Ammuem Pay Daytoy
Agkidkiddaw ti University of the Philippines Baguio (UPB) kadagiti donasion tapno matulongan dagiti nakurapay nga estudiante ti Unibersidad, iti babaen ti “Kaagapay UP Baguio Program.”
Mayayon iti “Kaagapay sa Pag-aaral ng mga Iskolar ng Bayan Fundraising and Resource Generation Campaign” nga am-ammo pay a kas “Kaagapay UP” nga ininaw ti University of the Philippines (UP) System administration, inorganisar ti UPB ti “Kaagapay UP Baguio” nga addaan iti isu met laeng a panggep tapno matulongan dagiti agkasapulan ken maiparbeng nga estudiante a mangituloy iti panagadalda babaen ti “remote learning.”
Iti kaudian a surbey ti UP System, mapan a 5,600 nga estudiante ti UP ti di makaisakad iti remote learning. Awan kauten dagitoy nga estudiante a para iti teknolohia ken ramit a nagbalinen a napateg a paset iti panagbasa ket ngarud, no di masolusionan daytoy, mabalin a dida makapagtuloy nga agbasa.
Maibatay pay iti surbey a mapan a 1,600 kadagitoy nga estudiante ti talaga nga awan kabaelanda nga agbasa babaen ti remote learning. Saan met a kabaelan ti di nakurkurang ngem 4,000 nga estudiante nga ileppas ti rugianda a remote learning ta agkurkurangen ti gastuen ti pamiliada gapu iti pandemia.
Mainaig iti daytoy, inyalnag ti UP System ti Kaagapay UP campaign nga agkidkiddaw iti tulong manipud kadagiti amin a sektor tapno maituloy dagitoy nga Iskolar ng
Bayan ti panagadalda ken magun-oddanto met laeng ti arapaapda a makapagturpos.
Kas makita iti nagan ti programa, makidkiddaw iti amin ti panagbalinda koma a kas “kaagapay” ti komunidad ti UP. Naadaw manipud iti balikas a Filipino a “kaagapay” manipud iti puon a balikas nga “agapay” a kayatna a sawen, suporta wenno tulong, ti panagbalin a kaagapay ket isu ti panangtarabay kadagiti Iskolar ng Bayan tapno mapalag-ananda kadagiti parikutda iti panagadalda. Kidkiddawen ngarud ti UP Baguio ti suporta ti amin a mabalin a makatulong kadagiti estudiante ti UP a manggun-od kadagiti arapaapda ken ken iti panggepda nga agserbinto iti kamaudiananna iti gimong.
Agawat ti UP Baguio iti donasion a kuarta wenno ramit. Mabalin a pre-owned wenno brand new dagiti ramit a kas kadagiti laptop ken desktop computer ken maipatulod dagitoy iti UP Baguio Residence Hall. Mabalin met a cash, tseke, wenno electronic funds ti donasion a kuarta a maideposito babaen ti over-the-counter wenno digital transaction iti UP College Baguio (UPCB) Educational Foundation bank account iti BPI Baguio Burnham Branch: account name UPCB Educational Foundation Inc, account number 0560-0126-24. Mabalin pay a maipatulod dagiti donasion babaen ti panangusar iti secured payment gateways ti UP system via kaagapay.up.edu.ph. Para iti ad-adu pay nga impormasion, bisitaen ti facebook.com/OfficialUPB wenno ag-email iti kaagapay. upbaguio@up.edu.ph. (UP Baguio Public Affairs)