12 Angkel Padi
Angkel Padi
Nagluposen dagiti kalgaw iti ngayed
Ti pinagayan iti Abulug ket adda rikna a mauksot
Iti kaunggan bayat ti panangpalabasko
Kadagiti tiempo a panangpurosmo kadagiti atap a sabsabong Iti kaniogan a nakaigapuan ti panagungar dagiti tarigagay A nangsilpo iti narasi a gasat nga inay-ayam ti panawen. Adda ragsak kadagiti panid dagiti libro ngem Barbareng mapagungar manen
Iti nagdakdakiwasanta a kataltalonan iti Libertad Wenno kadagiti nabiag a disso iti Junction Luna
Idi naganus pay laeng dagidi main-inaw a parmata. Sapsapulek dagiti tugotmo iti nadaeg a simbaan ti La Paz A nagmurmarayan ti ayatmo kadagiti tattao
Aglalo kadagiti awanan makunkunana iti biag Dinaliasatta ti naapres a Karayan Calaba Inay-ayamna ti balsa ngem pinatpatibkernak
Sika nga imbilangko nga ama kadagiti tiempo a nalapunos Iti danum-tudo dagiti gumawgawawa a bangkag Inayatnak iti nagpaiduma; imbilangnak nga anak. Narangrang dagiti maris-lagipmo iti Sinait
Iti ngarab ti Bantay Sintinila a napanta nangaykaywan
Iti waig a nagburakanta iti rama ken nagdigdigosan
Dagiti bangkag a minulaam iti nateng ken bawang
Iti katangriban iti Katipunan nga inta nagwiswisiwisan Kadagiti ikan ken nagalaanta iti aragan
A nangiturong kadata iti kadaratan iti Cabangtalan
A nangsangalanta kadagiti arapaap iti imatang dagiti dalluyon
Iti di unay adayo, ti igid-baybay iti Dadalaquiten
A nagkurkurobanta iti kapa ken nagpidutanta iti kulot ken subol Napnuan namnama dagiti saritaanta bayat ti pannagnata iti laud A nanglabasanta kadagiti naraber a ruruot ken nalangto a kapan-awan Amin dagitoy, awandan ngem ti lagipko kenka
Sibibiag iti amin a panawen.