Ni Angel a ‘Darna’ iti Pudno a Biag
TRENDING iti social media dagiti ladawan ni Angel Locsin a mangipapaay iti tulong kadagiti biktima kadagiti nadumaduma a kalamidad.
Timmapog iti layus tapno matulonganna dagiti dinidigra ti bagyo nga Ondoy (2009) ken ti
storm surge a Yolanda (2013), karaman kadagiti nangipaay iti tulong kalpasan ti nadara a ranget iti Marawi (2017), ti ginggined iti Mindanao (2019), ken ti panagbettak ti Bulkan Taal (January 2020), ken iti COVID-19.
Kasta met a nairaman kadagiti ladawanna ti panangipingetna iti kasasaad dagiti napukawan iti trabaho nga empleado ti ABS-CBN (a saanen a napabaro ti prangkisana).
Kinapudnona, adu pay ti kurang dagitoy a ladawan. Nakapkapanen ni Angel kadagiti nasusulinek nga away tapno agitulod iti tulong. Ammomi dagitoy ta idanon met no kua dagiti makaam-ammo ken ni Angel, nupay di kayat daytoy a maiwaragawag pay.
Ti nakaay-ayat laeng, dagiti mismo a tattao no kua a natulonganna ti mangipaskil iti social media.
Malaksid kadagitoy, adu ti istoria dagiti nakatrabuanna a tinultulonganna a kas iti panangyabagana iti bayadan dagiti naaksidente wenno nagsakit.
Kunada ngarud nga isu ti Darna iti pudno a biag. Tumultulong uray no awan iti sango ti kamera.
Para iti rekord, inako ni Angel nga awan ti planona a sumrek iti politika.
Iti Disiembre 2019, maysa ni Angel kadagiti 30 nga Asiano a nairaman iti Forbes Asia’s Latest Heroes of Philanthropy.
* * * Nakaragragsak ni 2015 Miss Universe Pia Wurtzbach ta nakaduana met laeng ti pamiliana iti United Kingdom.
Manipud ngamin naideklarar ti lockdown agingga iti napalukayan ti community quarantine iti Metro Manila, napupok ni Pia iti condo unit-na iti Taguig. Saan a rimrimmuar ta malaksid a nagan-annad, saan met a normal ti operasion dagiti eroplano.
Iti account-na iti Instagram, madlaw ti naidumduma a ragsak ni Pia babaen dagiti naipaskil a ladawan ken video.—O