14 Ti Puga (13)
“Ti kadadaksan, mabalin a maisaklangak ken mapaneknekan a nagbasolak babaen ti panagtestigo dayta nga Stewart!”
Ti Napalabas: Imbilin ni Direktor Bosworth ti pannakapapatay da John, Daniel ken Jerky ngem nakalasat da John ken Daniel. Tapno saan a makapagtestigo iti Senado ni Agent Stewart, inkeddeng met ti Direktor a matay. Dinutokanna da Agent Fleming ken Agent Angelica a manganup. Nanglimlimo ni Agent Stewart ngem nalasin latta ni Angelica ket sinidirna ni Agent Angelica ni Agent Fleming iti di panangibaga daytoy a ni Agent Stewart ti target-da. Nagdanag met ti mayor idi maammuanna a pinuoranda dagiti Intsik a nangraut iti balay ni John. Immawag ni Agent Angelica ken ni Agent Stewart ket na-trace-da ti yan ni Agent Stewart. Iti imon ni Agent Fleming, dina nakontrol ti luganda ket naidungparda iti kayo iti ngarab ti derraas. Nakaispalda ta adda nangtulong kadakuada. Napalusposanda manen ni Agent Stewart ket napalalo a busor ni Agent Fleming. Mapanen ni John iti Amerika ket imbilin ken ni Daniel ti pamiliana. Addadan iti dalan idi patulodan ni Rudy iti ladawan ti ulitegna a mayor a kagrupo dagiti Intsik. Nasdaaw idi ibaga ni Rudy kayat a balsen ti TRIAD.
N(Maika-13 a Paset)
AMULENGLENGAN ni John ti inana. Wen, kaano nga agpayso nga agpatingga ti pannakaipangta ti biagda?
“Agnanayon kadi daytoy, anakko? Awan kadi ti panagulimektayo?”
“Mom, agsardengto. Agtalnanto met laeng ti biagtayo. Pupuotem ti saok.”
“Kaano? Inton matayakon a kas iti napasamak ti amam? Saan a kastoy ti inar-arapaapko a biag.”
“Agtalekkayo kaniak, mom .... ” Inrikep ni John ti maletana. “Kamakamek ti agpa-Manila a flight ti PAL dita Gabu.” Binagkatna ti maletana.
Immasideg ni Jay-ar kenkuana sa immarakup. “Dimo pakadanagan ni grandma, dad... siak ti makaammo kenkuana.” Timmangad pay daytoy.
Napaumel ni John ta iti panangmatmatna iti anakna, nagalikuno iti lagipna ni Veronica. Adda latta ingingasan ti anakna iti daydi ina daytoy. Agingga ita, babbabalawenna pay laeng ti bagina iti pannakatay ni Veronica. Patienna a nagbalin ni Veronica a biktima ti naipatay a lunod kenkuana— nga asino man nga ayatenna ket matay.
Napakidem. Naimbag laeng ta timmallikud ni Melanie Davis kenkuana. Nawayawayaan iti nakas-ang koma a pagbanaganna.
Ngem maila ken ni Melanie. Saanna a basta malipatan lattan daytoy. Ammona nga iti kaunggan iti barukongna, ay-ayatenna ti balasang. Ngem ammona met a dinan mapasubli pay ti panagayat ni Melanie kenkuana. Nagbalin a narukop. Dina nagawayan ti derrep. Maitutop laeng ti inaramid ni Melanie kenkuana.
“Laglagipem a sarungkaran ti tanem ni mom, dad,” kinuna ni Jay-ar. “And grandpa, too.”
Napamulagat ni John iti kinuna ti anakna. Nalipatanna pay ketdin ti amana. “Yes, I will. Innakto idatonan ida iti sabong.”
“Annadam ‘ta bagim no kua,” impalagip met ti baket a nakigrupon a nakiinnarakup kadagiti agama.
“Wen. Dikay’ madanagan. Dakayo ketdi ti agan-annad. Pangngaasiyo ta dikay’ rumrummuar no diyo kadua ni Daniel.”
Nagtung-ed ti baket.
Rimmuk-at ni John iti arakup dagiti agapo ket nagturongen iti garahe a pagur-urayan ni Daniel. Nagtugaw iti akinlikud a tugaw ti lugan ta isu ti nakudrep ti pannaka-tint-na. Saan a makita dagiti tao iti ruar ti nakatugaw iti likud.
Pinisel ni Daniel ti remote control ti garahe. Pinagandarna ti luganna. Rimmuarda iti garahe sa inrikep met laeng ni Daniel.
Iti ruangan, padpadaanan idan ti maysa a natayag ken nabisked a lalaki a nakasabbikel iti paltog. Kabarbaro a guardia. Ni Daniel a mismo ti nangpili. Isu ti kaduana a mangsalaknib kada Jay-ar ken Zeny Villa. Insenias daytoy a nawayadan a rummuar.
Iti dalanda nga agturong iti Laoag Intermational Airport, kinita pay naminsan ni John ti US passportna. Isu ti adda iti ladawan ngem sabali ti naganna. Maliklikanna ti ahensia. Ngem ammona a di agbayag, maduktalandanto met laeng. Umdasen a makagteng iti Amerika sakbay a matakuatanda.
Pagammuan la ta nagkiriring ti selponna. Inruarna manipud iti bolsana. Kinitana ti numero sa dinagdagusna a sinungbatan.
“I’ve got news for you,” kinuna ti agar-arasaas a timek iti bangir a linia. Malasinna daytoy, ni Rudy a gayyemna. “Ket apay nga agar-arasaaska?”
“Addaak iti cubicle-ko... Ammom metten nga adu ti tao ditoy...”
“Okey...”
“Adda ipatpatulodko a ladawan... sending...” Madamdama pay bassit, nag-ting ti selpon ni John ket nagparang ti maysa a ladawan. Miningminganna. Ti ulitegna a mayor, ni Dante Villa. “Did you get it?” “Positive.” “Am-ammom dagita?”
“Ti ulitegko... Intsik dagiti kakaduana.” “The one sitting next to him... with a burgundy shirt, am-ammom?”
Dina pay nakitkita daytoy. “Awan pamalpalatpatak,” kinunana.
“Have you ever had an encounter with the TRIAD in Hong Kong?”
“I know you had seen my files...”
“You killed one of the chieftains... and, of course, some of his people...”
Dina pinapatay ti ibagbaga ni Rudy a chieftain. Pinagparangna laeng idi a natay. Ngem dina maibaga dayta ken ni Rudy. “I think that’s what happened,” insungbatna.
“Well, brace yourself with more trouble... because the people you killed were all affiliated with that man, Danny Chan, a local head of the TRIAD. Panggepdan sa ketdi ti mangbales kenka.
NAARIWAWA dagiti lima a kameng ti death squad nga agaayam iti baraha iti nagtimbukel a lamisaan. Addan duapulo a botelia a nagawanganda iti serbesa. Mangrugin a maulaw dagiti dadduma ket adaddan a naaringgorda.
Iti tawa, agmaymaysa ni Agent Fleming. Nakatali dagiti matana kadagiti maitaytayab a nginabras ti niebe. Ipapanna lattan nga ilemlemmeng dagiti niebe ni Agent Craig Stewart. Nalabit, sisiimen daytoy ida iti safehouse. Wenno agkatkatawa nga agmaymaysa. Namitlon a napalusposanda!
Nagngariet pay iti panangkemkemna kadagiti sangina. Nagriaw iti busbusorna.
Napataliaw pay dagiti taona. “Are you okay, boss?”
Saan a simmungbat. Saan metten a nagsaludsod ti taona. Am-ammoda. No saan a simmungbat, masapul nga agtalnadan. No saan, makaramanda iti bugkaw.
Simmusop iti sigariliona. Nakaun-uneg. Impug-awna ti asuk. Nanglangeb pay iti apagapaman ti sarming a tawa a sangsanguenna. Maikatlon! naitanabutobna.
Madamdama, nagkiriring ti selponna. Dinardarasna nga inruar. Apagapaman a nagkuy-os ti tianna iti pannakakitana iti numero.
“Hello, sir,” kinunana.
“I heard there was an operation...” nakalanlanay ti boses iti bangir a linia. “There was, sir...”
“And I was never informed...”
“We didn’t have time to notify you, sir. It was an spur of the moment. We have to act as quickly as we can.”
“Did you get the target?” “Saan, sir...”
“Ta apay met?”
Ania ti irasonna? “Matiempuanminto met laeng, sir... diyo pakadanagan.”
“Gaddemet!” gimluong ti timek manipud iti bangir ti linia. “Kunak man no sika ti kalaingan a mangnganup? Agmaymaysana, isolated, ken awan pagdawatanna iti tulong, ngem ay-ayamennakayo!”
Ngumayngayemngem ni Agent Fleming ngem awan maisaona. Makapungtot unay ken ni Agent Stewart. “Apay ngamin a dika nagkiddaw iti visual support? Ammom met nga adda satellite a para iti daytoy a mision.”
“Nakaro ti niebe, sir. Ken naangep. Visibility is almost
zero.”
“But we have thermal visibility!” rimmayok manen ti timek ti kasasao ni Agent Fleming. “Ammok dayta, sir, ngem napartak. Ammona dagiti pasikutsikot iti daytoy a bantay. This guy grew up in the Appalachian Mountains.”
“Ket nalalaing ngem sika? Saan kadi a dita met laeng ti dimmakkelam?”
Napaanges iti nauneg Agent Fleming. “S-sorry, sir... but under the inclement weather condition, we have to terminate the search. Dikay’ madanagan ta kas naikarik kadakayo, maipasuliminto met laeng. Saanak pay a nagkibaltang kadagiti karik. It may take longer than I had expected but we will eventually get him. So, trust me...” “We are running out of time, agent.” “Patience, sir...” Nakaun-uneg nga anges ti nangngeg ni Agent Fleming. “Madanaganak saan laeng a para kaniak. Ad-adda a para kadagiti nangatngato ngem siak. Ammom no ania ti mapasamak no saan a malapdan dayta a tao a mangibulgar iti amin...”
Napasennaay ni Agent Fleming. “Ammok, sir... ammok...”
“Siak ti pakailangdetan ti amin a pammabasol. Siak ti maikkat. Siak ti maibabain. Ngem dagita ti kalalaganan a lak-amek. Maikkatak. Ti kadadaksan, mabalin a maisaklangak ken mapaneknekan a nagbasolak babaen ti panagtestigo dayta nga Stewart! Maibaludak... Ammom ti mapasamak kadagiti pannakabagi ti linteg a maibalud iti ima dagiti padana a balud nangnangruna iti maysa a lakay a kas kaniak?”
Apagapaman a napaumel ni Agent Fleming, sa kinunana: “Don’t worry, sir, we will get him.
Ipanamnamak dayta.”
“AGIBALES...” naitanamitim ni John. Agpampanunot a nangibakal iti panagkitana iti napuskol a trapiko a sarsarunuenda. Saanna nga am-ammo daytoy Danny Chan nga imbaga ni Rudy. Awan ti atrasona iti daytoy.
Ngem ti ulitegna ti kadua ni Danny Chan iti ladawan. Apay? Ania ti koneksion daytoy iti ulitegna? Kinontrata ngata ti ulitegna ida a mangpapatay kenkuana isu nga Intsik dagiti naibaon idiay balayda?
Nangemkem. “Ania ti ammom maipapan iti dayta a Danny Chan?” sinaludsod ni John ken ni Rudy.
“Malaksid a protektor dagiti adu a negosio iti China ken Hong Kong, adda dakkel a negosiona iti China. Have you ever heard of sand mining?” “Very much.” “Adu ti kontratana a sand mining iti Filipinas... legal ken illegal.”
Isu dayta ti koneksion, napanunot ni John. Addda sand mining ti ulitegna. “Thanks for the info, Rudy.
Ngem agan-annadka... iti kanito a maammuan ti ahensia nga adda kontakmo kaniak ken maduktalanda a tultulongannak , agpeggadka met.”
“Awan danag. Agan-annadak. Ken ammok a salakniban ti bagik. Awagannak latta no adda kasapulam. Sige, sakbay nga adda makadlaw a kasarsaritak ti kangrunaan a kabusor ti ahensia.” Nagkatawa iti apagbassit ni Rudy.
Nagsennaay ni John. Dina ammo ngem kasla adda nangbilin kenkuana a kumita iti likud ti luganda. Kasla agatap nga adda mangsisiim wenno mangsursurot kadakuada ita addan pamalpalatpatanna no asino ti nangbilin kadagiti Intsik a nangraut kenkuana iti balayda. Saan a ti TRIAD. Ti bukodna nga uliteg!
Malagipna lattan ni Melanie. Agpeggad ti biag daytoy. Sadino ngatan a paset ti lubong ti yanna? Kayatna nga awagan. Ngem agaripapa.
Sungbatan ngata ni Melanie ti awagna no kaskasano? Kayat ngata pay a kasarita daytoy? Ngem saanna la ketdi a mapakawan ti bagina no adda dakes a mapasamak daytoy ta dina man laeng pinakaammuan uray ammona nga agpeggad.
Inruarna ti selponna ket nagdayal.
“Mang John... adda problema,” insinga ni Daniel. Nagmuregreg ni John a nangkita ken ni Daniel. Dina naituloy ti immawag.
“Iti likud...”
Limmingay ni John iti likudda. Adda lugan ti polis a mangip-ipus kadakuada. Aggilapgilap ti silaw iti tuktok daytoy. Isensenias ti polis ti panagpaigidda. “Ania, manong, agpaigidak?”
Saan nga insina ni John ti panagkitana iti sumarsaruno a lugan ti polis. Dina kayat ti agpakita iti uray asino.
“Mang John, agsardengak kadi?” sinaludsod manen ni Daniel.
Immanges iti nauneg ni John. “Wen.”
Liningay ni Daniel ni John nga adda iti likud. Ti paltog nga ig-iggamanen ni John ti naipasabat kadagiti matana. Naginayad sa nagpaigid. Nagsardeng. Nagsardeng met ti lugan ti polis. Iti side mirror, nakita ni Daniel ti nakauniporme a polis nga umas-asidegen iti luganda. Nakaasut daytoy iti paltog. Kinarawana ti paltogna iti siketna. Inuksotna sa inseksekna iti pandag ti luppona.
Pagammuan la ta nanakraad ti luganda. Adda naburak iti likud. Madamdama pay, addan ti polis a mangkatkatok iti nakangato pay laeng a sarming ti tawa ti luganna. “Naimbag a bigatyo,” inkablaaw ti polis. Pinasimbeng ni Daniel ti riknana. Imbabana ti sarming tawa ti lugan. “Kasta met kenka, tsip!”
“Ammom no apay a pinasardengka?” “Naburak a tail light, sir?” nakasimsimbeng ti timek ni Daniel a simmungbat.
Immisem ti polis. “Ammom met gayam... Ania itayen ti naganmo?”
“Danilo Corpuz, sir,” insungbat ni Daniel. Pinarimrimanna ti rearview mirror tapno kitaenna ti naglemmengan ni John.
“‘Tay lisensiam...”
Kinaut ni Daniel ti bolsana. Innalana ti lisensiana sa inyawatna iti polis.
Miningmingan ti polis ti lisensia sa kinitana ti rupa ni Daniel. “Lugan ni John Villa ti manmanehuem...” “Siak ti baro a drayberda, sir.”
“Kasta?” Simmirip ti polis iti likud ti lugan. Madamdama laeng, kinunana: “Patarimaanmo dayta naburak a tail light, Danilo. No sabali ti makatiempo kenka, tiketannaka.” Insublina ti lisensia ni Daniel.
Nagtung-ed ni Daniel. Inawatna ti lisensiana. “Patarimaanko a dagus, sir.”
“Good. Wen gayam, ni John Villa, awan kadi?” Pinarimriman manen ni Daniel ti rearview mirror ngem dina makita ni John. “Adda kano napananna, sir. Diak laeng ammo no sadino. Mabainak met a mangsaludsod. No adda kayatyo nga idanon kenkuana, ibagakto no kas pagarigan ta umawag kaniak.” “Saanen.” Timmallikuden ti polis. Agwingwingiwing ni Daniel bayat ti yaadayo ti polis. “Awanen,” kinunana. “Nakadayon.”
Kimmita iti rearview mirror. Apagisu met nga itungraraw ni John ti ulona iti cargo section ti SUV. Kimmalay-at daytoy a bimmallasiw iti tugaw iti likudna.
“Binuong ti laglag ti tail light tapno adda laeng rasonna a mangpasardeng kenka,” kinuna ni John.
“Panagkunak, talaga nga adda napaguram nga opisial ti gobierno,” kinuna ni Daniel.
Ammo ni John dayta. Ar-aramaten ti ulitegna dagiti polis ken ti bileg ken koneksionna iti TRIAD tapno
maipaknida. Naparasaw. Nalagipna manen ni Melanie. Nasken a mapakaammuanna daytoy.
Nagkidem ket immarakup iti panunotna dagidi nasasam-it a kanitoda ken Melanie. Adda pay ngata gundawayna a mangpasubli iti napukawen a panagtalek daytoy kenkuana?
Nagsanamtek. Nupay ammona a napukawnan ni Melanie, responsibilidadna pay laeng ti mangpakaammo iti panagannad daytoy. Inruarna ti selponna. Intipana: “Be very careful. TRIAD is coming after you!”
Ngem nagtukeng. I-send-na kadi wenno saan? Kasanon no nagbiddut iti panangipapan?
NAPUSKOL dagiti rummuarsumrek iti klab. Nakaarariwawa dagiti agiinum ngem ad-adda a gumgumluong ti patpatokaren ti DJ a kumkompasan dagiti umariwekwek nga agtutubo nga agsalsala iti tengnga ti klab. Nakaing-ingel ti asuk dagiti nagduduma a sigarilio ken tabako a paypayubyoben dagiti kustomer. Degdegan pay ti marihuana ken no ania ditan nga illegal a droga nga araramatenda.
Iti mays a suli ti klab, tallo a lallaki ti agiinum iti maysa a lamisaan. Taliaw a taliaw dagitoy. Saan a maisina dagiti matada iti maysa a babai a nakatugaw iti sabali pay a suli.
Agmaymaysa ti babai. Nakadumog a nakatengnged iti serbesa. Pasaray mangitangad, sa apagapaman a taliawenna ti bartender a naparangarang ti panaglakona iti shabu. Nagwingiwing ti babai kalpasan a maparimrimanna manen ti bartender. Nagdumog a nangidiso iti botelia iti lamisaanna. Kinitana dagiti botelia iti sangona. Maymaysan ti adda nagyanna. Bin-ig a nagawanganen dagiti dadduma.
Sineniasanna ti waitress. Dagus met nga immasideg daytoy kenkuana. Nangibilin iti tallo pay a serbesa. Pimmanaw ti waitress ket idi agsubli, addan tallo a serbesa nga iggem daytoy. Nagbayad ket madamdama laeng, nabati manen nga agmaymaysa iti lamisaanna.
Nanglukat iti maysa pay a serbesa. Intangguapna. Ngem iti panangitangadna, kasla adda
nakitana a ladawan ti maysa a lalaki a dumawdawat iti pammakawan, agpakpakaasi nga ikkanna pay iti maysa pay a gundaway a mangipaneknek iti panagbabawina iti panangliput daytoy kenkuana. Nga aturen daytoy ti ania man a nagbasolanna.
Pagammuan la ta nagtulakak. Kasla malmesen iti pannakaibarukubok ti serbesa iti ngiwatna. Imbabana ti serbesa. Nakapigpigsa ti panaguyekna. Ngem sininga ti timek a naggapu iti bassit a wireless nga earpiece iti lapayagna. “Venus, someone is approaching you at 5:00 oclock.”
Sakbay a nakataliaw ken nakasungbat, addan dakulap a naipatay iti bukotna. “Are you okay?”
Napasardeng iti panaguyekna. Tinangadna ti lalaki. Dagiti singkit a mata daytoy ti immuna a nadlawna. Gagangay ti tayagna ngem nabagi. Nagalus-os dagiti matana iti nadusol a siket ti lalaki. “Get your hands off me,” kumuskusilap a nangibilin.
“Come on... I’m just trying to help,” insungbat ti lalaki a nangituloy iti panangtapikna iti bukotna.
Nakasuron ti babai. Nagpusipos sa induronna ti lalaki. “I said get off
me!” imper-akna. Kimmusilap ti lalaki. Danogenna koma ti babai ngem inunaanen daytoy. Uray la a naarinuknok iti sakit ti nadanog a pus-ongna.
Nagkaribuson iti klab. Immasideg ti dua a nabaked a bouncer. Adda payen ti bartender. “Get the fuck out of here!” imbugkaw ti bartender. Ginammatanna ti babai. Ngem apagiggemna iti daytoy, insiko daytoy ti barukongna. Naganikki pay ken napaarukong a nangsarapa iti barukongna.
Inyasideg ti babai ti ngiwatna iti lapayag ti bartender. “Your drug dealing ends here, do you
understand?” inyarasaas ti babai. Naminsan pay nga insikona ti lalaki sa induronna.
Sipapardas dagiti dua a bouncer a nangiggem kadagiti takiag ti babai. Naggulagol ti babai ngem saan a makaruk-at. Umas-asideg manen ti singkit a lalaki. Nakaiggemen iti paltog. Nakapaturong daytoy iti babai. Naparasaw ti babai. Inkarigatanna manen ti rumukat ngem saanna a maakkal dagiti
takiagna iti irut ti panangaklili dagiti dua a dadakkel a bouncer. “Venus, do you need our help?” timek manipud iti earpiece.
“That’s negative,” inyarasaas ti babai a saan a nangisina iti panagkitana kadagiti umap-apuyen a singkit a mata ti lalaki. Ket kasla nakalawlawag a nakitana ti tammudo daytoy a nangkalbit iti paltog. Ket sakbay a linemmes ti kanalbuong dagiti agsisimparat nga ikkis dagiti tattao, limmagton a nagsirko. Natikaw met dagiti dua a bouncer ket naiguyodna ti maysa. Idi agdisso dagiti sakana iti datar, nakitana ti dara a nagsayasay iti barukong ti maysa kadagiti bouncer. Nadaleb daytoy.
Nakaparpardas ti babai a nangasut iti paltog iti siketna. Ket sakbay a makalbit manen ti lalaki ti paltog daytoy, nanalbuongen ti paltogna. Naudatal a dagus ti singkit.
Aggunay koma pay ti bouncer ngem pinaturonganen ti babai iti paltog. “Get out!” imbilin ti babai iti
bouncer. Agiikkis latta dagiti tattao nga agiinnuna a rummuar.
Imbaba ti bouncer dagiti imana. Kinitana pay naminsan ti babai sa timmallikud ket timmiponen kadagiti agannukoyan a rummuar iti klab.
Tumallikud koma metten ti bartenter a napalalon ti butengna ngem pinengdan ti babai. “Where do you
think you are going?” Impaturongna ti paltogna. Saan a naguni ti bartender.
“Yan dagiti droga?”
“Ania a droga?”
Intibab ti babai ti putan ti paltogna iti bartender. Nagdara daytoy. Uray la a nagungor.
“Yan dagiti droga!” imbugkawen ti babai. Nagturong ti bartender iti likud ti counter. Linukatanna ti safe ket naibaskag dagiti adu a droga. “Adda lighter-mo?”
Nagwingiwing ti bartender.
“Adda lighter-mo kunak!”
Ginuyod ti bartender ti maysa a drawer sa inruarna ti maysa a lighter. Inyawatna iti babai. Apaman a naiggaman ti babai ti lighter, rinugiannan ti nangpaltog kadagiti arak iti bar. Nagayus ti adu nga arak iti datar.
“Get out,” imbilin ti babai iti bartender.
Saan a nagkir-in ti lalaki ngem agbubuteng ti langana.
Pinasged ti babai ti lighter. “I said get out...” inyikkis manen ti babai iti lalaki. “Unless you wanna
die.” Impuruakna ti sisesegged a lighter iti nagayusan dagiti arak. Apaman a nasapgud ti apuy ti arak, gimlayab daytoy. Nagtaray ti lalaki.
Nakatantanang ti babai a nagna. Simrek iti maysa nga opisina. Kinitana ti monitor sa adda impisitna iti DVR. Nalettat ti maysa a disk. Sinuktona. Nagdardarasen a rimmuar iti likud. Timmaray a nagturong iti luganna. Mangngegnan dagiti wangwang iti di unay adayo. Nagdardarasen a pimmanaw. Iti
rearview mirror, nakalawlawag a makitana ti narubrob nga apuy a manglamlamot ti klab nga ayuyang dagiti agar-aramat iti droga. (Maituloyto)