Ti Gasatmo
PISCES (Pebrero 20- Marso 20). Sumangbay ti parabur iti panawen a di namnamaen. Paset daytoy ti gunggona gapu iti kinaalibtak ken kinapinget. Kasapulan ti kinaridam ken kinamanagamiris ita ta naingpis ti pagdumaan ti naimbag ken dakes. Adda ita suerte iti amin a maris. Nagasat a numero: 2, 5, 8.
ARIES (Marso 21- Abril 20). Saan a makadkadan ti kaha ngem makatulong ti panangilako kadagiti gamigam a saanen a kasapulan ngem adda pategna iti sabali. Matun-oyan ti inana a kalkalikaguman iti arinunos ti bulan. Makarikna iti pannakapnek no maidian ti panangidilig ti bagi iti sabali. Nagasat a numero: 3, 6, 9.
TAURUS (Abril 21- Mayo 20). Maipaayanka iti tiempo a matingiting no ania ti nasken nga ipangrunam iti agdama ken kadagiti masungad a bulan. Naamo ti gasat no ipangruna dagiti banag a kaay-ayo nga araramiden. Sumngay laeng ti sagursor iti biag no sublian ti bisio a nakaikaranukonan iti napalabas. Nagasat a numero: 1, 5, 7.
GEMINI (Mayo 21- Hunio 20). Maiturong ti imatang kadagiti nasken a leppasen ket saan a mapurar iti rimat dagiti di pay nasuot a bambanag. Maamirismo ita a saan a balligi dagiti adu nga inrugim nga aramid nangruna ta manmano met ti mairingpas. Nalaklaka a maipamuspusan ti panagballigi no nalawag ti gunggona a kayatmo a sukdalen. Nagasat a numero: 2, 6, 9.
CANCER (Hunio 21- Hulio 20). Iti arinunos ti bulan, maaddaan iti pigsa ti pakinakem a mangipinget iti ammo nga umno. Nairana ketdi nga addaka ita iti situasion ken disso a sika ti kasiglatan. Maliklikan ti pannakalmes iti sangsangabaso a balligi no siguraduen a kanayon a sibabaddekka iti daga. Nagasat a numero: 3, 4, 7.
LEO (Hulio 21- Agosto 20). Ti panagbalin a napudno iti agdama a trabaho ken iti kaayan-ayat, agbunga iti naruay a parabur. Mamatika a nakadaya iti sangom dagiti kasusudian ken kaiimasan a taraon ket saanmon a malagip pay ti tumaliaw iti sabali. Ngem dadduma, adda iti adayo ti punno ti marikna a kinakurang. Nagasat a numero: 2, 5, 8.
VIRGO (Agosto 21- Septiembre 22). Adda dagiti pasamak ita a mabalin nga ibilang ti sabali a tao a kas tubengmo ngem para kenka, pangtenneb iti kabaelam. Panagsagana daytoy iti yaay ti dakdakkel ken nadagdagsen a responsibilidad a no la ketdi usarem ti kinaimbag ken kabaelam, laklakaem nga ibaklay. Nagasat a numero: 3, 4, 9.
LIBRA (Septiembre 23- Oktubre 22). Agwanawan iti aglawlaw tapno maduktalan dagiti solusion ti parikutmo iti man tay-ak ti pinansial wenno ayat. Adda dagiti diamante a nakalemmeng iti rimmuong dagiti uring. Agaruat iti adda uritna nga asul iti ungto ti lawas; mangawis daytoy iti suerte. Nagasat a numero: 2, 5, 7.
SCORPIO (Oktubre 23- Nobiembre 22). Adda met latta ngamin tubeng wenno parikut ngem agtultuloy met ti yaay ti oportunidad isu nga agbatay met laeng kenka no ania ti kayatmo a pangisaadan iti bagim. Maysa a nabayagen a kasinged ti mamagpitik iti nailibay a pusom. Nagasat a numero: 1, 6, 8.
SAGITTARIUS (Nobiembre 23- Disiembre 20). Tiempo ti panangbigbig kadagiti tattao a makaanus kenka. Kabaelam ida ita a paragsaken iti sangkabassit a kabaelam nangruna ket saanda met a mangnamnama iti dakkel kenka. Nagasat a lawas a panangirugi iti pamastrekan. Nagasat a numero: 3, 4, 9.
CAPRICORN (Disiembre 21- Enero 19). Tiempo ti panangtingiting iti agdama a kasasaadmo— iti trabaho ken relasion. Saludsoden iti bagi no naragsakka ken no nalaka ti ar-aramidem. Ti kinaragsak, nangruna no gapu ken ni patpatgen, palakaenna amin nga aramid. Nagasat a numero: 2, 6, 8.
AQUARIUS (Enero 20- Pebrero 19). Umno unay daytoy a lawas a panangyetnagmo iti maysa a pangngeddeng no ania ti kayat iti agdama ken para iti mabayag a panawen. Maipalagip ti kuna ti maysa a kanta nga ababa laeng ti biag. Paragsaken dagiti nasken a paragsaken; aramiden dagiti nasken nga aramiden. Nagasat a numero: 3, 4, 7.