Ti Tarakenmo ken Sika
KADAWYAN a paset ti adu a pagtaengan dagiti taraken nga aso ken pusa. Agpapaay dagitoy a paglinglingayan dagiti bumalay a makunkuna a makatulong tapno mataginayon ti pisikal a salunat ken templada ti maysa a tao.
Mainaig iti daytoy, adda dagiti agsalsaludsod no maakaran kadi met iti COVID-19 dagitoy a taraken.
Ti sungbat: Paneknekan dagiti panagadal a narigat a maakaran dagiti taraken nga aso ken pusa iti sakit a COVID-19.
Adda dagiti report a naineksionan dagiti aso ken pusa ken iti nangato a dosis ti coronavirus.
Napaliiw a saan nga ingginggina dagiti ayup ti naited kadakuada a virus. No man adda epektona, dagdagus a nalainganda. Nadlaw ketdi kadagitoy dagiti sintoma dagiti kadawyan a sakit dagiti ayup a kas iti panaggurigor, parikut iti panaganges, ken saan a pannakaidna. Ngem kas nakunan, daras met a nalainganda.
Saan ngarud a pagdanagan a seknan wenno dagiti taraken nga aso ken pusa iti sakit a COVID-19. Ken saan met a nalaka nga agyakar dagiti taraken a pusa ken aso iti sakit kadagiti kapadpadada nga ayup ken uray iti amoda.
Dagiti laeng tattao ti napardas nga agyakar iti bayrus kadagiti padada a tao. Nupay kasta, maibalbalakad met a liklikan koma dagiti tattao a positibo iti COVID-19 ti panangsaksaklot, pangap-apros wenno panangagekda kadagiti tarakenda nga aso ken pusa. Nasken nga adda adda aruatda a face mask ken bugguanda dagiti imada sakbay ken kalpasan a sagidsagidenda ti tarakenda nga ayup.
Nasken pay a taripatuen dagiti taraken nga nga aso ken pusa a kas iti panangtaripato kadagiti kameng ti pamilia. Nasken a natalged ti pagnanaedanda ken nadalus ti aglawlawda. Saan pay nga ipaspasiar dagiti taraken nga ayup ken pagtalinaeden a nakagalut no mairuarda. Manteneren pay ti kaaddayoda kadagiti dadduma nga ayup ken iti amoda. Saan laeng a para kadagiti tattao ti panagtalinaed iti pagtaengan ken panangsurot iti physical distancing. Kasapulan met nga aramiden daytoy kadagiti taraken nga ayup.
Manen, maigunamgunam a masapul a matratar dagiti taraken nga ayup a kas kameng ti pamilia tapno dida maikawa iti daytoy a panawen ti pandemia.
Nasken pay a nakasagana dagiti kasapulanda a taraon ken para emerhensia a bambanag iti daytoy a panawen.—O