Kastoy, Kapid, Ditoy Hawaii
NAANGAY ti eleksion primaria ditoy Hawaii idi Agosto 8. Iti eleksion primaria ti pakapilian kadagiti kandidato nga agsasalip iti eleksion heneral. Ti mangabak iti eleksion heneral ti agtugaw inton Enero 1, 2021 iti takem a nakabotosanda.
Nairanta daytoy eleksion primaria a pagsasalipan dagiti agkakapartido. Gapu iti daytoy, nasken a pilien ti botante ti partido a nakaikappenganna, ket dagiti laeng kandidato iti partido a pinilina ti mabalinna a botosan. Kas pagarigan pilien ti botante ti Demokrata a partido, dagiti laeng kandidato iti partido Demokrata ti mabalinna a botosan. No mangibotos ti botante iti kandidato a Republikano, maibilang ti sibubukel a balotana nga imbalido wenno awan kaibatoganna.
Iti sabali a bangir, maigidiat ti pannakapili dagiti agpaidasig iti takem iti siudad wenno county. Awan makuna a partido a pakaikappengan dagiti kandidato iti para mayor ken konsehal. Ngarud, mabalin dagiti amin a botante ti mangbotos iti kayatda a kandidato a para mayor ken konsehal. Dagiti dua a kandidato a makaala iti kangatuan a botos ti agbalubal iti eleksion heneral. Ngem mabalin a mangabak a dagus ti kandidato no makaala iti botos a nasursurok ngem kagudua (50% +1) wenno dagiti awan kabalubalna iti sabali a partido.
Iti daytoy a tawen, 15 dagiti nagkandidato a para mayor ditoy Honolulu, maysa kadakuada ti mangibilang iti bagina a sagibo ti Filipino, ni Kimberly Pine. Nagpapaay ni Pine a diputado ken iti agdama, maysa a konsehala a mangibagi iti Ewa. Idiay met Big Island, 16 dagiti kandidato a para mayor, maysa ti Filipino, ni Tante Urban. Nayanak ni Urban idiay Magsingal, Ilocos Sur. Maysa a mabigbig a negosiante—addaan iti dua a dadakkel a restauran, maysa idiay Big Island ken maysa idiay Maui. Ni Urban ti agtagikua iti Fil-Am Voice, ti pagiwarnak dagiti Filipino idiay Maui.
Awan kadagiti dua a Filipino ti nakaigasat: maika-4 ni Pine idinto a maika-9 ni Urban.
Dagiti Nakalasat a Para iti Eleksion Heneral
Iti konseho ti Honolulu, nangabak ni Radiant Cordero iti Distrito 7 (Kalihi), idinto nga iti Distrito 9 (Waipahu) nangabak ni Willie Espero. Nagpapaay ni Espero a diputado ken senador iti 30 a tawen.
Idiay Big Island, awan kimmarit ken ni Ashley Kerkiewicz iti Distrito 4 (Keauu). Daytoy ti damo a pannakailayonna. Taga-Sarrat (Ilocos Norte) ti inana, ni sigud a Marietta Cariño Duldulao, ken apoko daydi Pelagio Cariño a lider dagiti mangmangged iti kaunasan ti Puna (Keaau itan). Daydi Cariño ti nangkiddaw ti pannakaipasdek ti kamposanto idiay Kurtistown a para kadagiti Filipino idi 1928.
Idiay Maui, inalunos ni Mike Molina dagiti dua a kimmarit kenkuana (70.62% ti nabotosna). Immuna a nabotosan a konsehal idi 2001. Maysa nga Ilokana ti kaingungotna.
Idiay Kauai, makibalubal iti eleksion heneral ni Addison Bolosan iti pito nga agtakem a konsehal. Awan distrito a naituding iti Kauai. Maysa a doktor ni Bolosan ken in-innabo ti taga-Bacarra, Ilocos Norte.
Iti Distrito 30 (Kalihi) ti State House, kinettel ni Ernesto “Sonny” Ganaden ti 30 a tawen ni Romy Cachola a kas Diputado ken Konsehal iti Honolulu. Tubo ti Narvacan (Ilocos Sur) ni Cachola. Maysa met nga abogado ni Ganaden.
Iti Distrito 36 (Millilani), inluges ni Trish La Chica dagiti dua a kinalabanna. Daytoy ti damo nga itatapogna iti politika. Iti agdama, agpapaay iti opisina ni Gobernador David Ige.
Iti Distrito 38 (Waipahu), awan kimmarit ken ni Henry Aquino. Sinublat ni Aquino ti kinadiputado manipud ken ni Atty. Alex Sonson idi 2009. Nayanak idiay Galimuyod (Ilocos Sur) ni Sonson.
Iti Distrito 39 (Makakilo/Kapolei), nailayon ni Ty J.K. Cullen a diputado, nagpapaay a kameng ti Waipahu Neighborhood Board sakbay a nagdiputado idi 2010.
Iti Distrito 30 (Ewa), awan kinabalubal ni Rosebella “Rose” Locquiao Martinez. Nagturpos iti Master’s Degree in Public Health iti University of Hawaii. Nayanak ken dimmakkel idiay Urdaneta City (Pangasinan). Kaingungot ni Flor Martinez, nagpapaay nga Information Officer iti Philippine Consulate idiay San Francisco, California ken Honolulu, Hawaii.
Iti kinasenador ti Hawaii, dandani binukodan ni Joy Buenaventura ti botos iti Distrito 2, (Puna, Big Island). Daytoy ti damo ni Buenaventura nga agpaidasig a senador. Maysa nga abogada. Nagpapaay a diputado manipud 2014 agingga iti agdama.
Idiay Maui, Distrito 5 (Wailuku), awan kimmarit ken ni Gil Coloma Keith-Agaran. Taga-Pinili (Ilocos Norte) daydi Manuel Coloma a tatangna idinto a taga-Badoc ni Lydia Agaran a nanangna. Dimmakkel iti kaunasan ti Paia ken Kahului. Maysa nga abogado. Nagturpos idiay Yale College. Immuna a nagtakem a diputado sakbay a nagsenador.
Iti Distrito 14 (puseg ti Honolulu), awan kinabalubal ni Donna Mercado Kim. Kinasenador ti immuna a