Ading Kosinera
DAGITAY koma nasusustansia ti itaraontayo kadagiti ubbing tapno maikkan dagitoy iti naan-anay a napintas a salun-at. Iti kasta, agserbidanto a kabinnulig iti pannakapadur-as ti pagilian iti masakbayan.
Paset daytoy ti mensahe ni Dr. Mario V. Capansana, Director ti Food and Nutrition Research Institute (FNRI), maipanggep iti agtultuloy a pannakapataud dagiti nasustansia a taraon a para kadagiti ubbing.
Mainaig iti daytoy, nangaramid ti FNRI iti 2020 Menu Guide Calendar nga addaan iti tema a “Nutritious and Affordable Meals for Healthier Kids.” Mayayon daytoy iti Republic Act 11037 nga ad-adda nga am-ammo a kas “Masustansyang Pagkain Para sa Batang Pilipino Act.”
No dadduma ngamin, saan a kayat wenno di unay magustuan dagiti ubbing ti agsida iti nateng. Ngem no maluto dagitoy iti wagas a paggugustoda a sidaen, kayatda met laeng. Ngarud, padasentayo manen ti sabali a potahe nga inawagan ti FNRI iti “Veggie Patties a Nalaokan iti Dalem” a nairaman iti 2020 Menu Guide Calendar.
Dagiti Ramen:
4 bukel nga itlog ti manok, nabatil 1/3 tasa a manteka
2 kutsarita nga iodized salt
1/8 kutsarita a pimienta (black pepper), nadekdek
4 pedaso a chicken breast, nagiling ¼ tasa a dalem ti manok, naiw-iwa 2 kutsara a bawang, nadekdek ¼ tasa a sibuyas, puraw, nagalip iti babassit
2 tasa a karabasa, nagalip
5 tasa a kulitis (spinach), naiw-iwa 2 tasa nga arina (all-purpose flour) 1 tasa a manteka
1¼ tasa a banana catsup
Panangisagana:
Paglalaoken ti nabatil nga itlog, asin, ken pimienta iti malukong. Mangala iti sabali a malukong. Paglaoken met ti nagiling a karne ti manok, dalem, bawang, sibuyas, karabasa, kulitis, ken arina. Inayon ti egg mixture. Kiwaren a nasayaat.
Bingaybingayen ti mixture. Makaaramid iti 40 a patties wenno kaibatogan ti 2 kutsara wenno 40 gramo kada maysa a patty. Pormaen a nasayaat.
Ipapudot ti manteka. Prituen iti uppat a minuto wenno agingga a brown ti kolorna.
Adawen ken paubosan a nasayaat iti strainer. Mabalin met nga ikabil iti malukong nga adda tissue paper-na. Daytoy ti mangsagepsep iti mantekana.
Idasar karaman ti catsup.
Palagip: Nabaknang ti dalem iti Iron ken Bitamina A. Kasta met a no awan kulitis, mabalin met ti agaramat iti balangeg wenno rangaw ti kamote. Mabalin pay ti berde nga alugbati.—O