Ni Auntie Merlie ken Dagiti Urnongna a “Gameng”
Adda met ragsak nga ipaay ti panagurnong kadagiti mabalin a maibilang laeng a gagangay a bambanag.
NAAYATKAYO kadi met nga agkolektar iti nadumaduma a bambanag? Kas pagarigan, adda dagitay agkolkolektar wenno agur-urnong iti sneakers laeng wenno goma a sapatos a kas koma ken ni Jordy Geller ti US nga addaan iti 2,504 a paris; wenno ni Kevin Silva ti US met laeng nga addaan iti kaaduan nga urnong a Batman memorabilia; mapan a 2,501. Agpada da Geller ken Silva a nailista iti Guinness World Records a kaaduan iti koleksion iti goma a sapatos, ken Batman memorabilia, kas panagsaganadda.
Ditoy Filipinas, manmano dagiti addaan anus nga agkolkolektar kadagiti bambanag. Isu nga idi makitak dagiti koleksion ni Auntie Merlie Abrogena Camonayan iti balayda iti Ilagan, Isabela, nakunak iti bagik a nasayaat sa no ibinglayko met daytoy kadagiti padak nga agbasbasa iti Bannawag.
Inkakaubingan ni Auntie Merlie ti agur-urnong. Inrugina ti nagurnong kadagiti nagawangan iti botelia ken lata ti soft drink a Coke. Naggapu dagitoy iti nadumaduma a pagilian a kas iti England, Argentina, China, London, Romania, Belgium,
Northern Ireland, Korea, Scotland, Germany, Japan, USA, Filipinas, ken dadduma pay.
Saan laeng a botelia ken lata ti Coke ti inurnong ni Auntie Merlie. Dagitay pay nadumaduma a kuarta- isu nga adda pay laeng kuarta ti Hapon kenkuana; dagidi nagnaganenda iti yapyap.
No selio met ti pagsasaritaan, addaan met iti koleksion dagiti nadumaduma a selio.
No coffee mug, mabalin nga isu pay ti kaaduan iti koleksion ditoy Amianan. Naggapu met laeng dagitoy iti nadumaduma a lugar.
Paglinglingayan laeng ni Auntie Merlie daytoy a panagur-urnongna. Agingga iti maysa nga aldaw, nakaawat laengen iti kiddaw manipud iti Provincial Tourism Office ken Isabela Museum & Library nga idauluan ni Dr. Alexander G. Miano a makipartisipar koma met iti eksibit iti pannakarambak ti National Heritage Month nga idauluan ti National Commission for Culture and the Arts (NCCA). Naangay ti eksibit idi Mayo itay napan a tawen iti Isabela Museum & Library ken addaan daytoy iti tema a “Pamana ng Nagkakaisang Isabeleño.”
Kadua ni Auntie Merlie a nageksibit dagiti padana a naayat nga agkolkolektar a kas kadagiti agur-urnong kadagiti antigo a banag, painting, nadumaduma a sensilio, selio, kdp.
Naipasngay ni Auntie Merlie idi Oktubre 15, 1956 iti lugarmi ditoy Caliguian, Burgos, Isabela kada agkaingungot a Santiago Gajete Abrogena ken dati a Remedios Valdez.
Nagturpos iti B.S. Zoology iti Far Eastern University, Manila, idi 1978. Kalpasan ti panagturposna, nagtrabaho iti Celmodeco, maysa a construction company iti Manila, kas Administrative Officer; sa iti Singson & Singson Law Office iti Ilagan, Isabela a kas Legal Secretary; ken iti DAR a kas Legal Officer III a nagretiruanna. Kaingungotna ni Engr. Rey T. Camonayan a taga-Ilagan, Isabela, a nagpapaay iti ISELCO 2 a kas Branch Manager agingga a nagretiro. Addaan iti dua a bunga, da John Rey ken Reymart Joseph.
Kuna ni Auntie Merlie a ti koleksion, ipalagipna met dagiti personal a paspasamak iti biag ta ti tunggal banag nga urnongen ken ipateg, addaan iti bukod a pakasaritaan no kasano a napaadda daytoy.
Ibalakad ni Auntie Merlie kadagiti mangrugrugi pay laeng nga agurnong a nasaysayaat no mangrugida laeng iti maysa a banag—uray dagitay babassit laeng nangruna no limitado ti espasio a pagipuestuan. Kas koma uray laeng dagiti nadumaduma a kaha ti posporo laeng ti urnongen. Kunana a no sika ti kaaduan iti kaha ti posporo a nadumaduma ti markada iti uray laeng probinsia, maibilangmo met daytan a maipagpannakkelmo a gapuanan—ken gamengmo a salsaluadan.—O
ken kinalailo ti tunggal maysa kadakuada. Makaanayen a liwliwana dagiti kinasam-it dagiti kanitoda a duduada. Dagiti intaktakaw a rabii iti arakup dagiti wanerwer dagiti helikopter a pumangato-a-pumababa iti base-da.
Kasla makitkitana ti mata ti babai bayat ti panangsirig daytoy iti paltogna. Saanna a tinaliaw itay nupay nakitana iti sarming. Nangemkem latta itayen ta ammona ti kinaasintado daydiay a babai a pumaltog. Sharpshooter. Kabaelanna pay ti mangdaleb iti kabusorna iti maysa a milia a kaadayona.
Nabawbawan ti sarming ti luganna ngem limmasat laeng ti bala iti abayna. Kasla di mamati. Karkarna a mapasamak dayta. Inranta ngata daytoy ti nagmintis?
Ken kasano a nagbalin a CIA? Wenno kontraktor laeng? Sibilian a mabaybayadan a mangipatungpal iti maysa a mision?
Nagsennaay. Nairanrana ngata laeng? Wenno napili a maysa kadagiti mangpapatay kenkuana?
Dina napupuotan a nagpatangkenan ti manibela. Naimayeng sa pay. Naimbag ta sininga ti nakapigpigsa a bosina. Umag-agaw gayamen ti luganna iti sabali a linia. Inaturna ti taray ti luganna.
“Son of a bitch!” imbugkaw ti maysa a motorista a lalaki a nagpainayad nga immabay kenkuana. “Stay off the road if you don’t know how to drive!”
Kinuti laeng ni Agent Stewart dagiti abagana. Ngem papananna? Paglemmenganna? Awanen ammona a kontaken. Ti sibubukel a pannakabagi ti linteg, pederal man wenno estado, agpapadada a mangsapsapul kenkuana. Sigurado a naibabawi payen ti panangsalaknib kenkuana ti US Marshall ken ti FBI. Isuda pay ketdi itan ti mangsapsapul kenkuana. Uray ti Senado, imbabawidan ti imbitasionda kenkuana nga agsaksi.
Saan met a maka-check-in iti hotel. Saan a makapan kadagiti airport. Saan a makaaramat iti credit card. Uray ti ATM-na, saanna a maaramat. Ta iti kanito nga aramatenna dagitoy, madagdagus a maammuan dagiti pannakabagi ti linteg ti yanna.
Naparasaw. Daytoy kadi ti subad ti panagbalinna a natulnog nga espia? Dusaenda gapu iti pannakapaay ti plano dagiti superior officers-na. Ket saan laeng a basta dusa. Kayatda a patayen.
Nagwingiwing. Saan a pumanaw ditoy Amerika. Sapulenna ni Deputy Adam Hutchison wenno ni Wendell Collins a dati a Director ti CIA, wenno ni Mr Bosworth nga agdama a Director ti CIA.
Maysa kadakuada ti mangsungbat iti pannakaibilin ti pannakapapatayna!
NAKATAKDER iti likud ti lamisaanna a kunam no isun ti katatayagan iti lubong. Nakatangtangad a mangipalpalawlaw iti panagkitana iti nakalawlawa a nga opisinana. Bin-ig a sarming dagiti diding ken tawana. Bulletproof ken one-way mirror— makitana iti ruar ngem di makita dagiti adda iti ruar. Naimurumor iti nakalinlinis a mahogany a diding dagiti naawatnan a pammadayaw, dagiti ladawanna a kaduana dagiti nagduduma a pangulo dagiti pagilian a nakaidestinnuanna. Adda ladawanna kadagiti naglabas a presidente ti Amerika— ni Bill Clinton, ni George Bush, ni Barrack Obama ken ti agdama, ni Donald Trump.
Kasla saan pay laeng a mamati iti napasamak iti biagna. Nabayagen nga inar-arapaapna ti agbalin a Director. Nakaatatap nga arapaap. Dandani payen insukona. Nakasaganan a mangipila iti panagretirona ngem kellaat a nagbalinsuek dagiti pasamak.
Gapu laeng iti pannakapaay ti naisayangkat a kudeta iti Filipinas!
Napaanges iti nauneg, sa napakidem. Desperado unay iti tarigagayna nga agtakem a Director. Uray arigna inlakona ti kararuana. Ken insakripisiona dagiti napateg kenkuana...
Ni John Villa, tinartarabayna. Isu ti nagbalin a maysa kadagiti magusgustuanna a field agent bayat ti panagtakemna a kas Deputy Director ti Global, Anti-Terrorist Division. Isu ti nangisangbay kenkuana kadagiti pammadayaw gapu iti anepna a nanganup kadagiti terorista. Gapu ken ni John Villa, naitantanok. Ngem iti kamaudiananna, tinallikudan ken inlakona—tapno magun-odna laeng ti akem a kinalkalikagumanna iti nabayag.
Nagsennaay, sa kimmita iti adayo. Sinarut dagiti matana ti sarming a diding ti opisinana ngem kasla awan makitana. Mariknana itan ti kasla panagkutukot dagiti tumengna. Nagtugaw. Sa imbakalna manen ti panagkitana iti tawa. Naulep ti tangatang.
Kasla makonsiensia met laeng iti inaramidna. Wenno mabuteng? Aglalo ita ta naawatda ti damag manipud iti Filipinas