No Adda Sigsigloten, Adda Met Warwaren
SAPSAPARENTAYO agingga ita ti angol wenno pandemia a coronavirus disease (COVID-19). Gapu met iti daytoy makaakar a sakit, aglalo a naiparikna kadatayo ti kinapateg ti salun-at.
Stem Cell
No salun-at ti pagsasaritaan, adda latta bentahe ‘tay ad-adu ti kuartana. No ad-adu ti kuartam, di kad’ kabaelam a bayadan ti serbisio dagiti kalalaingan a doktor ken kapipintasan nga ospital, ken gatangen dagiti kasasamayan nga agas.
Mano a tawenen ti napalabas, naikuyogak iti maysa a grupo dagiti periodista a napan nangbisita iti maysa a idi a naka-hospital
arrest a politiko iti pagiliantayo. Iti pananguraymi iti pangrabiimi— ta sinagailinakami ken pinangrabiinakami—kinomustami met ti pamiliana ken ti salun-atna. Naibagana nga adda kano linawas nga
stem cell treatment-na nga inawaganna iti, “The poor man’s stem cell.”
Nakunana a poor man’s version ta ‘tay kano sag-PhP 5,000 laeng.
Para iti daytoy a politiko, daytoy a kantidad a linawasna a gastuenna para iti stem cell therapy-na ket para iti “poor man.” Ngem para iti maysa a marigrigat, mabalin a dayta a kantidad, nasuroken a pangbiagna iti pamiliana iti las-ud ti makabulan.
Tiis-Ganda
Nangngegmo kadin ‘tay pagsasao a, “Tiis-ganda”? Iti naminsan a panagbasbasak kadagiti artikulo maipanggep iti panagpapintas, nabasak man ti EMSculpt. Maysa daytoy a medical device nga usaren dagiti lisensiado a doktor tapno mapairteng dagiti piskel aglalo iti takiag, pus-ong, ken patong dagiti pasienteda a mangayat, kas pagarigan, ti maaddaam iti abs iti kapapardasan a panawen. Kunada nga iti maysa a sesion ti EMSculpt, kasla mamin-20,000 a nag-arm curl wenno sit ups-ka koma.
Ket kayatko met, a kaka, ti maaddaan iti muscle definition aglalo ditoy takiagko. Nag-research-ak ngarud no mano daytoy EMSculpt. Ayna, nangina!
Para iti maysa a takiag a rekomendado a dumalan iti uppat a sesion, PhP15,000 ti maysa a sesion.
Isu a dagus a napanko binirok tay dumb bell sets-ko. Anusak pay laeng ti ag-manual arm curl ta awan met kuartak a PhP120,000 a pangpapintas kadagiti takiag, pus-ong ken patongko. Anusak pay laeng ti ag-arm curl iti mamin-55 iti kada maysa nga aldaw.
Isu a dagitoy a bentahe ti adda kuartana ti mangted, no dadduma, iti ganaygaytayo nga agtrabaho. Wen, no dagiti importante iti biag ti pagsasaritaan, awan unay kaes-eskanna dayta panagpapintas. Ngem no kabaelan, apay ketdin a saan, di ngamin, kaka?