Panangimaton iti Pagtaengan
MAYSA kadagiti kangrunaan a parikut dagiti nagannak iti daytoy a panawen ti pandemia dagiti ubbing ken maladaga pay laeng nga annakda. Adu kadagiti nagannak ti matartaranta no ania ken kasano ti aramidenda tapno agtalinaed a nasalun-at dagiti ubbing.
Limitado pay met ti iruruar iti pagtaengan iti panawen ti pandemia. Mairaman ditoy ti limitado a maipaay a serbisio ti transportasion ken komersio.
Iti laksid ti panagraira ti pandemia a COVID-19, kasapulan latta nga ikonsultar iti doktor ti kasasaad dagiti ubbing aglalo dagiti maladaga. Nasken ngamin a masalaknibanda iti bayrus ken dadduma a sakit.
Iti daytoy a panawen, nasken a suroten pay dagiti ubbing ti physical distancing. Addada man iti uneg wenno ruar ti pagtaengan, iti pagaayaman wenno sadino man, nasken a di nakurkurang ngem maysa metro ti kaaddayoda kadagiti gagayyem ken kakaarruba.
Saan nga itugtugot dagiti ubbing iti pagtagilakuan a saan met a napateg unay ti rantada. Dakdakkel ti gundaway a maakaranda iti sakit no rumrummuarda.
Anusan nga isuro dagiti ubbing iti umisu a wagas a panangbuggoda kadagiti imada. Nasken a mabugguan dagiti ima dagiti ubbing sakbay ti pannanganda.
Natalged nga aramaten ti hand sanitizer kadagiti ubbing ken maladaga. Nupay kasta, kitaen no umisu met laeng ti panangaramatda iti daytoy. Siguraduen a namagaanen ti hand sanitizer nga inaramatda sakbay nga adda sabali a banag nga iggamanda.
Saan nga ipalubos a dilpatanda dagiti imada no kaikabkabil ti hand sanitizer.
No mapaliiw nga adda sintoma ti ania man a sakit dagiti ubbing ken maladaga, yawag a dagus iti doktor sakbay nga idanon ti masakit iti klinika.
Adda ngamin dagiti saan unay a nakaro a sakit dagiti ubbing a mabalin nga ikonsultar babaen ti telepono. No kastoy, iti lattan uneg ti pagtaengan ti pagpalainganda.
No pay madlaw a masakit ti maysa nga ubing, mabalin nga isina ti pagyananna iti maysa a siled ti balay
No dadduma, narigat nga aramiden daytoy. No di maisina ti ubing, pagaramaten dagiti kabbalay iti face mask ken kanayon a bugguanda dagiti imada.
Saan nga ipaaramat kadagiti dadduma a kabbalay dagiti lunglongan nga ar-aramaten ti masakit nga ubing.
Kadawyan pay a maikawa dagiti ubbing nga awan kasarsarita, kaay-ayam wenno tao iti asidegda. Ibalakad iti masakit nga ubing ti panagaramatna iti digital a gamigam. Mabalin a kasaritana dagiti gagayyemna babaen ti telepono, teks wenno video.
Napateg ti akem ti emosional a pannakinaig kadagiti ubbing. No mabalin ti video chat, aramaten daytoy a pangray-aw kadagiti ubbing.—O