Kasla Dina ni Julia
NAPALALO ti panangdayaw ni Direk Perci Intalan iti akting ni Julia Barretto iti teleserye iti iWant nga “I Am U” a pagbidaan da Julia ken Tony Labrusca.
Kuna ni Direk Perci a nagadu ti ‘hugot’ ni Julia ken saan a nagamak kadagiti eksena nga adu ti innagekna.
Kas pammaneknek iti nalaus a panangdayawna iti akting ni Julia, kalikaguman ni Direk Perci a makatrabahonto manen ni Julia iti sabali pay a proyekto— nga idawdawatna a pelikula koma met.
Segun iti direktor, mamati a mayannatup ken ni Julia dagiti proyekto a thriller ta iti napalalo a kinapintas daytoy, adda kupikopna a kinamisteriosa.
Ni man Dina Bonnevie ti nangidiligan ni Direk Perci ken ni Julia, nangruna kadagiti pelikula ni Dina nga “Alabok sa Ulap” ken “Magdusa Ka.”
Narugian idi Pebrero 26 ti “I Am U,” addaan iti pito nga episode ken posible a maaddaan iti Season 2.
Kakadua da Julia ken Tony iti “I Am U” da Ina Raymundo, Richard Quan, Cedrick Juan, Kokoy De Santos, Claire Ruiz, Lander Vera Perez, Adrianna So, Yayo Aguila ken Jenny Miller.
***
Agtultuloy latta ti pasagid ni Robin Padilla iti ABS-CBN iti laksid a nagpadispensar iti nakasinnungbatna nga opisial ti nasao a network. Kalpasan a nagyaman ta naipaayan ti network iti trabaho dagiti kakabagianna a kas kada Daniel Padilla, Aljur Abrenica (asawa ti anakna a ni Kylie Padilla), da Amy Perez ken Zsa Zsa Padilla nga assideg a kakabagianna, ken ni Mariel Rodriguez nga asawana, kunana a sabali met ti kapanunotan dagitoy.
Dimmawatkami iti makuna ni Mariel ket ti sungbat daytoy, impaangawna a makatawen pay sa agsubli iti “Showtime” kas maysa kadagiti host.
Iti daytoy a sungbat ni Mariel, impapanmi a dina kayat ti makibiang pay tapno saanen a dumakkel ti isyu.—O