Panangimaton iti Pagtaengan
MAYSA kadagiti mapukpukaw a tagipatgen iti moderno a panagbiag ti saanen a kankanayon a panaggigiddan dagiti kameng ti pamilia a mangan.
Maigapu daytoy kadagiti agrurutap a pakakumikoman ti tunggal kameng ti pamilia.
Kaaduanna kadagitoy dagiti aramid dagiti ubbing iti pagadalan, pakakumikoman dagiti nagannak a mainaig iti trabaho ken uray kadagiti sabsabali pay nga aramid dagiti ubbing iti ruar ti pagadalan.
Adda umuna, adda met maudi a mangan. Mangan ti mabisin, saan ti saan.
Napateg unay iti panagsasango dagiti agkakabbalay iti panganan. Gapu iti daytoy, nasken nga ikagumaanan dagiti inna a paset daytoy ti inaldaw nga aktibidad ti pamilia, uray no maminsan laeng iti tunggal aldaw wenno uray sagpaminsan iti tunggal lawas no saan a mawayaan ti panagsasango iti inaldaw.
Adu dagiti pagsayaatan ti kankanayon a panagsasango dagiti kameng ti pamilia iti panganan, iti man pammigat, pangngaldaw wenno pangrabii.
Maysa kadagiti pagsayaatan ti panagsasango dagiti kameng ti pamilia a mangan ti ad-adda a panangimas dagiti agsasango iti maidasar a taraon.
Iti sabali a pannao, ad-adu ti makan dagiti agsasango a mangan ngem no saggaysa wenno no saanda nga aggigiddan a mangan uray no nateng wenno simple laeng dagiti taraon a maidasar.
Adu pay dagiti nasayaat a mapagsasaritaan kabayatan ti saan a makarkarintar a pannangan.
Ad-adu pay ti makan dagiti ubbing a napili ti kanenda ta maallukoyda a mangipauneg kadagiti naidasar a nasustansia a taraon.
No agsasango dagiti kameng ti pamilia a mangan, mapabileg ti panagsisinningedda. Makatulong daytoy tapno maparnuay ti panagtalek ti tunggal maysa ken uray iti bukod a bagi dagiti ubbing.
No agsasango dagiti nagannak ken dagiti ubbing, masurusuran pay dagiti ubbing iti urbanidad iti panganan.
Agtungpal pay daytoy iti panangamiris dagiti ubbing iti kinapateg ti panagsingsingpet.
Kas maysa a pamilia, pagsasaritaan pay dagiti potahe a maidasar iti tunggal lawas.
Dakamaten met dagiti ubbing iti pannakaisagana dagiti magatang a taraon.
Allukoyen pay dagiti ubbing a tumulong iti pannakaisagana ken iti pannakaidasar ti taraon.
Saan a luktan ti telebision ti panagsasango iti panganan tapno maipasnek dagiti adda iti lamisaan ti makapagsasarita.
Awisen pay dagiti ubbing a tumulong nga agipakni kalpasan ti pannangan.—O