Siled ti Kararag
Basaentayo ti Proberbio 3:1-10:
Agasannak, O Apo, ket maimbaganakto a naan-anay. Isalakannak ket diakto maan-ano. Sika ti idaydayawko!— Jeremias 17:14
IDI panawen ti lam-ek ti 2016, inted ti doktor ti resulta kadakami ken baketko: ti bullo ti tulangko ipakpakitana ti agduduma a tumor ti tulang. Nupay kasta, awan ti simken a panagbuteng kaniak. Ketdi, napnuanak iti talged nga addaak iti ima ti Dios ken adda planona. Iti las-ud ti 40 a tawen ti kinakristianok, nagbibiagak dagitoy a sao a paset ti nasantuan a surat: “Agtalekka iti Apo iti amin a pusom. Dika agtalek ti ipagarupmo nga ammom. Laglagipem ti Apo iti amin nga aramidmo,ket isuronanto kenka ti rumbeng a dalan” (Prob. 3:5-6). Kadagitoy a gundaway a masapulko daytoy a bersikulo.
Kalpasan ti mamindua a daras nga stem-cell transplant iti las-ud ti innem a bulan, nagdalanak pay iti walo bulan a chemotherapy. Babaen daytoy a pannakidangadang, nangaramid ti Dios kadagiti nakakaskasdaaw a bambanag— agraman panangdanon kadagiti tattao ti sangalubongan babaen ti dua a blogs iti social media a kanayon a pangipadamagak kadagiti pasamak kaniak agraman ti 1,000 a daniw ken kankanta. Pimmigsa ti bagik ket ad-adda a pumigpigsa. Kasta unay a kinamanagparabur ti Dios.
No sumangsangotayo kadagiti pakasuotan a saantayo a maawatan, mabalintayo ti agsanggir ken ni Apo Dios a mannakaawat, mabalintay nga italek iti amin a pasamak nga umay kadatayo. Mabalintayo a bigbigen ti bileg ken pigsa ti Dios kadagiti naimbag ken dakes a bambanag. Makipagna kadatayo iti ania man a banag iti managparabur a Diostayo.
Kararag: Managayat a Dios, tulongannakami a kankanayon a mangkita iti paraburmo a manglawlaw kadakami ti tunggal aldaw. Inton mabutengkami, tulongannakami nga agsanggir ken agtalek kenka a mangaramid ti pagayatam kadakami. Amen.
Kapanunotan: Kasta unay ti kinaparabur ti Dios kaniak.
Ikararagan: Dagiti doktor ti kanser.