Naragsak ni Kitkat iti Baro a Programana
NAPALALO a ragsak ni Kitkat Favia ta adda baro a programana iti Net 25. Kaduana ni Anjo Yllana, maysa daytoy a noontime
show ken kagiddan ti “Eat Bulaga.”
Kuna ni Kitkat a napartak ti nagbalin a negosasion mainaig iti baro a programana.
Nupay maysa nga Star Magic talent ni Kitkat, saan nga eksklusibo isu a nawaya daytoy nga ag
guest GMA-7 ken iti mabiit, iti TV5.
Kuna ni Kitkat a mabalin nga iti Septiembre a mangrugida iti nasao a programa. No saan man, kaladawanen ti Oktubre.
Kuna ni Kitkat a kabaelanda met a patarayen ken Anjo ti programa ta kabaelan met kas pagarigan ni Luis Manzano a patarayen ti “Minute To Win It” uray agmaymaysa daytoy.
Malaksid iti daytoy, adda dagiti guest co-host a kas kadagiti talent ti Eagle Broadcasting Corporation a pakairamanan ni Gladys Reyes.
Iti pannakaisursurat daytoy, saan pay a mabalin a dakamaten ti paulo ti programa. Iti ketdi teaser daytoy, naikabil ti “Happy-ness Everyday.”
Kuna ni Kitkat, manipud Lunes agingga iti Biernes ti programada ken Anjo; tallo nga aldaw ti teyping idinto a dua nga aldaw met ti live tapno mainsiarda a nasayaat.
Nadakamat ni Kitkit a napalalo ti yamanna iti baro a programana ta amin a negosioda, nagserra.
Ket gapu ta mabalinda ti agpa-advance iti sueldoda, inyangaw ni Kitkat a pagbayadna daytoy iti koriente iti Meralco.
* * *
Iti maysa a press briefing ni Presidential Spokesperson Harry Roque iti maysa kadagiti kuarto ti Wil Tower a kukua ni Willie Revillame, inkari ti naud-udi a mangited daytoy iti lima a milion a pisos a para kadagiti drayber ti dyip.
Nadakamat ni Willie a ti nasao a pasdek ti ususaren ni Sek. Roque gapu ta positibo iti COVID-19 ti sumagmamano nga empleado ti RTVM ken PTV4 ket awan ti sabali nga istudio a mabalinda a mausar.
Kuna ni Willie nga idi inawagan ni Sekretario Roque, dagus nga indiayana ti Wil Tower.—O