Panangimaton iti Pagtaengan
PUDNO a saan laeng a dagiti ubbing ken senior a kabbalay ti biktima ti pannakaikaglis, pannakaitublak, ken pannakatnag. Adu met dagiti agkabannuag wenno kapigpigsaanda ken nasidap pay laeng ti panagpampanunotda ti madundunor gapu kadagitoy a pasamak.
Daytoy ti rason a nasken a kanayon a nadalus ken naurnos amin a paset ti pagtaengan. Mairaman ditoy dagiti pasilio, dadduma pay a mapagpagnaan ken kadagiti disso a pagtrabtrabahuan.
Nasken a kanayon a nadalus ken namaga ti datar. Kadagiti pagtrabahuan a mabasbasa, nasken pay a saan nga agtalinaed ti danum; adda koma pagayusan wenno pagruaran ti danum.
No agpatakder iti balay, pilien ti maitutop a suelo a kas iti semento, baldosa wenno dadduma pay a material iti nagduduma a paset ti pagtaengan. Nagduduma ngamin ti kinatalged dagitoy a material no ti pannakaaramat ti maysa a partikular a disso ti pagsasaritaan.
Nagduduma pay ti maitutop a panangdalus kadagitoy a disso.
Saan nga agaramat iti nalanit a pagdalus iti suelo. Mabalin a nasileng ti datar ngem maparnuay met ti aksidente a pannakaikaglis.
Tapno maliklikan ti pannakaikaglis, pannakaitublak ken pannakatnag, nasaysayaat met laeng no kanayon a kitaen ken dagus a dalusan no adda dagiti saan a maliklikan wenno nairanta a tedted ti danum wenno dadduma pay a likido iti suelo.
Tayaen dagiti agtedted a danum ken mangikabil pay iti pagkaptan wenno barandilias no kasapulan.
Sukatan pay dagiti nadadael wenno napeggad a suelo wenno pagpagnaan. Ikkaten dagiti makabangen a bambanag kadagiti pasilio ken mapagpagnaan a disso. No adda dagiti saan a nalaka a madlaw a napeggad a lugar, mangikabil iti pakdaar tapno mabasa ti maisar-ong iti dayta a disso.
Padasen pay ti mangikabil kadagiti maiparabaw a pangliklik iti pannakaikaglis a nalaka laeng a dalusan.
Siguraduen nga awan rumrummuar a lansa, napeggad nga abut wenno makadesgrasia a bambanag no mabaddekan.
Saan a pagidulinan wenno pagiparabawan kadagiti nagduduma a bambanag dagiti tukad ti agdan a mabalin a pakaigapuan ti aksidente.
Siguraduen a natalged ti pakaidulinan dagiti nalaka a sumged a bambanag. No saanen a kasapulan dagitoy a bambanag a mabalin a pangrugian ti uram, ipakni wenno idulin iti natalged ken makaluban iti metal a lugar wenno inayon lattan kadagiti maibasura a bambanag.
Kas paset ti panangliklik iti uram iti pagtaengan, yadayo dagiti nalaka a kapten ti apuy a bambanag.
Yadayo wenno idulin iti nataltalged a lugar dagiti saanen a kasapulan.
Yadayo pay dagiti nalaka a sumged a bambanag iti yan dagiti dalikan. Liklikan ti pannakaisibug dagiti nalaka a sumged a likido iti pagan-anay. Dagus a suktan ti kawes no madlaw a naparsiakan iti nalaka a sumgiab a banag.
Kanayon pay a kitaen dagiti elektrikal nga instolasion tapno maliklikan ti pannakaparnuay ti uram.—O