No Adda Sigsigloten, Adda Met Warwaren
TALLO a banag ti mabalintayo nga iboluntario wenno ibingay kadagiti padatayo a tao. Umuna ti oras (nailawlawagtayo daytoy iti napalabas a bilang). Maikadua ti kuarta. Maikatlo ti talento.
Kas kuna ti maysa a pagsasao iti Ingles, a nabulod met manipud iti Biblia, “May your kindness return to you a thousand folds.”
Kuarta
Kadagiti mabalin nga iboluntario, kuarta ti kalalakaan nga ited. Nalaka, kunak, ta alisto a masapulan.
Makunak ngarud a maysaak a milionaria iti maminribu a daras. Iti pannakaawisko a naisangsangayan a sangaili iti panangrambak ti Sinamar Youth Organization (gunglo dagiti agtutubo iti maysa a sitio ti Brgy. Abucay iti ilimi a Piddig, Ilocos Norte) iti maika-53 nga anibersarioda, nanayonan ngarud ti kinabaknangko ta nangibatiak met bassit iti regalo dagiti nagagaget nga agtutubo a kameng daytoy a gunglo.
No kuarta ti iboluntariotayo, saan a ti kantidad iti importante. Ti balor ti kuarta a naibingay ket saan nga aggapu iti kantidad no di ket iti orastayo a nangullo wenno nangged iti dayta a kuarta.
Kas pagarigan koma ni Juan ket agsusueldo iti P15,000 iti kada bulan idinto a ni Juana, agsusueldo met iti P50,000. No nangidonarda iti sagsangaribuda, asino ngarud kadakuada ti nabalbalor ti intedna?
Uray pay agpada a sangaribu ti inted da Juan ken Juana, amang a nabalbalor ti imbingay ni Juan. Apay, kunam?
No idasigtayo ken ni Juana, ad-adu nga oras ti isukat ni Juan tapno maganarna dayta sangaribu. Bale nasursurok a mamitlo iti kaadu ti oras nga isukat ni Juan tapno maaddaan iti P1,000. No agpadpada nga agtrabtrabaho iti 22 nga aldaw iti las-ud ti makabulan da Juan ken Juana, dandani P2,300 iti sueldo ni Juana iti inaldaw; P681 met ken ni Juan.
Isu a dayta sangaribu nga indonar ni Juan, para kaniak, nabalbalor nga amang daytoy ta sukat ti bannogna iti las-ud ti dandani maysa ket kagudua nga aldaw. Ket ni Juana, dayta sangaribu, matgedanna iti uneg laeng ti kaguduat’ aldaw.
Isu ngarud nga uray binting dayta idonartayo no kasta nga adda agpatulong, saantayo a tagtagibassiten ta orastayo ti intay’ insukat tapno maaddaantayo iti dayta a kantidad.
(Adda tuloyna)