Idi Un-unana a Panawen
• USO ita kadagiti nataengan ti panangyalud-od iti panagretiro, wenno aktibo latta uray nagretiron ti maysa a tao. Dagiti soldado, agbalinda a security guard. Dagiti titser, agbalin a professor emeritus.
Dagiti ehekutibo agbalinda a consultant. Adda pay dagiti propesional nga agtrabaho kadagiti trabaho a kasla saan a maikanatad iti propesionda. Isu a saan met a makasikor ti panagretiro.
• Mayatiddog ti kaamaan. Iti maysa a balay, adda dagiti agkakakkabaly a tallo a henerasion. Madamdama, agbalinen nga uppat a henerasion. No iti siudad, bumasbassit ti pamilia, dumakdakkel a dumakdakkel dagiti pamilia iti away gapu iti umat-atiddog a biag ti tao.
• Agadaptar kadagiti nakurapay, ulila, napanawan, ket ibilang ida a kas bukod nga annak. Nupay iti tiempo ti kinataeng, dagiti annakmo, addaandanto metten iti bukodda a biag. Mangisponsor iti scholarship para kadagiti maikari ngem awanan iti rekursos a mangituloy iti panagadalda.
• Istoria laeng ti immortalidad. Mortal ti tao. Adda dagiti nababaknang a tattao iti sabali a nasion a naikabil ti bangkay dagiti minatayda kadagiti cryonics tanks a mangur-uray iti resureksion wenno pannakapagbiagda manen babaen ti laing ti tao. Dagiti DNA (hene) a naala kadagiti bangkay ken rupsa ti tao, di maaramid ti taa kalanglanga ti langa ti natay idi sibibiag pay daytoy.
*Ti kinaimbag ti tulbek iti pannakapnek. Isu pay ti Nabalitokan a Pagalagadan. “Tratuen ti nataengan a kas iti kayatmo a panangtratoda kenka inton maysakan a nataengan.” Kuna dayta ni Geoffrey Chaucer iti The
Pardoner’s Tale. Ngem agbalin a naimbag akas maysa a nataengan. Ken awanan kondision daytoy a kinaimbag.
*Saan a basta labsan dagiti tattao iti dalan. Agsardeng, tulongan ida, pakanen dagiti mabisin, painumen dagiti mawaw, bisitaen dagiti balud, baduan dagiti lamolamo, ken agasan dagiti masakit. Iti Mateo 25, kuna ni Kristo, “Ania man ti naaramidam iti kabassitan a kabsatko, naaramidmo met kaniak.” Daytoy ti katan-okan a tignay ti tao iti sangkatawan. Adda lugar a naikari kenka sadi Langit.
*Nasayaat a banag ti panangsango ken ni Patay no maysakan a nataengan. Kasla kandela iti maudi a lawagna. Ti panangpalubos iti nataengan a pumusayen, pagkaykaysaenna ti pamilia, urnongenna dagiti nabetbettak a paset ti relasion. Mapairut ti panagkakanaig. Tiempo ti panangibalikas dagiti sibibiag kadagiti nasasayaat a banag maipapan iti pimmusay. Aramiden a nakallalagip daytoy nga okasion. Ti ipupusay ket panangibati kadagiti sibibiag iti baro a namnama, napabaro nga ayat, ken baro a panangrugi.—O