Ti Masirib a Baket
IDI un-unana a panawen, adda maysa a balo a baket nga addaan iti uppat nga annak a lallaki nga agpapada metten a naasawaan. Agnaedda amin iti maymaysa a balay ngem gapu ta di agkakasunguan dagiti assawada, inkeddeng ti baket nga agsisinadan iti dalikan.
Iti maysa nga aldaw, ti inaudian a lalaki nga anak ti baket, nakayawid iti pamusian nga abuyo. Ngem natayen daytoy idi isangpetna isu nga iti suronna, imbaberna daytoy ket nagdisso iti atep ti balayda.
Iti dayta met nga aldaw, ti asawa ti panglakayen iti lugarda, napan nagdigos iti dan-aw. Indissona ti balitok a kuentasna iti igid ti dan-aw. Nakita daytoy ti maysa a tumatayab a managan iti sawi. Nagsuek ti sawi ket intayabna ti balitok a kuentas.
Bayat ti panagam-ampayag ti sawi iti tangatang, nakitana ti natay a pamusian iti atep ti balay ti balo a baket. Nagdisso daytoy iti atep ket gapu ta dina met makan ti balitok a kuentas, indissonan daytoy iti atep ket ti natay a pamusian ti intayabna.
Kabigatanna, bayat ti panagibilbilag ti balo a baket iti mais iti atep ti balayda, nakitana ti balitok a kuentas. Ammona a ti asawa ti panglakayenda ti akinkukua iti daytoy isu a daras a napanna impan ti kuentas iti dakkel a balay ti panglakayen.
Anian a ragsak ti asawa ti panglakayen iti pannakaisubli ti balitok a kuentasna.
“Ibagam no ania ti kayatmo a subad ti panangisublim iti daytoy, Ina Baket,” kinuna ti asawa ti panglakayen.
“Saan a pirak, napateg nga asawa ti pangulo,” kinuna ti baket. “Ta pagaapaanto laeng dagiti assawa dagiti annakko. Ti kiddawek, inton umay a kabus a panangangaytayo iti parambak a para iti Mutia ti Kinarang-ay, ipalubosyo kadi a ti laeng balayko ti mapasgedan ti kingkina.”
Masmasdaaw man, kinuna ti asawa ti panglakayen a matungpal ti kiddaw ti baket.
Dimteng ti kabus. Immulog ti Mutia ti Kinarang-ay manipud iti Langit ket nagladingit ta nakasipsipnget ti purok a nadanonna malaksid iti maysa a balay nga adda silawna. Napan nagtoktok iti nasao a balay. Ti baket nga akimbalay, ammonan a ti Mutia ti Kinarang-ay daytoy ket imbagana kadagiti amin a kabbalayna a pasangbayenda ti mutia. Insaganana dagiti kuentas a sabsabong ket idi sumrek ti Mutia ti Kinarang-ay, saggaysa nga inkuentas dagiti mamanugang ti baket dagitoy iti mutia.
Napnek ti Mutia ti Kinarang-ay iti naragsak a pannakapasangbayna. Ket kinunana iti baket, “Ibagam, Ina Baket, no ania ti kayatmo ta itedko.”
Kinuna ti baket, “Mutia ti Kinarang-ay, pangngaasim ta makipagyankan kadakami tapno agbiagkami met a naragsak ken narang-ay.”
Nagpanunot ti mutia ket idi agangay, kinunana, “Maragsakanak a makipagyan kadakayo iti agnanayon no la ketdi agtutunoskayo, a saankayo nga agaapa no di ket agiinnayatkayo.”
Naragsakan dagiti agkakabbalay iti nangngegda ket inkarida iti Mutia ti Kinarang-ay a tungpalenda ti imbagana.
Manipud idin, saanen a nagaapa dagiti assawa dagiti annak a lallaki ti baket. Impakitada ti ayatda iti tunggal maysa, banag a nakaragsakan ti baket ken dagiti annakna. Manipud met idin, nagari ti ayat, kappia, ken kinarang-ay iti nasao a balay.—O