20 Angkel Dok (22)
Addan ni Maestra Elaine? Ket saanen a naanawa ni Angkel Dok ti panagbanugbog ti barukongna.
Ti Napalabas: Kayat ni Manang Tina nga armen ni Angkel Dok ni Ma’am Elaine, ngem yar-arit met ni Jigo a kanakanna iti nauubing a kas kada Eula ken Angel. Nagbalaw idi madlawna a dakkelen ti naksay iti urnongna. Impadamag ni Manang Tina ti kinapinget ni Ernie nga agarem ken ni Ma’am Elaine. Kayat ni Angkel Dok a maammuan no pudno daytoy ket napan idiay eskuela. Nagsarangda ken Ernie ngem inyam-ammo ni Ma’am Elaine ken ni Ernie a kas fiancée-na. Naragsakan ni Manang Tina iti napasamak. Ngem imparupa ni Ernie a saan a mamati a nobiana ni Ma’am Elaine. Naggasto manen ni Angkel Dok iti pagpinikda ngem nagawidda met laeng a dagus idi makita ni Jigo nga adda sabali a ka-date dagiti kapiknikda. Nagbakasion ni Ma’am Elaine ket nagbalin a diskusion dagiti lumugar no agsubli pay wenno saanen. Ken ni Angkel Dok, pampanunotenna no pakadan ti maestra daydi panagyaman daytoy kenkuana.
(Maika-22 a Paset)
AGIDASAR koman ni Manang Tina iti pamigatda idi agbalaw. Dina pay nakita ti kabagisna, wenno nangngeg la koma ti timekna. Dati, dina maunaan ti kabsatna a bumangon aglalo no rummuar nga agwatwat.
Kinaluban ni Manang Tina dagiti tinunona a sagdudua ramayan a purong. Tinangadna ti agdan sakbay a naglayon iti sango ti balay a yan ni Lakay Lito a mangkudkudit manen iti kuligligna idinto a paspasurotanna ti kanta ti ponona.
“Rimmuar kadi ni manong?” sinaludsod ni Manang Tina.
Nakigtot ni Lakay Lito ket nagtungpal a lallay ti panangpasurotna iti kanta ti ponona. Kinitana ni Manang Tina. “Ni manong, kunak!” immulagat ni Manang Tina. Inkapsut ni Lakay Lito ti pono sa sinangona ni Manang Tina. “Ni bayaw, kunam?”
“Wen! Di pay bimmangon wenno di pay simmangpet a nangwatwat?” insungbat ni Manang Tina.
Ngem sakbay a makasungbat ni Lakay Lito, nanabraang ti galba a batia iti maysa a kaarruba iti laudenda. Simmaruno ti panagbusi ti ngiwat ti maysa a babai.
“Animalka! Sige, inka aguperen ‘ta kabitmo. Mabiagko dagitoy annakko uray awanka. Total, ‘ta met la kuam ti inkamangmo!”
Nagkinnita da Manang Tina ken Lakay Lito. Awan tinnimek, ngem kunam la no agpatebbeng ni Lakay Lito nga umis-isem a nangitingig iti panagallingagna.
“Ni baket met! Dimo kad’ pigpigsaan, a, kababain kadagiti kakaarruba. Uray man ket agrungrong ti kua… no adda aramidko! Laklakayanakon, baket!”
“He, hanak a baket, torpe!”
Nagtil-ay a nakatingig ni Lakay Lito a kimmita iti kalsada tapno mangngegna ti ipus ti isungbat ti lalaki.
“Gapu ta diak pakaidda, napanka nangkaidda ‘ti sabalin? Sige, inka agpapas! Alaemon dagita lupotmo!”
Iti siledna, nabaringkuas ni Angkel Dok iti ariwawa
ti kaarrubada. Ngem apagbiit laeng ti panagallingagna ta naawatanna a problema ti agassawa ti gapu ti pagngiwngiwatan ti babai a kaarrubada. Kimmita iti nakalukat a tawa iti makusayanna. Nakapagsimpa gayamen ti lawag.
“Ket no pagiddaennak met ngamin dita kosina! Ania, dalikan kada pusa laengen ti kaikariak a kaidda ditoy balay? Apay, saan met a nairaman ti panagkaidda ti agassawa, a!”
Iti baba, makais-isem nga agwingwingiwing ni Lakay Lito a nangsango manen iti ponona. Impigsana ti patokarna. “… and will you wait for me/ Beyond the reef…
Manen? Ni kayong a talaga, nakuna ni Angkel Dok iti unegna. Pagsayaatanna, nakainana ti panunotna uray mano nga oras laeng ti pannakailibayna. Iti napalabas a rabii, kasla nain-indayon iti dumdumges a liday ti panagpakada iti ayug dayta a kanta a pinatokor ni Lakay Lito.
“Ni Isiang talaga! Agilawlaw-an man ngatan iti sao!” kinuna ni Lakay Lito. “No mapan agyan ni Tisong kada nanangna dita ili, mapannanto met la pagawiden no mailiw a makudkodan!”
“Talanggutang a laklakayan!” imbanang-es ni Manang Tina. Dina naituloy nga uboren ni Lakay Lito iti sao ta isu met nga agdanapeg ni Angkel Dok iti agdan.
“Bigbigat, adda draman?” inkatawa ni Angkel Dok. Aglayon koma iti banio ngem nakitana dagiti pagdaldalus ni Manang Tina iti ridaw ket naglayon iti kamuyongan iti likud ti balay. Nagderetso iti sangarakepan a puon ti santol sa nagtalangkiaw. Ngem nakigtot idi mariknana a kasla nadengngep ti bukot ti dapanna. Nagtilmon ta kasla nagmaga ti karabukobna. Kasano ngamin ket nalagipna ti panagsisinnutil idi dagiti nataengan no mapalabasda ti balo nga aglaklako iti lames iti agsapa ti Domingo. No sipsiputam ti panagindayon ti patong ni Binang, kunam la no adda pay mabalbalinam, adda mangisutil iti kaduada. Isu ngarud, nay, isaruno ti sabali. Maisbuanna pay ti bukot ti dapannan!
“Naladawka ita a nakariing, bayaw. Siguro, napintas ti tagtagainepmo!” impasabat ni Lakay Lito ken ni Angkel Dok idi makalaem.
Ngem sakbay a makasungbat ni Angkel Dok, nagiriag manen ti kaarrubada.
“No saannak nga inal-allilaw, adayo a nailawanak kenka. Nakaadalak koma. Nanam-ay koma ti panagbiagko! Saanak koma a ladladogen ditoy Simbaluca!”
“Napintas a drama! Pagmurmurayan!” kinuna ni Lakay Lito a bulonna a rimmuar. Naglayon iti ruangan. “Mangantayo pay, ala!” kinuna met ni Manang Tina. Ngem simmurot ketdi ni Angkel Dok ken ni Lakay Lito. Immmabay iti kayongna sa nagtil-ay a nangtannawag kadagiti agap-apa iti laudenda. Ket makais-isem idi makitana dagiti kakaarrubada a nakarungiit met a mangbuybuya kadagiti agassawa.
“Aniat’ problemada, kayong?” sinaludsod ni Angkel Dok.
“No ania ti malagip ‘ta babai nga ipabasol ken ni lakayna, bayaw!” Makais-isem nga agwingwingiwing ni Lakay Lito. “Kas nangngegmo, pabpabasolen ti babai ti lakayna iti kinaubingna a nakiasawa kenkuana. No saan kano nga isu, nakaadal kano koma!”
“Apay? Naitani, aya?”
“Kastoy, bayaw!” insungbat ni Lakay Lito. “Sigud