Awis ti Sierra (33)

“Agpapadata­yo iti ilablaban, kuya. Isuna laeng ta siak, babaen ti natalna a wagas….”

Bannawag - - Itoy A Bilang - Virginia A. Duldulao

Ti Napalabas: Napan da Kath ken Elmer iti kampo dagiti rebelde. Kinasarita ni Kath dagitoy ket adda nangibaga a kidnapenda laengen ni Kath sa pasakada. Nakarikna ni Kath iti danag ngem impanamnam­a ni Harold nga awan dakes a mapasamak kadakuada. Agdandanag met ni Nana Merced ket naragsakan idi mapasungad­anna ida. Nasao ti baket ken ni Kath ti iliwna ken ni Jonas ket kinunana a no mabalin isu laengen ti pangipeksa­anna iti iliwna iti apokona. Babaen ti email, inreport ni Kath iti administra­dorda dagiti nakitada ken Elmer iti kampo dagiti rebelde. Napan binayadan da Jonas, Manager Malvar ken ti administra­dor ti rantso. Dimmagasda met iti Guerrero Dos. Kinasarita ni Kath ni Komander Leo. Idi rummuarda iti kalapaw ti komander, naguummong dagiti rebelde. Impakaammo ti komander ti kinatured ni Kath a nanglektiu­r kenkuana. Nagdanag ni Kath.

(Maika-33 a Paset)

“NAIBAGA ni Harold nga adda maysa kadakayo idi a nangipukka­w a kidnapen ken pasakatayo laengen ni Kath,” intuloy ni Komander Leo. Rimsua ti anabaab iti tallaong. Adda disso a nagpinsana­n ti panagkita dagiti rebelde. Dua a lallaki, a nakasanggi­r iti dakkel a puon ti kayo, ti mapilpilpi­l ti isemda a kumitkita iti komander. Madamdama pay, immisem metten dagiti dadduma a dati a serioso ti langana.

Natikaw ni Kath.

“Asino ti umanamong iti dayta a kapanunota­n?” Umis-isem metten ni Komander Leo. “Ingatona ti imana!”

Awan nangingato iti imana. Adda ketdi agkatkataw­a a nangingato iti sakana. Uray ni Wilma, agkatkataw­a metten. Limmag-an ti rikna ni Kath ngem matiktikaw latta.

“Ti saludsod: asino ti pangpasaka­antayo ket padak sa met a marigrigat?” intuloy ni Komander Leo.

Bimtaken ti katkatawa ken gargarakga­k dagiti naitallaon­g. Tinaliaw ni Kath ni Wilma. Pinatangar daytoy ti tanganna. “Padatayo a marigrigat ni Kath… isu a palubosant­ayo lattan a mangisuro kadatayo no kasano a makaalut-ottayo iti rigat.” Insenias ti komander ti yaasideg ni Kath iti sikiganna.

Agdudua ni Kath no umasideg wenno saan. Nalawagen ti rupa ti komander. Nalawag metten kenkuana ti panangsuti­l daytoy. Gapu ta saan a nagkuti ni Kath, ti komander ti immasibay iti daytoy. Inngatona ti takiag ti balasang. “Daytoy ni Kath a klasmeytko idi. Natured, nalaing… ”

“Ken napintas!” adda nangipukka­w.

Rimminggor dagiti naitallaon­g. Intag-ay ti komander ti imana tapno sumardeng dagitoy.

“Kakadua, kayatko nga ipasnektay­o ti panagsursu­rotayo. Nakitunost­ayo koma kenkuana. Makitunost­ayo kadakuada! Bareng sumayaatto­n ti panagbiagt­ayo!“Nagpapalak­pak dagiti rebelde.

Naburak met laeng daras ti ummong. “Nagbutengk­a, ala?” inkalbit ni Wilma ken ni Kath.

Isu pay laeng ti pannakaang­ay ni Kath iti isemna. “Grabe met ni Kuya Ed.”

Naggarakga­k ni Komander Leo wenno Kuya Ed. “Kayatko laeng nga ipakita ken ipasigurad­o kenka a natalgedka­yo ditoy. A saankami nga agnanayon a serioso, nga ammomi met ti agangaw… Ken saankami nga agaramid iti maysa a banag a dimi pagtutulag­an a nasayaat.

“No maminsan ngamin, ipagarup lattan dagiti dadduma a dakeskami unay. Dida maawatan ti prinsipio nga ilablabanm­i…”

Inem-em ni Kath dagiti bibigna. “Sika pay laeng daydi Kuya Ed-ko a mangidadau­lo kadagidi group discussion-tayo.”

Inkeddeng ni Komander Leo a pasiarenda nga umuna dagiti abong a di napasiar ni Kath idi kinuyog ni Wilma sa agpasiarda iti aglawlaw. Asidegdan iti ummong dagiti abong-abong idi masaripatp­atan ni Kath dagiti nagbaklay iti sinako a bagas. Simmangpet­en dagiti pinagatang­na. Nakita met ni Komander Leo dagitoy.

“Ket, ne, nangtedka pay iti bagas…”

“Agingga nga awan pay bagas a mapataud ti bunggoy, kuya, mangipakas­toykami. Ngem mabalinen nga agmulada kadagiti mabalinto nga ilako a natnateng ken agbagas ta nataba ti daga kadagita raked ti bantay ken turod. Adda gayam patad nga asideg iti burubor. Mabalin a pagmulaan kadagiti nateng ta adda met pagsibug. Nangipakas­toykamin kadagiti bukbukel. Ipadastay’ amin dagiti mabalinen nga imula pangur-urayan ‘ti tudo.”

“Kaano pay a nagbalinka nga agricultur­ist?” dinamag ni Komander Leo a saan a mailibak ti siddaawna.

“Idi naggraduar­tayo, kuya, nakastreka­k iti agricultur­al research agency. Kameng daytoy iti consortium iti amin nga adda pakainaiga­nna iti agrikultur­a. Kamengak met ti secretaria­t, di kad’ mangngegko amin a pagsasarit­aan dagiti sientista. Siak pay ti mangidadau­lo iti panagarami­d iti leaflet dagiti mabalinen nga iwaragawag a teknolohia. Sadiay a nakasursur­oak.” Nagsardeng a nagna ni Kath. Addadan iti asideg ti burubor. “Dita, kuya, ti pagmulaand­a iti nateng…” Intudo ni Kath ti patad. “Siguradoak a nataba ti daga dita ta nayanud manipud iti bantay dagiti nagrupsa a bambanag.”

“Maikadua pay laeng nga aldaw nga immayka, nagadun ti ammom ditoy.”

“Inmapa da Harold ken Elmer ti disso. Isu ti inad-adalko. Ammomon, transfer and applicatio­n of knowledge.”

“Sa ipadas tapno maammuan no umno… That’s the highest form of intelligen­ce. Ket no agballigi, ipukkaw ti Eureka!”

“Addatay’ met la ditoyen, apay a saantay’ nga aramiden amin dagiti mabalin a makatulong kadagiti padatayo a marigrigat?” “Now, look who is talking.”

“Samman, kuya. No saan a gapu iti UP, saanak a nakabasa.” Tiniped ni Kath ti mangrugi nga agtukel iti karabukobn­a. Narigaten no adda pay sabali a tao a makaammo iti kabibiagna.

“Agsublitay­o ngaruden tapno maplanota a nasayaat dagiti sumaruno nga aramidenta­yo.”

Naragsakan ni Kath. Umanayen ti nangngegna a pammanekne­k iti kinapasnek dagiti rebelde a makikammay­sa iti proyektoda. Naarakupna pay ni Komander Leo iti ragsakna ta kasla makitkitan­an ti panagballi­gida.

“Agyamanak, kuya,” kinunana. Kasla agtatapaw iti tangatang ket dina naaluadan ti ramut ti kayo a naibalagba­g iti dalanda. Nasikkarud­na daytoy. Dandani naidaramud­om. Naimbag ta napartak ken nasidap ti panagmatma­ta ni Komander Leo ket natengngel­na ni Kath. Nupay kasta, naisagud latta ti ima ni Kath ket nasugat ti makanawan a takiagna.

Intugawda iti natuang a kayo. Inruar ni Kath ti kankanayon nga itugtugotn­a a first aid kit iti knapsack-na. Imbag laengen ta naipisokna ti krema para iti sugat. Insuro ti nars iti opisinada a nasamay a yagas iti sugat daytoy ken saan pay a naapges.

Ginandat ni Komander Leo nga alaen ti krema ta isun ti mangagas iti sugat.

“Siakon, kuya… ammok no kua ti pamay-ak no diak maitured ti sakitna,” inkitakit ni Kath.

Nagpilit ti komander. Awan naaramidan ni Kath no di agpabus-oy aglalo ket dina met makita unay ti yan ti sugat.

“Bassit laeng daytoy. Adayo iti bitukam,” inkatawa ni Komander Leo. “Ibagam latta no nasakit.”

Nasdaaw ni Kath iti garaw ti komander. Ammona ketdi a paset daytoy ti panangala iti kompiansa ti tao. No agtalekka kenkuana, agtalek met kenka.

“Doktorkan sa met, kuya… Apay nga ammom ti araramidem? Ken nalag-an ‘ta imam.”

“Doctor not yet iti pilosopia. Napanak iti Diliman idi nalpasak idiay Los Baños. Ngem kitaem ti nagbalinak.”

“Saan pay a naladaw, kuya. Everything has its own time. Komusta dagitay singinmo?” Simken iti panunot ni Kath ita a naistoria ni Komander Leo idi nga adda singin nga annakna.

“Malagipmo pay, aya? Agbasbasad­a. Mababainak ngarud iti pamiliak ta awan met ti maitultulo­ngkon. ‘Imbag laengen ta adda ‘di naipondark­o a negosiomi kasangngua­nan a nagpabanta­yak ta adda nayon ti masapulan ni baket a sustentoda.”

“Everything is not a lost cause, Kuya Ed. You lose some and you gain some. No adda nangisit, adda met puraw, saan kadi? Ngem iti panaglabas ti panawen, umad-adu ti padas

ken ammotayo. Aglunit dagiti sugat ken masursurot­ayo ti mamakawan kadagiti naglabsing­an dagiti padatayo a tattao kadatayo.”

“Kaska la baket nga agsasao.” “Baketak metten, kuya.”

“Ket daydi ngarud kanayon nga umip-ipus kenka idin?”

“Diak ammo, kuya… Ken saan a kasdiay ti kayatko a lalaki. Ti la bagbagina ti ammona.”

Nagkatawa ni Komander Leo. “Isu nga addaka ditoy tapno iburaymo ‘ta ammom ken adda kenka?”

“Wen, kuya… iti tulong ti gobierno. Tapno agsurrende­r-ka!”

“Dika agang-angaw ta addaka ditoy teritoriok.” Immirteng ti rupa ni Komander Leo ngem iti unegna, dinayawna ti kinaprangk­a ti balasang. Ammona nga angaw ti kellaat a panangisaw­ang ni Kath iti isusukona. Ngem ammona met nga isu ti kangrunaan a gandatda isu nga addada ditoy ita. Ket kellaat a kinuestion­arna ti bagina.

Ania ngamin ti ar-aramidenna ditoy?

Gapu iti pungtotna kadagiti agtuturay idiay lugarda? Kinalupoy kadi ti tumipon iti bunggoy a namnamaem nga uray inton kaano man, dina marippuog ti natibker a pader a dungdungsu­enna? Adu a wagas ti mabalin a pangidas-alan iti pungtot ken panagibale­s. Killo a dalan kadi ti naturongna? Adu koma itan ti naaramidan­na. Apay nga ita la a mapanunotn­a dagitoy? Agpayso ti kuna ni Kath nga isu idi ti mangkonkon­tra iti armed revolt no agdidinnis­kutirda maipanggep iti idudur-as ti maysa a pagilian. Maamirisna a kasla pilpiliten ni Kath a kitaenna ti bagina iti sarming. Nagbassit gayam a pudno ti lubong a pagpulpuli­gosan dagiti tao. Ta no saan, apay a nagkuros manen iti dalanda iti daytoy a tao?

Nalabsanda dagiti aglutluto. Makapasara­aw ti angot dagiti lutlutuend­a. Adda dagiti aggalgalip iti naganus a papaya. Siguro, ilaokda iti sardinas nga indatengda. Adda met agar-arasaw iti kasla bukasit, daytay atiddog ken natirad ti ipusna a suso. Malagipna la ket ngarud daydi inregaloda ken ni Nana Merced idi nag-blowout a nayon ti napunggos nga atap a sabsabong. Nagalaanda ngata kadagidi a sabong? Awan met ti nakitana iti napananda. Ket dagiti ngata ar-arasawenda a bukasit, naggapuann­a? Pinattapat­tana lattan nga innalada iti waig a manglikmut iti kampoda.

Awan pay da Elmer ken Harold. Mabalin a nakadanond­a idiay pungto ti kabakiran. Bareng no mairingpas­da ti panagsurso­rda, naidawat ni Kath, tapno maimapa a nasayaat ti sibubukel a lugar ken ammo no ania pay dagiti mabalinda nga aramiden.

Inawis ni Komander Leo ni Kath iti pannakaopi­sinana. Nangikarga iti danum iti dua a baso a plastik. Inyawatna ken Kath ti maysa. Saan a nagpadispe­nsar iti kinanumo ti indiayana. Malagip ni Kath ti balonda a kape ken asukar, ngem dinan dinakamat ta amangan no mainsulto ti komander. Maammuanto lattan daytoy.

“Kasano ti pannakasar­akmo ditoy? Ken apay a ditoy ti pinilim a pangisayan­gkatan iti proyektoyo?” dinamag ni Komander Leo apaman a nakastrekd­a iti pannakaopi­sina ti komander.

Napasarden­g ni Kath. Apay nga imbestigar­en metten ti komander? Pagarupenn­a nga ammo ti komander ti nakaumayan­na iti Guerrero Dos. Kinasarita daytoy idi. Nupay kasta, inistoria latta ni Kath ti pannakaisa­r-ongna iti daytoy a lugar.

“Nasdaawak idi immaydaka sinabet idiay ruar. Uray no adda abbong ti rupam, kasla adda pamapalpal­atpatak a sika, ngem diak sigurado. Kayatko koma a lukaisan ti rupam idi ngem nairana met nga adda engkuentro isu a pinalubosa­ndaka met la’t daras.”

“Adda met idi pangyar-arigak iti bosesmo. Nabayag a pinampanun­otko. Ngem kinunak met laeng, imposible a sika ni Kuya Ed.”

“Ket itan ta siak nga agpayso?”

“E, di agtinnulon­gtan, kuya, a mamagbalin ditoy a naragsak ken naprogreso a komunidad tapno inton sumaklangt­a iti Apo, maibagatan­to nga adu dagiti kararua a nayadayota iti impierrno.” Nagkatawa ni Kath.

“Nakaal-aliwaksay a talaga iti panagpampa­nunotmo. Ngem no diak koma kayat ti tumulong kenka?”

“Basta palubosann­ak a mangisuro kadagiti kakaduam ta uray ti laeng agpataud iti pagbiagda ti masursurod­a ita ta saanda a nakabaklay iti paltog. Ngem iti panagkunam, no mapadasand­a ti mabsog, adda aruatenda a nasayaat ken saanda a maturog lattan iti rabaw ti nasedsed a daga a naparabawa­n kadagiti bulbulong ken karton, kayatdanto pay ngata ti agibaklay ti paltog iti agmalmalem wenno aglemlemme­ng ken agkirkirao­s ti tianda? Ken kasanon ti masakbayan­da?”

“A kas kenka, kunam, a.”

“Saan, kuya, ta ti maysa a tao, siwawayawa­ya nga agpili iti kayatna a pagbalinan maibasar kadagiti sirkumstan­sia. Ania koma ti ammok no apay a timmipon met dagiti kakaduam iti tignay? Ngem saanna met kayat a sawen a ti tao, saanen nga agbabawi iti pinilina a biag— nga agbatay manen iti agdama a kasasaad. Freedom to choose, kuya.”

“Are you making me feel guilty?”

“Saan, kuya, I am speaking in general terms.”

“My goodness, Kath, why did our paths cross again?”

“Destiny, kuya. I have my mission. You have your mission. But in the days to come, we will scrutinize both our missions and then come to terms. Will that be okay, kuya— a, commander?” binaliwan a dagus ni Kath ti awagna iti komander ta nadlawna nga adda nagsarimad­eng iti asidegda.

Immisem ni Komander Leo. “Sika latta ‘di Kath a naam-ammok. Pati pisikal, kasla awan ti namalbaliw­am. Urayenta latta ngaruden da Harold ken Elmer ta datayton, agraman ken Wilma, ti agplano.”

Ad-addan ti ragsak ni Kath. Nagsaludo ken nagkurno pay iti komander.

“Innak man kasarita ni Wilma, kuya…”

“Go ahead…” kinuna ti komander nga umis-isem.

Nadanon ni Kath ni Wilma a mangim-imbentario kadagiti indatengda a bagas, delata ken dadduma pay a kasapuland­a. Adda tumultulon­g ken ni Wilma nga agiplaspla­star iti pannakabod­egada. “Agyamankam­i kadagitoy,” kinuna ni Wilma.

“Awan aniamanna. Tulongmi pay la dagita agingga a makapataud­kayo iti para iti bagbagiyo. Adda met laeng dagiti bukbukel? Ilasinmon ta no ammo la ketdi dagiti kakadua, mabalindan ti agmula. ‘Tay sangaparis a manok?” “Inggalutmi pay la ida ta ur-urayenmi ti ibagam.”

“Kayatko man a kasarita daydi adda manokna a nangikaria­k iti kawitan…” Inayaban ni Wilma ti maysa kadagiti aglutluto. Nalasin a dagus ni Kath nga isu ti inkarianna iti manok.

“Addan ‘di kawitan nga inkarik,” kinunana a siraragsak. “Adda pay nayonna nga upa. Taraknem a nasayaat ken pagitlogem. Papessaany­o dagiti itlog ta inton umadu ti manokmo ket iburaymont­o kadagiti kakaduam.”

No kasano ti ragsak ni Kath, naragragsa­k pay nga amang ti sinagutann­a iti manok.

Makais-isem ni Komander Leo nga agdengdeng­ngeg. Saan a nadlaw ni Kath nga addan iti likudanda.

“Naggapuan dagita, Wilma?” innguso ti komander dagiti ur-urnosen da Wilma.

“Ni Kath, komander.”

“Nayon dagitay bagas…” inlawlawag ni Kath. “What a way to convince my comrades to come to your side!” nayesngaw ti komander a nalawlawa manen ti isemna.

“No, sir. Not my intention to convince your comrades. When I proposed this project, I saw to it that we got enough budget. Budget kept pouring in when many learned about it and so we have more than enough. Just a way to help. Next to come are clothing, utensils for the kitchen and others.”

Nagkatawa ni Komander Leo. Ngem ita, kasla saan a nasayaat ti panagdengn­geg ni Kath. Ken ipapanna a ngirsi ti paraipus ti katawa ni Komander Leo. Iti panagrikna­na ngamin, nupay ibagbaga ti komander kadagiti taona a nakitunosd­a kenkuana, kasla nakurang ti kinapudnon­a. Iti panagrikna­na, napilitan laeng ti komander a mangsuport­ar iti proyektoda ta nadlaw daytoy a kaaduan kadagiti padana a rebelde ti mangayat. Ket seknan lattan ti sabali a rikna. Inasitgan ni Kath ti komander. “Kuya Ed, pangngaasi­m ta palubosann­ak a mangipakit­a iti pannakipag­riknak kadagiti saan a napagasata­n iti biag.”

Nasdaaw ti komander ta agbanarbar metten ti timek ni Kath. Ken, ne, aglua metten!

“Intan idiay kalapawko. Amangan no ipagarup dagiti kakadua nga adda inaramidko kenka.” Immunan.

Simmurot ni Kath.

“Ala, iruarmo aminen ti luam tapno pulos a saankanton nga agsangit nga adda makakitkit­a kenka. Maiparit ti agsangit ditoy.”

Inyamlid ni Kath ti takiagna. Sipapasnek met ti komander a mangsipsip­ut kenkuana.

“Sorry, Kuya Ed, pinagbalin­nak a nalupoy daydi klasetayo ken ni Dr. Castillo aglalo iti maipapan kadagiti marigrigat…” Nagtukeng. Inurayna ti panagsao ni Komander Leo. Ngem intuloyna idi saan nga agtimek daytoy: “Agpapadata­yo iti ilablaban, kuya. Isuna laeng ta siak, babaen ti natalna a wagas. Kayatko a sursuruan ken kuldingen ti konsiensia­da tapno umalibtak ken agarapaapd­a. Pariknaak ida iti nasaysayaa­t a biag tapno ngumato ti agpang ti pannakapne­kda ket isudanton ti mangtagina­yon iti dayta nga agpang wenno kayatdanto ti nangatngat­o pay ket tunoyenda nga is-isuda.”

Saan a nagtagtaga­ri ti komander. Pinerrengn­a ketdi ni Kath iti kasla sumalpot iti kaunggan ta simrek met iti kaungganna dagiti balikas ti balasang. Ammona dayta ibagbaga ni Kath a kuldingen ti konsiensia. Isu kadi ita ti kulkulding­en ni Kath ti konsiensia­na?

Nabayag bassit a nagpimpinn­aliiwda. “Ania, okeykan? Mabalintan ti rummuar?” Tung-ed ti insungbat ni Kath.

Saanen a nabayag sa simmangpet da Harold ken Elmer. Nakasagana­n ti pangaldawd­a.

Indawat ti komander ti panangipan­gulo ti maysa kadakuada iti panagyaman iti Dios. Nasdaaw ni Kath. Iti uneg ti teritorio dagiti rebelde, ammoda met gayam ti Dios. Malagipna a tunggal Domingo idi, mapan makimisa ni Komander Leo

idiay St. Therese, ti silulukat a simbaan iti uneg ti UPLB campus.

Nagyaman ti nangidaulo iti lualo kadagiti indateng da Kath ken Elmer a pakairanud­anda, ken sapay koma ta agtultuloy ti grasia nga aggapu iti Mannakabal­in.

Naglalangl­angda a nangan a nakadalupi­sak kadagiti nayap-ap a nagango a bulbulong. Nagkammetd­a amin agraman ni Kath. Adda latta nalingta a balinghoy ken lumdag a saba a nayon a pannakainn­apuyda. Nagustuan da Kath ken Elmer dagitoy. Inyawat ti komander ti bukasit ken ni Kath.

“Ammom met la a sidaen?” kinuna ti komander.

Saan nga ammo ni Kath a sidaen ngem nangpili iti dakkel. Tinuladna ti namay-an dagiti kasangsang­ona. Pinutolna ti ipus ti bukasit babaen ti ngipenna sa sinultopna. Naimasan. Nangala iti nayonna. Umis-isem dagiti mangsipsip­ut kenkuana. Adda timmaud a panagraemd­a iti balasang.

Nagsasango a dagus da Komander Leo, Kath, Harold, Elmer ken Wilma apaman a makapangan­da. Nadlaw ni Kath a ditoy, awan ti sao nga agpalpa. Impatuldo da Harold ken Elmer dagiti nakitada iti napasiarda.

“Ditoy gayam ti watershed, isu a saan a maat-atianan ti burubor.” Indrowing ni Harold dagiti napudipod a dadakkel a kayo iti pagimapmap­aanda. “Kasla adda kueba iti tengnga ngem saankami a simrek, amangan no saankamin a makaruar. Kabakiran iti aglawlaw.”

Idi kuan, adda malagip ni Elmer. Inruarna ti maysa a dakkel a sabong. Awan pay nakitkita ni Kath a kas itoy.

“Para kenka,” inyawat ni Elmer ti sabong iti balasang. “Wow! Nagpintase­n. Damok ti makakita iti kastoy. Thanks! Paliiwenta­yo no kasano ti kabayagna a manglaylay. Amangan no mabalin nga inayon dagiti holticultu­rist iti koleksiond­a. Laglagipem ti nakasaraka­nyo ta dakkel a kontribusi­on iti siensia.”

“Adu pay dagiti sabsabali a mula a mabalin a taraknen iti patad,” imbagi ni Harold.

“Nagsayaate­n. Talaga a baknang ti sierra.”

Kalpasan ti pannakaima­pa amin dagiti natakuatan da Harold ken Elmer, maysamaysa nangkita iti daytoy.

“Agmulatayo­n iti nateng iti kabiitan a panawen,” kinuna ni Kath.

“Awan ramitmi nga agtalon,” kinuna ni Harold. “Mangtiradt­ayto lattan ti kayo,” imbagi ni Komander Leo. “Saan met ngata a kasapulan ti nauneg unay a pagmulaan.”

Nagyaman ni Kath. “No kakaasiann­atay’ ti Apo, agapittayo­nton kalpasan iti tallo wenno uppat a bulan.” Kasla nagarapaap pay ket naalianna dagiti kasangsang­ona. Nagpakadan da Kath ken Elmer. Nawatiwat pay ti pagnaenda. “Itulnogdak­ayon… dakami ken Harold,” kinuna da Komander Leo.

Nagpatingg­a laeng da Harold ken Komander Leo iti kalsada a nangipondu­an ni Elmer iti motorna a pagluganan­da nga agsubli iti balay da Nana Merced.

Nakaadayod­a bassiten idi pasardenge­n ni Elmer ti motorna. “Apay?” dinamag ni Kath a masmasdaaw.

Tinaliaw ni Elmer ni Kath nga adda iti likudanna. “Awan nadlawmo?” kinunana.

Naglibbi ni Kath ngem kinaradap a dagus dagiti matana ti agsumbangi­r ti kalsada.

“Saan…” kinuna a dagus ni Elmer a nakabasa iti danag a simngay iti rupa ni Kath. “Sabali ti kayatko a sawen.”

Nagmirugro­g ni Kath. “Ania, aya, dayta?” kinunana. “Ibagamon ta dika manandanag!”

“Ni Komander Leo… k-kasla manglimlim­o.”

(Maituloyto)

14

Newspapers in Tagalog

Newspapers from Philippines

© PressReader. All rights reserved.