkita ni Agent Angelica iti agtaytayab a bala nga agturong iti umad-adayon a nagluganan ni Agent Stewart. Sharpshooter, manmano nga agmintis iti puntiriaenna. Isu ti maysa kadagiti kalaingan a pumaltog idi adda pay laeng iti Army ken uray ita nga addan iti CIA.
Ngem nagtuloy ti yaadayo ti lugan.
Nagriaw ni Agent Fleming nga addan iti abayna. Nakapigpigsa. Ken makapungtot. “You missed!” kinunana. “Ket apay ngay a ririawannak?”
“Because you’re the one who has a clear shot at the target and you missed... badly! Ipagarupko man no sharpshooter-ka?”
“I am!” makapungtot metten ni Agent Angelica. Intag-ayna ti paltogna ket sinirigna ti maysa kadagiti naka-tactical gear a kaduada. Madamdama pay, natulid daytoy. “Did I hit my target?”
Ad-addan ti riaw ni Agent Fleming. Agsisilpon dagiti agkakadakes a balikasna. “You gonna kill your own people?”
“Ammon a saan a matay...” inngernger ni Angelica. “No koma saan a nakasuot iti bulletproof vest, kasanon?” “Padasenta tapno maammuanta...” Impaturong manen ni Angelica ti paltogna iti bumangbangonen a pinaltoganna itay.
“Shut up! Stop it!” Agdaydayamudom ni Agent Fleming a timmallikud.
Sinurot ni Agent Angelica.
Narubroban ti pungtot ni Agent Fleming iti saan nga agnadnad a panagaon dagiti agkakadakes a balikas iti ngiwat ti babai. Nagpusipos a nangsango iti daytoy. “Listen, I took you in my wings because I know how good you are,“kinunana a mangarkaremkem. Nakaas-asideg ti rupana daytoy. “I even put my reputation on the line so they’ll suspend your goddam suspension... and all I want is you to show respect especially when I’m with my men, do you read that?” inridisna.
Immanges iti nauneg ni Agent Angelica. “Because I’m mad
at you. You brought me into this goddamn mission. We have a target but I don’t know him. I chased and shot at a guy that I was not even sure if he was the target.. and that’s by instinct only.”
Immanges iti nauneg ni Agent Fleming.
“And in this business, sir, we don’t kill people by instinct. We have to know exactly who the target is. And you failed to give me that information...”
Saanen a nagun-uni ni Agent Fleming. Nagsublida iti lobby ti hotel. Nagderetso ni Agent Fleming a nagturong iti likud ti opisina ti receptionist. Adda pay laeng sadiay dagiti empleado nga agbubuteng. Sinaludsod ni Agent Fleming ti yan ti surveillance room. Impatuldoda a dagus.
Sumarsaruno latta ni Agent Angelica ken ni Agent Fleming. Simrekda iti surveillance room. Dinagdagus ni Agent Fleming nga inikkat ti memory card ti surveillance camera. Insaksakna iti USB port iti nayabay a computer. Im-play-na. Nagparang ti iseserrekda iti lobby ken ti yuulida agingga iti kaaddada iti pasilio. Saanen a nasken a buyaenna dagita. In-fast forward-na agingga iti naipakita ti ladawan ti lalaki a nakadungpar ni Agent Angelica iti pasilio.
Timmakder ni Agent Fleming. “Isu dayta ti target...” kinunana sa impuligosna ti monitor tapno makita a naimbag ni Agent Angelica.
Napaumel ni Agent Angelica. Minatmatanna a naimbag ti ladawan ti lalaki. Kasano a malipatanna dayta a rupa? Mariknanan ti panaglulok dagiti tumengna.
“You know him, is that right?”
Saan lattan a makasungbat ni Agent Angelica. Kasla sumriam ketdi dagiti takiagna. Kasla mariknana manen daydi gundaway a panagkanaigda ken Sgt. Stewart. Dagiti panangal-alawna kadagiti angesna iti panagalimpatokna. Ngem saanna nga ay