Di Pay Napnek ni KC iti Lovelife-na?
ADDA dagiti pagbabawyanna iti biag ni KC.
Daytoy ti kunana iti “Usapang Real Life” a programa ni Luchi Cruz-Valdez.
Kas iti ania?
Ti nagbanagan ti relasionda ken Sharon Cuneta nga inana.
Pagaammo dagiti mangsursurot iti “istoria” da KC ken Megastar, saan nga agsasao ita dagiti agina.
Ket nasayaat a banag a maammuan nga iti biang ni KC, saanna a tagiragsaken daytoy a kasasaadda ken Megastar.
Ala, bareng no ipaayonto met la ida ti panawen iti gundaway nga agrinnisut ken agkappia.
* * *
Iti biang pay ni KC, no mabalin, ni Piolo Pascual ti makaparehana iti sumaruno a proyektona—pelikula man wenno teleserye.
Pagaammotayo nga iti naminsan, nagayan-ayat dagiti dua.
Ngem pettat ti panagsinada gapu iti maatap a ‘third party” iti biang ni Piolo.
Kalpasan ti panagsinada ken Piolo Pascual, adda maysa ken dua pay a nagbalin a karelasion ni KC a nagbanag met laeng iti panagsina.
Iti biangmi, no adda makapnek a lovelife ni KC, mabalin a mapukaw dagitoy a panagbabbabawina.
* * *
Iti daytoy a pandemia, adu ti naamiris ni Gerald Anderson.
Umuna, kunana a masapul nga iti amin a gundaway, naandur ti tao. Tapno iti idadateng iti kastoy a pandemia a di napakpakadaan, kabaelan latta daytoy ti agbiag.
Maikadua, naamiris ni Gerald no kasano ti kinapartak a mapukaw ti maysa a banag a di napakpakadaan. Masapul ngarud a nakasagana ti tao iti amin a gundaway.
Dawat ken kararag ni Gerald, agtalinaed koma a nasalun-at isuna, kasta met dagiti patpatgenna iti biag.—O
(Chairman ni Kabagis Eloy iti Hunta Direktiba ti FAMAS, Host-Producer ti Celebrity Hour Media Forum, ken Trustee iti Aliw Awards Foundation, Inc.—AST)