IDI Pebrero 21 itoy a tawen, naangay ti “Innadal” iti University of Northern Philippines (UNP) iti Siudad ti Vigan. Ti “Innadal” ti serye ti lektiur iti ortograpia ti lengguahe nga Ilokano nga isaysayangkat ti Gunglo Dagiti Mannurat nga Ilokano iti Filipinas (GUMIL Filipinas) nga idauluan ni Remy N. Albano iti tulong dagiti sangana ken ahensia a naayat a mangsapsappuyot iti daytoy a gannuat.
Iti daytoy nga “Innadal,” ti met GUMIL Ilocos Sur nga idauluan ni Benjamin P. Pacris ti nangidaulo iti pannakaangayna, babaen ti tulong ti UNP nga idauluan ni Dr. Erwin F. Cadorna, Dep. Speaker Deogracias Victor “DV” Savellano; ken Dr. Santiago Reolalas, Director, Ilocano Studies Center, UNP.
Daytoy met laeng nga “Innadal” ti maysa kadagiti pangpaspasungad nga aktibidad iti maangay koma a “Dap-ayan 2020,” ti nailian a panagtataripnong dagiti kameng ti GUMIL Filipinas a maangay iti Abril 17-18-19, 2020 iti NTA Building,
Siudad ti Batac, ngem saanen a natuloy gapu iti epidemia a COVID19.
Dimmar-ay iti “Innadal” dagiti pannakabagi dagiti nadumaduma nga ahensia ti gobierno nga agkalikagum met a makasursuro iti umno a pannakaisurat ti lengguahe nga Ilokano, kameng ti media, mannursuro ken estudiante, ken dadduma pay nga indibidual nga agessem iti panagsurat iti bukodda a pagsasao.
Mainaig iti daytoy, adtoy dagiti sumagmamano a ladawan a pakalaglagipan iti nasao nga “Innadal,” ti naudi a kastoy a panagtataripnong sakbay ti Marso 17, 2020 a pannakabaliw a namimpinsan ti taray ti panagbiag gapu iti COVID19.
Dagiti agarup 150 a kameng ti media, Public Information Officers, Mass Com students ken mannursuro iti UNP, MMSU, DepEd, ken Development Communicators a dimmar-ay iti “Innadal.”
Sumagmamano kadagiti sangaili ken opisial ti GUMIL Filipinas a timmabuno iti “Innadal”: Ilokano Orthography and Ilokano Journalism Seminar a naangay iti Tadena Hall, UNP, Vigan City. Agpakanawan: Fe Camacho, Edmund Bisquera, Joel B. Manuel, Dr. Erwin F. Cadorna, UNP President; Remy N. Albano, presidente ti GUMIL Filipinas ken Bise Gob. ti Apayao; Dep. Speaker Deogracias Victor “DV” Savellano; Benjamin P. Pacris, presidente ti GUMIL Ilocos Sur; ken Dr. Santiago Reolalas, Director, Ilocano Studies Center , UNP.
Dakdakamaten ni Remy N. Albano, presidente ti GUMIL Filipinas, dagiti kangrunaan a gannuat ti GUMIL para iti panagrangpaya ti Literatura Ilokana ken iti pannakataginayon ti bukod a pagsasao nga Ilokano.
Nagbalin ti “Innadal” a pannakipaset ti GUMIL Filipinas iti pannakarambak ti International Mother Language Day a naangay met iti Pebrero 21. Nagpaala iti pakalaglagipan a ladawan nga iggemda ti tarpaulin ti International Mother Language Day da (agpakanawan) Eliseo B. Contillo (lecturer), Fe Camacho, Benjamin P. Pacris (lecturer), Remy Albano, presidente ti GUMIL Filipinas, Dr. Erwin F. Cadorna, UNP President; Joel B. Manuel (lecturer); Dr. Santiago Reolalas, Director, Ilocano Studies Center, UNP; ken Cles B. Rambaud (lecturer), Editor, Bannawag Magazine.
Gutgutugoten ni Deputy Speaker Deogracias Victor “DV” B. Savellano dagiti dimmar-ay iti “Innadal” iti itutulongda iti pannakasaluad ken pannakaital-o dagiti kultura ken kannawidan dagiti Ilokano, pakairamanan ti pakasaritaan dagiti nadumaduma ng ili iti Amianan. Ni Cong. DV Savellano ti nagpaay a kangrunaan a nagsarita iti naangay nga “Innadal.”
Agpakanawan: Remy N. Albano, presidente ti GUMIL Filipinas ken Bise Gobernador ti Apayao; Joel Manuel, lecturer; Benjamin P. Pacris, presidente ti GUMIL Ilocos Sur; ken Danilo Bautista, Editor, Silnag Magazine.
Uray dagiti kameng ti polisia, mamatida a maysa kadagiti kasasamayan nga armas iti pannakapatalinaed iti linak ken urnos isu ti pannakaangay ti dialogo a pakaaramatan ti bukod a pagsasao. Timmabunoda met iti naangay nga “Innadal.” Nairaman iti ladawan da Benjamin P. Pacris, presidente ti GUMIL Ilocos Sur; Remy Albano, presidente ti GUMIL Filipinas; ken Winnie De Vera, mangidadaulo iti Police Community Relations, PNP Ilocos Sur.