No Adda Sigsigloten, Adda Met Warwaren
AMINTAYO, mabalin nga adda dagiti nagatgatangtayo a pagbabbabawyantayo no apay a ginatangtay dagitoy. Buyer’s remorse, a kas kunada.
Idi Agosto 2007, napanko binisita dagiti gagayyemko idiay Singapore sakbay a napanak idiay Kuala Lumpur, Malaysia tapno agatendarak iti maysa a komperensia. Daydi ti umuna a biahek a mapan iti ballasiw-taaw. Arapaap dayta ti maysa a kas kaniak a naggapu iti nakurapay a pamilia-- daytay met makaadayo, piman. Agtawenak idin iti 27.
Leather Bag
Iti maudi nga aldawko iti Kuala Lumpur, napanak nag-shopping. Gimmatangak iti maysa a nangisit ken pannakelen bassit a leather bag iti Giordano shop iti Kuala Lumpur City Centre a yan ti nalatak a Petronas Towers.
Literal a nadagsen daytoy a bag ken nadagsen pay iti bolsa ta ginatangko daytoy iti PhP18,000. Idi 2007, medio dakkelen daytoy a kantidad. Agasem, iti dayta a tawen, Php16,000 ti sueldok iti kada bulan a kas Instructor IV iti University of the Philippines College of Business Administration (a maawawagan itan iti Virata School of Business). Di kad’ dakdakkel pay ti bayad ti nasao a bag ngem ti aw-awatek a sueldok.
Napintas daytoy a bag isu ngarud a ginatangko. Ngem itan, maamirisko a dakkel a biddut ti pananggatangko iti daytoy. Makunak a daytoy ngatan ti kadadakkelan a biddutko no panaggumulo iti kuarta ti pagsasaritaan.
Malagipko daytoy a bag ta iti panagur-urnosko iti kuartomi iti naminsan, nakitak ket nagdesisionak nga ipadawatko laengen ta diak met us-usarenen ta talaga a nadagsen. Kinapudnona, manmano idi nga usarek daytoy idi agobobraak pay laeng idiay Manila. Kasano, aya, ket no usarek, ket mairana a nakaad-adu ti pasahero iti MRT, agtatakderak ket inton addaakon iti opisina, naktanganto a permin ti takiagko gapu iti kinadagsen daytoy a bag. No palausen ti manarita, diakon maunnat ti takiagko.
Ita, no kasta a gumatangak iti maysa a medio nangina bassit a banag, panunotek pay no mamin-ano nga usarek sakonto kuentaen no mano ti balor ti tunggal panangusarko iti daytoy a banag.
Kastoy man ti pormulana: Estimated cost per use (c) = Price (p) / estimated number of usage (u). Iti sabali a pannao: c = p/u
Kas pagarigan gumatangak iti rubber shoes nga usarek nga agtaray. No PhP5,000 ti bayad daytoy ket namnamaek nga usarek iti dua a tawen ken agtarayak iti tallo a beses iti kada lawas, di kadi PhP 32 ti bayad ti tunggal panangusarko iti dayta a sapatos. Ngem no met kilometro ti pagsasaritan ket namnamaek a tumarayak iti di nakurkurang ngem 20 a kilometro iti kada lawas, di kadi para iti daytoy a rubber shoes, PhP4.80 iti magastosko iti kada kilometro.
Ket ‘diay bag a ginatangmo idiay Malaysia, mano ti bayad ti tunggal panangusarmo, kunam?
Hm, dimo man ipalpalagip kaniak daydiay a bag!