‘No Touch’ ni Ivana
AGLATLATAK daytoy Ivana Alawi iti social media, ‘bagis. Gapu daytoy kadagiti ladawan ken video-na a nakapaskil kadagiti accountna. Seksi ti aruatna ket naimuttalat ti makaay-ayo a pammagina.
Ngem kuna ni Ivana, ‘bagis, nga agingga laeng iti retrato ken video ti bagina. ‘No touch’ kunana man.
Kayatna a sawen, agingga laengen iti arapaap dagiti mangaw-awis kenkuana a maki-date.
Sabagay, okey met latta ti ‘see only’, saan kadi, ‘bagis?
Ala, i-follow-mon ni Ivana ngarud.
Ang-angaw laeng.
Dayta ti kuna ti kampo ni Coco Martin iti pammabasol ni Robin Padilla a saysaywan no kua ni Coco dagiti katrabahuanna.
Segun iti kampo ni Coco, innangawda laeng ti panagsisinnayoda no kasta a nalpasen ti teypingda.
Sa sinaggaysa ti kampo ni Coco dagiti naimbag a bambanag a naaramid ti aktor kadagiti katrabahuanna kas iti panangipaayna iti pagbiagan dagitoy.
Maipalagip a ti isyu ni Robin Padilla iti ABS-CBN, posible a gapu iti panangsuportarna ken ni Presidente Duterte a nangikari iti dina panangpabaro iti prangkisa ti nasao a network.
Namunganay met daytoy personal a semsem ni PRD iti di panangiruar ti ABS-CBN iti anunsiona idi 2016. Sa napasarunuan kadagiti isyu maipapan iti di panagbayad iti buis— banag a linawlawagan met ti ABS-CBN ken uray ti BIR a mismo.
Friends laeng.
Dayta ti kuna ni Barbie Imperial no ania ti pudno a relasionda ken Jimuel Pacquaio.
Wen, ‘bagis, ni Jimuel ti inauna nga anak ni Sen. Manny Pacquiao.
Ken, wen, isu ti sigud a nobio ni Heaven Peralejo.
Adda la ket ngarud nangawag ken ni Jimuel iti “Pacboy.”—O