Ti Tarakenmo ken Sika
MAPALPALIIW nga adu a taraken a pusa ti dawat a dawat iti kanenda. No dadduma, kumalbitda payen no saanda a maikaskaso. Agsardengda laeng nga agngiawngiaw no maidasaranda iti kanenda.
Ti saludsod: kasano ti kaadu ti ipakan iti taraken a pusa iti inaldaw?
Kinaagpaysona, awan ti masnop a sungbat no kasano ti kaadu ti ipakan iti tunggal taraken a pusa. Agdepende daytoy iti nagduduma a pagbatayan a kas iti kadakkel ti bagi ti ayup, edad, kabaelan ti bagina a mangtunaw iti ipaunegna a taraon, panagwatwatna, ken uray pay ti temperatura iti aglawlawna.
Malaksid kadagitoy, nagduduma pay ti sustansia nga imet ti uray agpapada ti kaaduna a taraon.
Kayatna a sawen nga awan ti maymaysa a pagrukodan iti kaadu ti ipakan iti tunggal taraken a pusa.
Kadagiti agdadamo, mabalin nga aramaten ti sumaganad a tarabay a maar-aramat kadagiti namaga a taraon ti pusa:
Kadagsen ti Pusa
5 libra (2.3 kilo)
10 libra (4.5 kilo)
15 libra (6.8 gramo)
Kaadu ti ipakan iti inaldaw
¼ tasa (30 gramo) – 1/3 tasa (40 gramo)
3/8 tasa – ½ cup (45 gramo)
½ tasa (65 gramo) – ¾ tasa (95 gramo)
Laglagipen nga inaldaw, saan nga iti tunggal pannangan, ti nadakamat iti tarabay. Mabalin a maminsan wenno mamindua nga idasar daytoy a kaadu.
Tapno saan a matikaw, nasaysayaat no timbangen a dagus ti rasion iti inaldaw para iti tunggal pusa sa ikabil iti seliado a pagyanan. No kastoy ti aramiden, maliklikan ti panangikaadu iti maipakan iti inaldaw. Saan pay nga agparikut ti tunggal kabbalay iti panagdudumada iti kaadu ti ipakanda iti pusa. Paliiwen ti kasasaad ti taraken a pusa tapno maammuan no nasken nga ikaadu wenno ikabassit ti ipakan.
Nasken pay nga ammuen no maipapaayan met laeng ti taraken a pusa iti maitutop a nutrision a maibatay iti nailanad iti etiketa ti ipakan a taraon. Nasken a nangato ti kalidad, natural dagiti ramen ken balansiado ti imet dagitoy a sustansia.
No marikna a nasken a bumaba wenno ngumato ti dagsen ti taraken a pusa, ikonsultar daytoy iti maysa a beterinario.
Ti beterinario ti mangipakaammo no adda parikut ti salun-at ti taraken a pusa a pakaigapuan ti panagbalbaliw ti kadagsen ti bagina.
Ti beterinario ti mangipatigmaan no ania ti maitutop nga aramiden tapno masungbatan ti kasapulan ti pusa.
Siguraduen pay a saan laeng a maipaay ti kaadu a kasapulan ti pusa a taraon. Nasken pay a maipaayan ti kasapulanna a sustansia a naggapu kadagiti taraon nga adda ramenna a karne.
Kasapulan dagiti pusa ti taurine, maysa a klase ti amino acid a kadagiti ayup laeng ti paggapuanna.
Dakdakamaten pay dagiti eksperto a saan koma a mapakan dagiti pusa iti gatas ta awanan ti pusa iti ensima (enzyme) a mangtunaw iti gatas. Agtungpal no kastoy ti panagsaruasarua ti ayup.—O